Luugaay W'injiil 20
20
Yasuuꞌiit Tehadꞌaayi Raatamta
1Yint gaat Yasuuꞌa oodehay allami. Ukwaasanaay gawiib usakana udaayiib hadiidi. Ifagiiriya isuurkinaawwa, whaggi koojaawwa, oodehayi eegrimaawwa, bariiyooh dehaay eeyaaniit raatiyaana, 2“Teen teena naat hadꞌaayeetii saktiniya? Sooyaa hoon! Aree toon tehadꞌaayi aaw yhii hook?” idiin.
3Yasuuꞌa bareeyooh dehaay, “Ani han bareekna gaana raati hookna andi, beet sooyaanheeb! 4Yuuhannaab umaasi hag aaw yhii? Ukwaasana tibreeteeb eefeeb kiiki han, tari oodehayu?” idi.
5Baraah taktaki geeb bhaliiyaaniit, “Beet toona Yuuhannaab Ukwaasana yhii niyadee dehaay kaꞌadgirna. Een niyadeek, aflaay ‘Naanhooy aamanaab kitteena?’ iyaad hoon indi. 6Laakiin ‘Barooh uudehay yhii’ niyadeek, uudehay Yuuhannaab unabiit aamaniinayt, baraah kassaah aweeyee geedi hoon iyadna.” idiin.
7Aflaay baraah Yasuuꞌii dehaay, “Hinin Yuuhannaab umoosti hag yhiib kinkan.” idiin.
8Yasuuꞌa bareeyooh dehaay, “Ani han naat hadꞌaayeetii teen teena sakaniyeeb sooyi hookna kaadi.” idi.
Ikiraaykinaayi Mitaal
9Yasuuꞌa oodehay een eemtaal dehaay hadiidiya: “Tak dirꞌaatooh yꞌadiit dirꞌaatkinaab galinee dehaay ikiri. Malya gwida daman yꞌish iibaabiya. 10Shaawti uwaaki door, baruuh tudirꞌaatiit firꞌaaytii naat iyawni jillaay kishiyaab gaal ikiraaykinaayee dehaay diigwatiya. Laakiin ikiraaykina barooh ithꞌaniit harar ayee giigisiyaan. 11Malya baruuh masi weer kishiya diigwatiya. Laakiin baraah oon han ithꞌaniit amaag iweerniit harar ayee giigisiyaan. 12Baruuh masi mhayaab diigwatiya. Aree baraah barooh wookiyaaniit barraab igidna.
13Malya tudirꞌaati ankwana, ‘Kak saki andi? Wꞌooru beeb wꞌareeyaniyeeb diigwati andi. Baraah kisib barooh hamooysi iyadna.’ idi.
14Laakiin ikiraaykina barooh rhiyaanihoob, gal eeraw infaraadna, ‘Uun baruuh ukwasaamana ikati. Barooh nidaar, malya tudirꞌa hinin kwasaami niyad.’ imsiyoodaayna. 15Aflaay baraah barooh tudirꞌaatii barraab igidniit idirna.
Malya tudirꞌaati ankwana yꞌiiniyihoob, bareeh naan iiwari indi? 16Baruuh yꞌiit baliin ikiraaykina idaar indi. Malya tudirꞌa warib iyaaw indi.” idi.
Uudehay een ibhali imaasiwnihoob, baraah “Tuun door han bitꞌakaayeet toonaati.” idiin.
17Laakiin Yasuuꞌa bareeh ishbibaayt, “Aflaay iktabeeb katab ibhali naan isehariiwna:
Aaktab ‘Wꞌawi idꞌaariiga iribneeb,
oorkwini awi oogaw yaksiiniib iki.’ iyadna.
18Been wꞌawii kehii dhibiiniibka katꞌamiit firkak iikti indi. Laakiin uun wꞌawi kehii dhibiiniyeeb been huugami indi.” idi.
19Whaggi koojaawwa ifagiiriya isuurkinaawwa, aan aamtaal bareeyooh dehaay attiyoodiyaab iiktiineet toona ikannayt, willa barooh haay yꞌibikni salal yhariwna. Laakiin baraah oodehay irkwiin.
Gaysarii Dehaay Tilbaati Kwisuuy
20Baraah Yasuuꞌaab winneet igwꞌadna. Baraah jaasuusaab, daayi da massalamiin diigwatiyaan. Baraah Yasuuꞌaab bhaliyeeb abiktiit aflaay barooh Iroomaani haakim nuuntiib yhiriwna. 21Aflaay aan ijaasuusa barooh raatiyaana, “Seedna, baruuk oosdik hadiidtiniya aree allamtiniya, girad anu han Ukwaasanaay usalal usidkiib allamtiniyeet toona nikteen. 22Aflaay Gaysar Iroomaani titilba dehaay nifarꞌeet tuuna halaal han kitti?” idiin.
