Yuuhannaay 9
9
Yasuuꞌa Hamashay Tak Mheeliya
1Yasuuꞌa oodꞌooh hiireeree, tak ifrayeekka hamashay rhiya. 2Ikwiriyaatayaah barooh raatiyaana, “Seedna, aay danuub oon ootak hamashay akay isfarna? Barooh ooknaay danuub ikatiin han ifarooyeeba?” idiin.
3Yasuuꞌa “Bariiyuuh whamashi bariiyeeh idanuub tari ifarooyi danuub naat han shaawaab kiiki. Ukwaasanaay akriri shaga bariiyooh rhameeni sabbii baruuh hamasheeyaabi. 4Aflaay masi bꞌeebuuyt, beeb aneeb diigwatiyaanaay ishaga ibakii nidꞌeet toonaati. Whawaad ikatiyihoob, gaal han shagaamtiib kaꞌadgiriya. 5Ani tuduniyaatiib ahayeeb ookiik, ani tuduniyaati nuur akati.” idi.
6Yasuuꞌa een ibhali idiit harꞌii, whaashiib siil tifiyaayt, eesiil whaashiib yhathik. Malya oothiin ootaki gwꞌadeeb idꞌi. 7Malya Yasuuꞌa bariiyooh dehaay, “Difaat, Silwaami hoodhiib ifiireek shigwidha!” idi. Silwaam aree “Diigwatamaab” miyaadi. Aflaay uutak idifaayt ifiireeh ishigwidh, aflaay rhee yꞌagar.
8Ishawwaahwa baliin suur barooh nꞌalee rhiyaan uudehaywa raatiyaana, “Uun baruuh sꞌatiitka karaamaat iinꞌal ootak kiiki han?” idiin. 9Gwadi aree been baruuh unꞌaliiga ookna ikatiyeet toona hadiidiyaan.
Wari aree “Barooh kiiki, laakiin barooh tꞌiiteebi.” idiin.
Aflaay uutak uukna, “Ani been ootak akati.” idi.
10Baraah barooh raatiyaana, “Oontꞌa baruuk kak rhitniya?” idiin.
11Baruuh igwibi, “Uutak Yasuuꞌaab ittiyoodi thiin yhathikaayt, igwꞌadeeyi kehii idꞌi. Malya Silwaam ookiik difiit ifiiri ashangwiidheet toona sooyaheeb. Aflaay adifaayt willa ifiiri ashgwidhihoob irhiti adgiran.” idi.
12Uudehay barooh raatiyaana, “Baruuh naad eefi?” idiin.
Baruuh “Kaakan.” idi.
Ifariisi Imheeltiib Raatiyaan
13Uudehay been ootak suur hamasheeya iifiib Ifariisi haay ibeen. 14Yasuuꞌa oothiin yhathikaayt been whamashay hooy mheeliyaneet tuuyin sabtu. 15Aflaay Ifariisi ootak kak mheelamiyaayt rhiyaneeb masi raatiyaan. Uutak igwibi, “Igwꞌadeeyi kehii thiin idꞌi, ifiiri ashgwidh, oontꞌa aflaay irhiti adgiran.” idi.
16Ifariisiyee gali, “Uutak oon ushaga daayaab Ukwaasanaay kiiki, toosabti gaanuun sinaakiraab kiiki.” idiin.
Laakiin wari raatiyaana, “Tak maagnaaytikina kak bak tꞌiiteet mꞌuujisa ikwasi?” idiin. Aflaay baraah malu mhiin yꞌadhadhna.
17Ifariisi ootak masi raatiyaana, “Baruuk uutak whamashi hooy mheeliya hook tindiya, daayiitu, oon ootakiib naan tindiya?” idiin.
Uutak igwibi, “Baruuh nabiibi.” idi.
18Iyahuudi ootaki farooyee dehaay diigwatiyaaneeb hadiit, uun uutak suur hamashay iiktiyeet toonaawwa, oontꞌa rhiiniyeet toonaawwa aamanaab kiikeen. 19Baraah ootaki faru sakanaayaana, “Uun baruuh oorookna? Baruuh whamashi haay faraayu tiyadna. Aflaay baruuh oontꞌa kak rhiini?” idiin.
