Luugaay W'injiil 19
19
Yasuuꞌaawwa Utilbaat Tamanaawwa
1Yasuuꞌa malya Ariihaab shuumiyaayt hasamiya. 2Been oomhiin itilbaat tamanaayi suurkina iikti, Sakkaa iidni tak, winneet gaba iifi. 3Baruuh Yasuuꞌa aab iiktiyeeb rhiyeet yhariw. Laakiin baruuh nakash taku aree uudehay gwidaabayt irhiti adgiraab kiiki. 4Aflaay baruuh oodehayi suurii dhaabiyaayt, been usalalii hasamiib Yasuuꞌiib irhiti jillaay hindiib reewiya.
5Yasuuꞌa been oomhiin iktimihoob, asti ishbibaayt bariiyooh dehaay, “Sakkaa Willa gideha! Ani amsi ibakii bariiyook ugawiib iignif andi.” idi. 6Aflaay Sakkaa winneet ashshigee igidehaayt, afirhaa barooh yꞌashish.
7Beet toona rhiyaan uudehay kassaah iikwiyaaniit, “Danuubi taki geeb amnaab iiktiyi jillaay giigiya.” idiin.
8Laakiin Sakkaa ingadaayt, Wꞌankwanaay dehaay, “Wꞌankwanaay, shibiba! Ani oomraay wꞌabariyeeb itarab oodehay yhamraab aniiw, aree gaalnaay han gwisree mhallagaab ahaab akatiyeek, baliin imhallagaayeeh fadhig haddiina dehaay ikwaas andi.” idi.
9Yasuuꞌa bariiyooh dehaay, “Uun uutak han Ibraahiimi ooruuyt, amsi umidhhan oon oogawii dehaay yꞌaabi. 10Wꞌaadami Oor oodehay ikwidhaab hariwtiit ishidhhiini jillaay yꞌaabi.” idi.
Ikishiya Itamni Mitaal
11Baraah een ibhali sinaakiree, Yasuuꞌa bareeh mitaal dehaay hadiidiya. Baruuh Algudus idwilayt, uudehay Ukwaasanaayt tehadꞌaayi gaalhoob lawtiyeeb hiisiyaan. 12Yasuuꞌa “Amiir gaal sagi haash beeti iibaabiya. Baruuh beentooy hadꞌaab akeetiit malya itꞌigireet toona yhiriw. 13Aflaay baruuh ikishiyaayeesooh tamin waliikiyaayt, bareeh tamin dimꞌaraay mhallaga yhii. Baruuh bareeyooh dehaay, ‘Een imhallaga ani atꞌagiireeb hadiit haay tijirna.’ idi.
14Laakiin whaashiyuuh dehay barooh iribniit bariiyooh harꞌii diigwatkinaab ifdigna, ‘Uun uutak hadꞌaayoon ikatiyeet kinhariw.’ idiin.
15Baruuh hadꞌaab ikaayt yꞌagar. Malya baliib ikishiyaayeeh imhallaga hiiyyaab iiktiyeeb waliikisiyaayt, imhallagaayeehna naan haay rayiimiyaaneeb kanaant yhariw.
16Wꞌawwali eeyaayt, ‘Duuruun, ani imhallagaayeek tamin doora haddi mhallaga haay rayiiman.’ idi.
17Whadꞌa ‘Daayiib tiweera, baruuk daayi kishiyaawwa! Shalik naatii usidkook rhista akay, tamint madiinaati waali iikti tindiya.’ idi.
18Ukishiya umalya eeyaayt, ‘Duuruun! Imhallagaayeek ay doora haddi mhallaga haay rayiiman.’ idi.
19Whadꞌa ‘Baruuk han ayt madiinaati waali iikti tindiya.’ idi.
20Malya kishiya weer eeyaayt, ‘Duuruun! Imhallagaayaak tooy eefeen. Ani halakiit fardaatiib adbi. 21Baruuk akra takwa akay, ani arkwi hook. Baruuk araawiitook harriiwa, abiiyeek teeraayaab bitkaayi harru tinwiika.’ idi.
22Whadꞌa bariiyooh dehaay, ‘Baruuk ukishiya wꞌamaag! Ibhaliyeek iknaayee haakami hook andi. Ani akra tak akatiyeet toona baruuk tiktiina, araawiitu aharriiweet toona tiktiina, teeraayaab baakaayeet dirꞌa anwiikeet toona tiktiina. 23Aflaay aniib imhallaga naanhooy ubankiib daasaab kittaa? Shaawti ani itꞌigirihoob, imhallagaayi maksab hooy imiir.’ idi.
24Malya baruuh beentooy ingid oodehayii dehaay, ‘Barooh idimꞌaraay mhallaga hooy ahaanaat, imhallaga itamin ibariib ootak hiina!’ idi.