23Yasuuꞌa baraah een ibhali naan haay isehiriwneeb ikanaayt, bareeyooh dehaay, 24“Oon udiinaar rhisaanaheeb! Aan aafiirwa, uusimwa aaya?” idi.
25Baraah “Gaysariiba.” idiin.
Yasuuꞌa “Aflaay Gaysarii dehaay, Gaysariit toona hiina! Ukwaasanaay dehaay, Ukwaasanaayt toona hiina!” idi.
26Baraah oodehayi suurii barooh naat hadiidee hooy dhibsiini sharaki dꞌuuy adgiraab kiikeen. Baraah bariiyeeh ibhaliyi diguuyiib winneet ajjabamiyaaniit tim ikeen.
Oodehay Wꞌayaanaay Yak
27Sadduuki gali yak weer kiihaay iidna, Yasuuꞌii dehaay eeyaaniit raatiyaana, 28“Seedna, hinin Muusa dehoon iktib, ‘Tak sanuuh dꞌiraab ar baabariib iyaayeek aree takat inꞌiisheek, sanuuh weer tootakat indꞌiir. Usaniyooh dehaay ar hooy fanri.’ idi. 29Beentooy asarama sana iifiin. Gaal bareesooh takat idꞌir. Baruuh ar baabari iya. 30Uusan umalya tootakat idꞌir, uun han firaay anu iya. 31Masi uusan umhaya aree batooh idꞌir, uun han firaay anu iya. Isana yꞌasarama kassaah hooy imkattaamna. Gaal han firaay ishaab kiiki. 32Aakhir, tutakat han tiya. 33Uuyak daayiiniyihoob, yꞌasarama kassaah batooh idꞌirneek naayiitooh takat iikti tindi?” idiin.
34Yasuuꞌa bareeyooh dehaay igwibi, “Toon tuduniyaati dehay imdadꞌiirna. 35Laakiin baliin gayii yꞌiiniib udamaaniib takweet imeerwa tuyatii yakeenwa kiiꞌamdadꞌaarna. 36Baraah imalak tꞌiiteeba, shaawti iiyyi kiidiin. Baraah tuyatii yakaabayt, Ukwaasanaay ar ikatiin. 37Laakiin whindi udabalooy mitaaleeb, yꞌaya tuyatii yakeeneet toona Muusa han rhisiya. Baruuh Wꞌankwanaay dehaay, ‘Ibraahiimiib Ukwaasana, Isehaagiib Ukwaasana, Yaaguubiib Ukwaasana’ idiit waliikiya. 38Baruuh oodehay yꞌayaanaayi Kwaasana kiiki. Laakiin idhhaniinaayi Kwaasana ikati. Bariiyooh dehaay kassaah dhhaniiba.” idi.
39Whaggi kooja gali igwibiina, “Daayiib tidiya, Seednaay!” idiin. 40Aree gaal han ashꞌaraa masi weena barooh raataab kiiki.
Umasiih Aay Oor Ikati?
41Malya Yasuuꞌa bareeh raatiya, “Umasiih kak Daawidi oor ittiyoodi? 42Daawid uukna tehabayaati kitaabiib:
‘Wꞌankwana Wꞌankwanaayu dehaay diyaabu:
umaygwadu sꞌaa!
43Yꞌashooyeek iragadaayeek whii
usiyaamiit eetameen akwasiyeeb ookiik.’ diyaabi.
44Daawid uukna barooh ‘Wꞌankwana’ waliikiiniyeek, aflaay baruuh kak oorooh ikati?” idi.
45Uudehay kassaah sinaakree, Yasuuꞌa ikwiriyaatayeeh dehaay, 46“Whaggi kooja hooy digwagwna. Baraah gwimad halakaayee hiireereena, aree usuugiib salaamameeneet toona areeyeena, Iyahuudi diini gawaayeeb timiisꞌanii tidaayikaat yhariwna, aree tꞌaduumaateeb hamooysama mhiinan yhariwna. 47Tꞌibraatfaatki italisna aree igawaayeehna eesliibna. Oodehayi rarhistiib toosileel isgwamiidna. Bak tꞌiiteeb aanda winneet jasaami iyadna.” idi.
Currently Selected:
Luugaay W'injiil 20: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
