Yuuhannaay 8
8
Takat Haraam Sakee Tꞌabak
1Yasuuꞌa laakiin oorba saytuun reewiya. 2Tooyin tooraaw karuumaab, Ukwaasanaay gaw beeti yꞌagar. Kassaah uudehay barooh ikwilalniit isꞌana, aree baruuh nꞌati isꞌat oodehay allamiya. 3Whaggi koojaawwa Ifariisiiwwa takat jikuuniib imriiniit yꞌabikniit haay eeyaan. Batooh kasseeh oodehayi suurii isingadna. 4Baraah Yasuuꞌii dehaay, “Seedna, toon tootakat jikuun sakee nꞌabik. 5Hineeb whaggiib Muusa, ‘Bak tꞌiiteet tootakat tooyat ookiik rajamooyaana.’ diyaabi. Oontꞌa baruuk naan tindiya?” idiin. 6Baraah een ibhali sharak Yasuuꞌiit sꞌabkooyt haay isehiriwna.
Laakiin Yasuuꞌa nꞌati kuuramiyaayt tugiibalaaytiisooh whaashi kehii iktib. 7Baraah ingadniit barooh raatiyaanihoob, baruuh ikuuramtii ifidhadhaayt, “Bareesookna door han maagnaayt gwibbaab baakaay uutak, hankaab wꞌawi batooh haay baꞌiigid.” idi. 8Malya Yasuuꞌa masi whaashi kehii kuuramiyaayt iktib.
9Baraah een ibhali imaasiwnihoob, kassaah gaal gaalnaay giigiyaan. Yꞌeegrima yꞌadhamiinaayi hankaay ifrꞌana. Yasuuꞌa oodꞌooh imhi, tutakat han beentooy masi tingid. 10Yasuuꞌa ifidhadh ingadaayt batiiyooh dehaay, “Baraah naad ibeena? Batook atehimiini gaal kiihaay han?” idi.
11Tutakat “Seednaay, gaal han kiihaay.” tidi.
Yasuuꞌa “Aflaay daayiitu, ani han atehimi hook kaadi. Shaawti difii, weer door maagnaayt biishagaamii.” idi.
Yasuuꞌa Tuduniyaati Nuur
12Yasuuꞌa masi Ifariisi infaraadiit, “Ani tuduniyaati nuuru, aneeb eetriimka midhhani nuur imaar indi, door han aree thibniib hiireeri kiidi.” idi.
13Ifariisi bariiyooh dehaay, “Oontꞌa baruuk ugarooyook kehii badehaat tikwasiya, baruuk tindiyeet aree sidik kitti.” idiin.
14Yasuuꞌa “Abadan, ani ugarooyu kehii badehaat akwasiyeek han, ani andiyeet tuuna sidiku. Ani hooy yꞌaab akatiyeeb oomhiin aree akteen, naaysooh eebiyeeb aree akteen. Baraak ani keeya mhiinii yꞌaab akatiyeeb tari nhooh eebiyeeb kitkanna. 15Baraak wꞌaadami salalii oodehay tehakimna, ani laakiin gaal han haakami kaadi. 16Laakiin ani bak weeri iideek, whukwimu sidik iikti. Ani oonaay oodꞌu kaaki, aneeb diigwatiyaab Ubaaba geebu eefi. 17Tuun batuuh bareek whaggiyookna kataabtu, malu badehi taafagsameenihoob, tibadeha sidik ikatiin. 18Aflaay ani ugarooyu dehaay badehiib akati, Ubaaba aneeb diigwatiyaab han anii dehaay badehiib ikati.” idi.
19Malya baraah barooh raatiyaana, “Baabuuk naad eefi?” idiin.
Yasuuꞌa “Aneeb kitkanna, Baabu han kitkanna. Aneeb tiktiinneek, Baabu han tiktiinna.” idi.
20Yasuuꞌa Ukwaasanaay gawiib allamee, umiyaawi sanduuk daasamaab iiktiyeeb ugawiib een ibhali kasseeh hadiidiya. Udooruuh masi yꞌaab kiikuuyt, gaal han barooh abkaab kiiki.