25Baraah ‘Duuruun! Laakiin baruuh tamin mhallaga ibari.’ idiin.
26Whadꞌa igwibi, ‘Ani andi hookna, uutak wꞌibariib gwidaana ittiyiw indi, laakiin beeb naat baabariib, tuuna tꞌibariyeet han hooy yakami tindi. 27Laakiin aniib yꞌashu baliib ani hadꞌaayoohna iiktiyeet toona iirib, bareeh tooy haay mꞌaana. Aree bareeh anii suurii daarna.’ idi.” Yasuuꞌa idi.
Yasuuꞌa Algudus Ansiramaa Shuumiya
28Yasuuꞌa een ibhali idiit harꞌii, bareeyooh suurii Algudus beeti asti hasamiya. 29Baruuh ukanbuul Isaytuuni Riba ittiyoodiinaay kehii iifiint timadiina Beetfaageewwa Beetaanyaawwa idwilhoob, Yasuuꞌa ikwiriyaatayee maloob diigwatiya. Bareeyooh dehaay, 30“Beet tugariya suurookna teefeet beenaat, batooh shuumteenihoob, halkwiib hakwaar, oonaay suurii tak amaab biikaayeeb timeerna. Barooh fidignaat tooy haay mꞌaana! 31Gaal raatiiniyuukna, ‘Naanhooy whalkwi tifadigna?’ indiyuukna, barooh sooyaana, ‘Wꞌankwana yhariw’ diina!” idi.
32Baliin ikwiriyaatay imalu giigiyaanihoob, Yasuuꞌa bareeh sooyaab iiktiyeet toonaatiit imriin. 33Baraah whalkwi fidgee, yꞌankwanaayaah eeyaaniit bareeh raatiyaana, “Whalkwi naanhooy tifadigna?” idiin.
34Ikwiriyaatay igwibiina, “Barooh Wꞌankwana dehaay ishinha.” idiin.
35Malya whalkwi Yasuuꞌii dehaay haay eeyaaniit, yhalakaayeehna kehii daasiyaaniit, Yasuuꞌaab isꞌamna. 36Baruuh sakee, uudehay yhalakaayeehna usalaliib ibrirna.
37Yasuuꞌa Algudus idwili mhiin, oorba Saytuunii tikwiib usalaliib, kasteeh timꞌuujisa tirhiyaaneenaati sabbii Ikwiriyaatay kassaah tageega hisaayee Ukwaasana yhamidna:
38“Wꞌankwanaay simii yꞌiiniib whadꞌa been baarakamaabu!
Umꞌasig tibreeteeb aree umatuun Ukwaasanaayu.” iidna.
39Laakiin udehayiib Fariisi gali Yasuuꞌii dehaay, “Seedna, ikwiriyaatayeek dininaa.” idiin.
40Yasuuꞌa igwibi, “Ani andi hookna, aan baraah dineeneek han, yꞌawi waliiki iyadna.” idi.
41Yasuuꞌa Algudus idwilaayt, tumadiina rhiyihoob, batiiyooh dehaay waawiya. 42Baruuh “Baabiya, batuuk han oon amsi umꞌasig haay eetniit toona toobhaat kanaat tiiktiyi! Laakiin beet tuuna hook kwabaasti. 43Damaan yꞌi hook indi, yꞌashooyaak kirraab kehook kwililti shagaami iyadna, itkwilil hook iyadna, aree kasteeh tijhaatee assi hook iyadna. 44Tubuuti kehii dhibsi hook iyadna, kasseeh udehayook ikirraayeek tehooyteeb eefeen idaar iyadna. Baraah taktaki kehii aweeb han kehook iiyꞌish kiidiin. Ukwaasana batook ishidhhin miyaadiib yꞌaab iiktiyeeb udamaan kanaat kittaayayt, beet tuuna iikti tindi.” idi.
Yasuuꞌa Ukwaasanaay Ugawiib
45Malya Yasuuꞌa udiini gaw shuumiyaayt, oodehay ibꞌiishraayiin mhaltiib badooya. 46Yasuuꞌa, “Aan ibhali uktaabiib kataba, ‘Ugawu siileelti gawu, ibꞌiishraati mhiin kiiki.’ diyaabu, laakiin baraakna igwiharaay amar tikwaasna.” idi.
47Bꞌeebka Yasuuꞌa Ukwaasanaay gawiib allami. Ifagiiriya isuurkinaawwa, whaggi koojaawwa, oodehayi suurkinaawwa Yasuuꞌi madar yhariwna. 48Uudehay kassaah barooh akraab isniikarneet yhiriwnayt, bariiyeeh imadar adgiraab kiikeen.
Currently Selected:
Luugaay W'injiil 19: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
