Yuuhannaay 10
10
Ushakwaawwa Ureewoohwa
1Yasuuꞌa “Oosdik andi hookna: tꞌanooti kaleeb udheefaay shuumaab baakaay uutak, laakiin weer darii shuumiiniib gwiharaabu aree maraayanaabi. 2Uutak udheefaay shuumiiniib baruuh tꞌanooti shakwa ikati. 3Udheefaay gwꞌaadiiga bariiyooh dehaay udheefa fandiig, aree tꞌanu han bariiyooh whiss eemsiiwna. Baruuh tꞌanooteeh gaatka simiisooh waliikiit bateeh dabaamiini. 4Baruuh tꞌanu isfarꞌihoob, bateeh suuriimiini, aree tꞌanu whissooh ikteennayt, bariiyooh harꞌii sakeen. 5Laakiin tꞌanu weer taki harꞌii kasakiyaan. Oon barooh whissooh kiikannayt, bariisooh fidnaab dhaabeen.” idi.
6Yasuuꞌa een eemtaal bareeh sooya. Laakiin baruuh naan haay isehiriweeb kanaab kiikeen.
7Aflaay Yasuuꞌa masi, “Oosdik andi hookna: ani tꞌanooti dheefa akati. 8Anii hankaay yꞌaab baliin kassaah gwiharaawwa maraayanaawwa ikatiin. Laakiin tꞌanu bareeh sinaakraat kiikeen. 9Ani udheefa akati, anii geebii shuumiiniibka iidhhan indi. Baruuh anii shuumi indi, aree anii itfirꞌa indi, aree mꞌariit imaar indi. 10Ugwihara gwihartwa, madarwa, kwidhsitiiwwa harwee oobhaat yꞌiini. Baraak midhhan - timmiima midhhan timeerni jillaay ani yꞌaabi.
11Ani ushakwa udaayiib akati. Ushakwa udaayi tꞌanooti jillaay iyaayiibi. 12Ukiraayi tak shakwaab baakaaywa, tꞌanooti kina baakaaywa, bꞌashoot yꞌee rhiiniyihoob, tꞌanu ishtiit dhaabi iniin. Malya tubꞌashu tꞌanu tataftini, bateeh birirti danꞌi. 13Ukiraay kina kiraayii shaakwaabuuyt tꞌanu ishtiit dhaabiini aree tꞌanooteeb kiihalag.
14Ani fagar shakwa akati, tꞌanooti akteen, tꞌanooti han ikteennaheeb. 15Oontꞌaaneet, Ubaaba aneeb ikteeniyeet toonaatiit, ani han Ubaaba akteen. Aree ani tꞌanooti jillaay ayaayi. 16Oon tꞌanooti kaleebiib baahaayiit anoot warit abari. Ibakii bateeh han haay yꞌi andi. Bataah han aniib whiss isniikar iyadna, aree beentooy gaal reewwa gaal shakwaawwa daayi iyadna. 17Ani umidhhanu aniiwayt, Baabu aneeb areeyiini. Malya aree masi agarti umidhhan nuunami andi. 18Aniib umidhhan iniin gaal han kiihaay. Ani uknaayiitu fadaagt niyaatii aniiw. Ani barooh aniiwee dehaay hag abari, aree barooh aniinee dehaay han hag abari. Toon toonaati dꞌuuy aree Baabu waseeyaheeb.” idi.
19Tꞌa han masi een ibhaliyi sabbii Iyahuudi malu mhiin yꞌadhadhna. 20Gwida bareesooh, “Jin hooy eefeen! Haalayu! Naanhooy tisnaakiirna?” idiin.
21Laakiin wari aree, “Jin hooy eefeeni tak bak kahadiidiya! Aajin kak hamashay dehay rhiseen?” idiin.
Iyahuudi Yasuuꞌaab Iribna
22Wiyaay door, udiini gawi iidiib Alguduseeb iidsamiin. 23Suleemaaniib oogaw oowin iidneenaay Ukwaasanaay gawiib Yasuuꞌa hiireeri. 24Uudehay barooh ikwilalni immarraayniit raatiyaana, “Naadoor ookiik baruuk tisoogiim hoon? Oosdik unagweegwi sooyaa hoon, baruuk Umasiihwa?” idiin.
25Yasuuꞌa “Ani suur akay sooyan hookna, laakiin aamanaab kitteen. Baabiyu oosmii sakaniyeet timꞌuujisa anii dehaay ibadehana. 26Laakiin baraak aniit anu kitteenayt kaꞌaamantaana. 27Aniit tꞌanu whissu isnaakiirna. Ani bateeh akteen, aree bataah eetriimnaheeb. 28Ani bateeh umidhhan udaayim aniiw, door han aree kwidhi kiidiin. Aree gaal han bateeh hoosu tafi kiidi. 29Baabu aneeb yhiiyyeet tuuna naatiika gwidaakaati. Bateeh Baabiyu wꞌayii taftiib gaal han kaꞌadgiriya. 30Aneebwa Ubaabaawwa gala.” idi.
31Malya Iyahuudi masi barooh geediini jillaay aweeb tatafiyaan. 32Laakiin Yasuuꞌa bareeyooh dehaay, “Ubaabaay ikatiint gwidaat wawint mꞌuujisa rhisan hookna. Teen bateesooh keetaanaati sabbii geedteenheeb?” idi.
33Baraah “Teen bateesooh gaanaati sabbii han kageedna hook. Laakiin ookfuuri sabbii geednay hook. Baruuk aadamiib oobhaatwa, laakiin ugarooyook Kwaasanaab tikwasiya!” idiin.
34Yasuuꞌa “Whaggiyookna kataabtu, Ukwaasana ‘Baraakna kwaasanaabaana adi hookna.’ diyaabi. 35Aaktab diyaab ikatiineet toona diimaab sidik tikatiyeet toona nikteen. Ukwaasana aree been oodehay tudiigwattuuh tittiyeewaayeeb ‘kwaasanaab’ isim. 36Aneeb Ubaaba waasiyaheeb, malya tuduniyaatii dehaay ifdigheeb. Aflaay baraak been kifuuru kak tiyadna? Ani Ukwaasanaay Ooru adiyeet toonaati sabbii han? 37Aflaay Baabu sakiiniyeet teena baadꞌiyeek, baaꞌaamanaanaheeb. 38Laakiin bateeh sakaniyeek, baraak aneeb bitꞌaamanayneek han, timꞌuujisa aamanaana. Malya baraak Ubaaba aniib eefiyeet toonaawwa, ani Ubaabaay eefiyeet toonaawwa iikan tiyadna.” idi. 39Baraah masi tꞌa han Yasuuꞌi abuuk jarrabiyaan. Laakiin baruuh bareeyeeh yꞌayee ifrꞌa iyhi.
40Yasuuꞌa masi Urduni bhar ikitꞌa, been oomhiin Yuuhanna suur hooy iimseeb ookiik yꞌagar. Aree beentooy isꞌa. 41Gwida dehay bariiyooh dehaay eeyaaniit, “Yuuhanna mꞌuujisaat kwaasaab kiiki. Laakiin oon ootakiib iideenaaka kastuuh sidik tiki.” idiin. 42Aree beentooy gwida dehay barooh aamaniyaan.
Currently Selected:
Yuuhannaay 10: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