21Masi Yasuuꞌa bareeyooh dehaay, “Ani fidnaab giigi andi, aree baraak aneeb hiriw tiyadna, laakiin tumaagtiisookna iiyyi tiyadna. Ani eebiyeeb oomhiin baraak oogiig kaꞌadgirtaana.” idi.
22Iyahuudi raatiyaana, “Baruuh eebiyeeb oomhiin hinin kinbi indi hoon. Een ibhali ugarooyooh madar haay isehariiw han?” idiin.
23Yasuuꞌa “Baraakna toon tuduniya tooy whii teefeenaatiib tikatiina, ani laakiin mhakwaliisii yꞌaabi. Baraakna toon tuduniyaatii tikatiina, ani laakiin toon tuduniyaatii kaaki. 24Toon toonaatii dehaay, ‘Tumaagtiisookna iiyyi tiyadna.’ adi hookna. Ani aab akatiyeeb aree aamantiina bitdiineek, tumaagtiisookna iiyyi tiyadna.” idi.
25Baraah barooh raatiyaana, “Baruuk aabwa?” idiin.
Yasuuꞌa “Suur idabaay sooyaneetookna toonaati. 26Ani gwidaana hookna andiyeet abari, gwidaana aree bareek haay atehimani. Aneeb diigwatiyaab laakiin sidkiibi. Ani bariisooh maasiwaab akatiyeet toona toobhaat oodehay sooyani.” idi.
27Laakiin baraah baruuh Ubaabaay hadiidiyeet toona afhamaab kiikeen. 28Aflaay Yasuuꞌa bareeyooh dehaay, “Baraak Wꞌaadami Oor asti yaksiteenihoob, ani aab akatiyeeb iikan tiyadna. Malya aneeb uknaayiitu hadꞌaayeetii naat han baadꞌiyeet toona iikan tiyadna. Laakiin Ubaaba sooyiiniyeetu toona toobhaat andiyeet toona iikan tiyadna. 29Aneeb diigwatiyaab geebu eefi. Ani diimaab barooh afirhistiniit toona sakani akay, baruuh han aneeb oodꞌu ishaayu kiiki.” idi. 30Gwida dehay Yasuuꞌa een ibhali diyee imaasiw, barooh aamaniyaan.
Ibraahimi Ar
31Yasuuꞌa baliib barooh aamaniyaan Iyahuudee dehaay, “Aniib utꞌaliim tisnaakiirneek, sidik anii kwiriyaatay iikti tiyadna. 32Malya oosdik iikan tiyadna, uusdik aree iifdig hookna indi.” idi.
33Baraah bariiyooh dehaay igwibiina, “Hinin Ibraahiimi ara, gaalnaay whii door han kishiyaamaab kinki. Aflaay ‘Itfidig tiyadna’ oomiyaad naan haay tisehariiwa?” idiin.
34Yasuuꞌa bareeyooh dehaay, “Oosdik andi hookna: Maagnaayt gwanbiibka toomaagti kishiya ikati. 35Ukishiya diimaab eedhiweeb kadaaya, laakiin wꞌoor diimaab indhiwaayi oor ikati. 36Wꞌoor fandiiguukna, sidik itfidig tiyadna. 37Baraak Ibraahiimi ar tikatiineet toona akteen. Aniib utꞌaliim agbilaab kittaanayt, baraak aneeb madar tehariwna. 38Ani Baabu rhisiyaneetu toonaatiib hadiidani, laakiin baraak han baabuukna sooyaneetookna toona shagaamteena.” idi.
39Baraah “Baabuun Ibraahiimu,” idiin.
Yasuuꞌa igwibi, “Sidik Ibraahiimi ar tiiktiineek, baabuukna iidꞌeet teena saktiina. 40Laakiin ani Ukwaasanaay amaasiweeb usidki sabbii baraak aneeb madar tehariwna. Ibraahiim bak tꞌiiteena sakaab kiiki. 41Baraak baabuukna uukna sakiiniyeet toona sakteena.” idi.