20Ifaru “Baruuh ooroon ikatiyeet toona nikteen, whamashi aree haay faraay ikatiyeet toona nikteen. 21Laakiin oontꞌa baruuh kak irhiti adgiriyaneet toona kinkan. Whamashi aree aaw hooy mheeliyaneeb kinkan. Barooh raataana. Shaawti baruuh win taku, aree baruuh uukna infariid hookna.” idiin. 22Ifarooyaah een ibhali haay iidneeb usabab, baraah Iyahuudii iriikwna. Iyahuudi Yasuuꞌa Umasiihu indiibka Iyahuudi diini gawii isaakw iyadneet toona oodehay suur sooyaaba. 23Toona toonaati sabbii aree ifarooyaah, “Baruuh shaawti win taku, barooh raataana!” idiin.
24Ifariisi ootak whamashi haay faraay tꞌa han malya door waliikiyaaniit, “Oosdik hadiidtiniyeet toona Ukwaasanaay suurii halafooya! Uun uutak barook mheeliyaab amaag tak ikatiyeet toona nikteen.” idiin.
25Uutak igwibi, “Baruuh amaag tak ikatiyeeb biikaayeeb ani kaakan. Gaana daayiib akteen: ani suur hamashayu oontꞌa aree rhani.” idi.
26Malya baraah barooh raatiyaana, “Naan dehook idꞌi? Kak aree whamashi hooy mheeliya hook?” idiin.
27Uutak igwibi, “Suur akay sooyan hookna, laakiin sinaakraab kitteena. Oontꞌa masi naan teemsiiwneet toona tehariwna? Baraak han tari bariiyeeh kwiriyaatay tikatiineet toona tehariwna han?” idi.
28Malya Ifariisi ootak neewiyaana, “Baruuk been ootaki kwiriyaataayi tikatiya, laakiin hinin Muusaay kwiriyaataya. 29Ukwaasana Muusaab bhaliisamiyaneet toona nikteen. Been uutak laakiin keeya mhiinii yꞌaab ikatiyeeb han kinkan!” idiin.
30Uutak “Tuun winneet girbaanaatu! Baraak baruuh keeya mhiinii ikatiyeeb kitkanna, laakiin aneeb whamashi hooy mheeliyaheeb! 31Ukwaasana amaag dehay biisinaakiireet toona nikteen. Baruuh oodehay barooh hamooyseenwa, baruuh yharriiweet toona faayseenwa isnaakiir. 32Whamashi haay faraay tak mheelamiya iidneeb gaal han maasiwaab kiiki. 33Uun uutak Ukwaasanaay yꞌaab biikaayeek, naat han iidꞌeet toona kaꞌadgiriya.” idi.
34Baraah ootakii dehaay, “Baruuk maagnaaytiib faraaywa, oontꞌa aree hinin allamtiniya han?” idiin. Malya ootak Iyahuudi diini gawii iskwiin.
35Yasuuꞌa Ifariisi oon ootak Iyahuudi diini gawii ifirꞌaneet toona imaasiwihoob, ootak imriit raatiya, “Wꞌaadami Oor aamantiniya?” idi.
36Uutak “Seedna, baruuh aabu? Sooyaaheeb, aflaay barooh aamani andi.” idi.
37Yasuuꞌa bariiyooh dehaay, “Baruuk suur akay barooh rhita, oontꞌa geebook hadiidiiniibi.” idi.
38Uutak “Wꞌankwanaay, aamanani.” idiit Yasuuꞌii dehaay asjidiya.
39Yasuuꞌa “Toon tuduniya haakamti jillaay yꞌaabuuyt, aflaay whamashay rhi indi, aree baliin suur rhiin aree hamasheeyi iyadna.” idi.
40Beentooy Fariisi gwadi bariiyooh geeb iifiin, een ibhali imaasiwniit barooh raatiyaana, “Naan? Hinin hamashayaab han?” idiin.
41Yasuuꞌa “Baraak hamashayaab tiiktiineek, maagtikina kitꞌakeena. Laakiin irhiti adgirnay tiyadna sabbii, masi baraak maagti kinaabaana.” idi.
Currently Selected:
Yuuhannaay 9: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
