Luugaay W'injiil 21
21
Tꞌibraatfaatkiiti Miyaaw
1Yasuuꞌa asti iishbibi door, gaba da gali Ukwaasanaay gawiib mhallagaab oomiyaawi sanduukiib tuusee rhiya. 2Baruuh masi miskiint ibraatfaatki, maloot neekala usanduukiib daasee rhiya. 3Yasuuꞌa “Oosdik andi hookna, tuun tꞌibraatfaatki tumiskiin kasseeh oodehay iraweeka gwidaka mhallaga daasta. 4Aan baraah kassaah umraayiitoohna shawaayt ifirꞌana. Laakiin tuun batuuh tumiskiin tutiibriya kastooh tifirꞌa.” idi.
Yasuuꞌa Ukwaasanaay Ugawi Katꞌamti Whankaay Hadiidiya
5Gali bariiyeeh ikwiriyaatayee Ukwaasanaay uugaw kak daawri aweeyeewwa, Ukwaasanaay dehaay farꞌama miyaawiiwwa daawriimaab iiktiyeet toonaatiib hadiidiyaan. 6Yasuuꞌa “Oontꞌa rhiteeneet tuuna, damaan yꞌi indi, gaal awi han uraawi kehii ituuꞌish kiidi. Baraah kassaah dhibi iyadna.” idi.
7Ikwiriyaatay raatiyaana, “Taan taana nhoob iikti iyadna? Taan bataah idwilneet toona naat alaama iikti tindi?” idiin.
8Yasuuꞌa igwibi, “Digwagwna! Baaꞌatootaalna. Gwida aniib oosmii yꞌi iyadna, ‘Ani barooh akati.’ iyadna. Aree ‘Udamaan idwil.’ iyadna. Een bareeh baaramna! 9Finaabwa rookaatwa teemsiiwnihoob, baarakwiina. Taan taana ibakii awwal ikatiin, laakiin igidiyeesooh tꞌaakhari iikti kitdi.” idi. 10Malya baruuh bareeyooh dehaay: “Dehay dehayi kehii fari iyadna, hadꞌaayi hadꞌaayeeti kehii fari tindi. 11Beentooy akraat buutiit katatanaay iikti tindi, gwida mhiinan hargwiitwa lhanaytwa iikti iyadna. Tisrakwiinaawwa tibreetee wawint alaamaawwa daayi iyadna.
12Laakiin kastooh toonaati hankaay, uudehay ayeeb hookna iidꞌa iyadna, aree amaag waraayi hookna iyadna. Aniib oosmi sabbii aree Iyahuudi diini gawaawwa isijnaawwa beeti nuuni hookna iyadna. Yhadꞌaawwa Yhaakmaayi suuriiwwa haay yꞌi hookna iyadna. 13Usakana Udaayiib sooteeni jillaay, tuun tuuna fursaatookna tikati. 14Laakiin baraakna whankaay igarooyeekna kak teheebneeb baahasiikna. 15Ani bhaliibwa fagarandiitwa iyaaw hookna andi. Kassaah yꞌashooyaakna adgiriit imꞌikir hookna kiidiin tari imgwisir hookna kiidiin. 16Ifaroowwa isanaawwa, yꞌayay dehaywa, yꞌarawwa iidlib hookna iyadna, aree galib bareesookna idaar iyadna. 17Anii sabbii uudehay kassaah iirib hookna iyadna. 18Laakiin hamoot han ugirmaayiisookna dhibi kitdi. 19Akirnaat gadna, aree midhhan imaar tiyadna.” idi.
Algudus Katꞌami Tindi
20Malya Yasuuꞌa, “Algudus dheesh kwilalee rhiteenihoob, willa katꞌamiiniyeet toona iikan tiyadna. 21Been oodoor Yahuudaay daateeneek, eerba beeti dhaabaana! Tumadiinaatiib daateeneek, ishna giigaana! Barraab yhadabeeb daateeneek, tumadiina beeti baaꞌagaarna! 22Uun ujasaay damaan iikti indiyeet toona iktabeeb kataabi. 23Baliin eembꞌi tinakwalayaawwa, yꞌareet dꞌooranaawwa idhikwna! Beentooy whaashiib akra gwirha dhibi iyadna, aree oodehayi kehii Ukwaasanaay gadab daayi iyadna. 24Baraah bꞌadhdhii ituudir iyadna, aree yꞌabuukiyeet kasseeh idehaya beeti galeelami iyadna. Ijintiili daman timmiimeeneeb hadiit Algudus Ijintiilee eetami tindi.
25Tuyintiibwa, tutrigtiibwa, yhayikweebwa alaamaat lawi iyadna. Tubuutiib idehaya diinanooyi iyadna, aree oobhar wꞌitragiiswa umoojiiwwa iraakw iyadna. 26Tuduniyaati kehii iikti tindiit toonaati sabbii, uudehay bꞌiintii darwiiwi iyadna. Tibreeteeb eefeen yꞌakrir digami iyadna. 27Been oodoor baraah Wꞌaadami Oor ibꞌaluukiib akrirwa matuuntiiwwa yꞌee rhi iyadna. 28Laakiin taan taana badooyeeneeb oodoor, umidhhanuukna idwilayt asti gadna aree igirmaayeekna asti abiknaa!” idi.
Utiini Hindi Mitaal
29Yasuuꞌa bareeh een eemtaal sooya: “Utiini hindiiwwa, kasseeh yhindi eerawwa shibibna. 30Whindi teerat yaksiiniyihoob, umhagaayi dawil ikatiyeet toona iknaayaakna tikteenna. 31Baraakna han oontꞌaaneet, teen teena akee rhiteenihoob, Ukwaasanaayt tehadꞌaayi dawit tikatiyeet toona kanna.
32Oosdik andi hookna, uun uutaas taan taana kastaah ikatiineeb hadiit iiyyi kiidiin. 33Tuubuutwa taabreewwa daayimaat kiikeena, laakiin aniib ibhali daayimaaba.” idi.
Digwagwna!
34Yasuuꞌa masi, “Digwagwna, iginꞌaayeekna nafirnayteebwa sakariibwa tuduniyaati hasakaaywa baadꞌiina. Een tidꞌaneek, been uumbꞌi gaalhoob usharakiit yꞌibik hookna indi. 35Baruuh baliib kastooh tubuutiib ikweerni kehii yꞌi indi. 36Aflaay diima gwꞌadna, taan taana kastaah ikatiineet midda adgiriit teedhhaniini jillaay siileelaana. Aree adgiriit Wꞌaadami Oori suurii han tingadiina.” idi.
37Yasuuꞌa bꞌeebka Ukwaasanaay gawiib allami, hawaadka giigiit ukanbuul Oorba Saytuun ittiyoodiinaay kehii naayi. 38Kassaah uudehay Ukwaasanaay ugawiib barooh isniikarnee dehaay fajir karuumaab yꞌiin.
Currently Selected:
Luugaay W'injiil 21: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