Baraah “Hinin haraami ar kinki. Ubaaba oongaal hinin nibariyi Ukwaasana ookna ikati.” idiin.
42Yasuuꞌa bareeyooh dehaay, “Ukwaasana sidik Baabookna iiktiyeek, aneeb areetiina. Ani Ukwaasana diigwatiyaheeb, oontꞌa aree tooy eefi. Ani uknaayiitu hadꞌaayeetii yꞌaab kaaki, laakiin baruuh diigwatiyaheeb.
43Ani andiyeet toona naanhooy kaꞌafhamtaana? Tuun tuuna aree baraak aniit tudiigwatti maaswi bitehariiwneet toona rhistini. 44Baraak baabiyeekna ar tikatiina, baabookna oobliis, baruuh yharriiweet toona aree saktiib tehariwna. Bariiyooh sidik kiihaay, baruuh whankaay madooru, door han usidki dar kiingad. Gwisir hadiidiiniyihoob, ibhaliyeeh eekna hadiidiini. Baruuh gwisreebuuyt, aree igwisri baaba ikati. 45Laakiin ani oosdik andi hooknayt, baraak aamanaab kitteenaheeb. 46Bareesookna aneeb maagnaayti gwabab isꞌabiik aabu? Ani oosdik andiyeek, naanhooy kaꞌaamantaanaheeb? 47Ukwaasanaay yꞌaab ikatiib been Ukwaasanaay bhali isnaakiir. Laakiin baraak Ukwaasanaay kitteena. Oon usabbii aree baraak isniikar kitdiina.” idi.
48Iyahuudi barooh raatiyaana, “Baruuk Saamiriibwa, jin hook eefeen niyadeet toonaatiib sidkiib kinki han?” idiin.
49Yasuuꞌa “Ani jin kaabari. Ani Baabu hamooysani, laakiin baraak aneeb kahamooysitaana. 50Ani uknaayu dehaay matuun kaahariw. Laakiin beet toona harriiw gaal eefi. Aree baruuh ugaadi ikati. 51Oosdik andi hookna: aniib ibhali isnaakiirka, door han tooyat rhi kiidi.” idi.
52Malya baraah bariiyooh dehaay, “Oontꞌa barook jin hook eefeeneet toona daayiib nikan. Ibraahiim iya, inabiya han iiyaan. Laakiin bariiyeek ibhali isnaakiirka, tooyat dꞌamsi kiidi tindiya. 53Baruuk baaboon Ibraahiimiika winkaabwa han? Baruuh iiya, inabiya han iiyaan. Baruuk ugarooyook aab hiistiniya?” idiin.
54Yasuuꞌa igwibi, “Ani ugarooyu asꞌaliyeek, been umꞌalaayi takweet kiibari. Baabu beeb baraak Ukwaasanaayookna tiyadneeb, aneeb hamooysiineeb barooh ookna ikati. 55Barooh door han kanaab kitteena, laakiin ani barooh akteen. Ani barooh kaakan iideek, shaawti bareek tꞌiiteeb gwisreeb iikti. Laakiin ani barooh akteen, ibhaliyeeh han asnaakiir. 56Baabuukna Ibraahiim aniib wꞌaayi damaan rhiyeet toona winneet hooy afirhaa iifi. Aflaay baruuh beet toona rhiyaayt afirhiya.” idi.
57Iyahuudi bariiyooh dehaay, “Baruuk ay tamuun hawla kitkitima, Ibraahiim kak rhita?” idiin.
58Yasuuꞌa igwibi, “Oosdik andi hookna: Ibraahiim faraay baakaay ani iifi.” idi. 59Malya baraah barooh geediini jillaay aweeb tatafiyaan. Laakiin Yasuuꞌa ikwibasaayt, Ukwaasanaay gawii yꞌish giigiya.
Currently Selected:
Yuuhannaay 8: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
