Yuuhannaay 7
7
Yasuuꞌaawwa Isanaayeehwa
1Oonaay harꞌii, Yasuuꞌa Jaliiliib hiirareeriya. Laakiin Iyahuudi suurkina Yahuudaay iifiin barooh madar yhiriwnayt, Yahuudaay fidnaab giig niyaamiya. 2Laakiin Iyahuudi wꞌiid Itikheemaati iidwilihoob, 3Yasuuꞌiib isana bariiyooh dehaay, “Oon whaashii giigaat Yahuudaab bayaa. Aflaay ikwiriyaatayaak baruuk tikwasiyeet timꞌuujisa rheen. 4Atookakinooyt yharriiw uutak, tishagaamiiniyi kiikwibis. Teen teena baruuk tikwasiyeet toona uudehay kassaah baꞌiktiin hook.” idiin. 5Isanaayaah aakna han barooh aamanaab kiikeen.
6Aflaay Yasuuꞌa bareeyooh dehaay, “Aniib uudoor masi yꞌaab kiiki. Laakiin bareekna kassuuh uudoor dehookna ishboobi. 7Kastuuh tuduniya kitrib hookna, laakiin bareeyaah isalala amag ikatiineet toona sooyaniyayt, baraah aneeb eeribna. 8Baraak wꞌiid beena, ani iibi kaadi. Aniib uudoor masi yꞌaab kiiki.” idi. 9Yasuuꞌa een ibhali idiit, Jaliileeb imhi.
Yasuuꞌa Tikheemaati Iidiib
10Isanaayaah wꞌiid ibeeniit harꞌii, Yasuuꞌa han giigiya. Laakiin gwꞌagwuuyt giigaab kiiki, kwibasee giigiya. 11Iyahuudi wꞌiidiib barooh yhiriwna. Baraah “Been uutak naad eefi?” iidna.
12Uudehay kassaah taktaki angwileeb bariiyooh hadiidiyaan. Gali “Uun baruuh daayi taku.” idiin.
Wari aree “Abadan, baruuh oodehay tanliis.” idiin. 13Laakiin baraah Iyahuudi iriikwnayt, gaal han gwꞌagwuuyt bariiyooh hadiidaab kiiki.
14Yasuuꞌa Ukwaasanaay gaw ibaayt allamiyihoob, aflaay wꞌiid mingidee dehaay tarabeema iifi. 15Iyahuudi winneet ajjabamiyaaniit raatiyaana, “Uun uutak agriiyaab baakaay kak naatka ikteen?” idiin.
16Yasuuꞌa “Ani allamaniyeet tuuna, aneeb uknaayu tꞌaliim kiiki. Laakiin Ukwaasana aneeb diigwatiyaanaay tꞌaliimi. 17Ukwaasana yharriiweet toonaati dꞌuuy harriiwka, ani allamaniyeet toona ani uknaayiitu tikatiyeeb tari Ukwaasanaay yꞌaat tikatiyeeb iikan indi. 18Uutak ooknaayt hadꞌaayeetii hadiidiiniib ugarooyooh dehaay matuun isehariiw. Laakiin barooh diigwatiyaanaay matuun yharriiw sidkiibi. Bariiyooh naat han galat kiihaay. 19Muusa whag yhii hookna, bak kiiki? Laakiin gaal han hookna whag sinaakiraab kiiki. Naanhooy anii madar tehariwna?” idi.
20Uudehay igwibiina, “Barook jin hook eefeena, aaw bariiyeek madar harriiw?” idiin.
21Yasuuꞌa bareeyooh dehaay, “Ani gaat mꞌuujisa akwaas, baraak kassaak aree ajjabamtaana. 22Muusa yꞌareeyookna kwishuub sooyi hookna. Ukwishuubi sooti Muusaay kiiki, laakiin hoobaakna badooyaan. Aflaay baraak yꞌar toosab tikwashibna. 23Yꞌar toosab itkwashiibneek, Muusaay whag katꞌa kiiki. Aflaay ani toosab tak daayiib mheelanayt, baraak naanhooy hoosu tehaseena? 24Shaawti tusaraad shibibtiit baahakimna, wꞌadlii aree hakimna.” idi.
Uun Baruuh Umasiih Ikati?
25Algudusi dehay gwadi, “Uun baruuh baraah madar yhariwneeb ootak kiiki han? 26Shibibna! Baruuh oodehayi suurii hadiidiini, aree baraah bariiyooh kehii kalmaat han diyaab kiikeen! Uun baruuh sidik Umasiih ikatiyeet toona ikanna han? 27Laakiin Umasiih yꞌiiniyeeb oodoor, baruuh naa mhiinii yꞌiiniyeeb gaal han iikan kiidi. Laakiin uun uutak keeya mhiinii yꞌiiniyeeb hinin kassaan nikteen.” idiin.
28Malya Yasuuꞌa masi Ukwaasanaay gawiib tageega hissii, “Sidik aneeb tikteenna? Ani keeya mhiinii akatiyeeb tikteenna? Ani uknaayiitu hadꞌaayeetii tooy yꞌaab kaaki. Laakiin been aneeb diigwatiyaab sidkiibu. Baraakna barooh kitkanna, 29laakiin ani bariisooh yꞌaabu aree baruuh diigwatiyaheeb akay, ani barooh akteen.” idi.
30Malya barooh kwilaltiit abuuk yhariwna, laakiin bariiyuuh uudoor masi yꞌaab kiikuuyt, gaal han bariiyooh kehii wꞌayooh daasaab kiiki. 31Laakiin gwida dehay oomhiin iifiin barooh aamaniyaan. Baraah “Umasiih yꞌiiniyihoob, oon ootakiika gwidaakaat mꞌuujisa iikwasi indi han?” idiin.
32Ifariisi uudehay taktaki angwileeb Yasuuꞌiib hadiidiyaaneeb ibhali imaasiwna. Baraahwa ifagiiriya isuurkinaawwa barooh yꞌibikni jillaay kajar gwadib diigwatiyaan.
33Yasuuꞌa bareeyooh dehaay, “Ani shalik door geebookna daayi andi, malya aneeb diigwatiyaab beeb beeti giigi andi. 34Baraak aneeb hiriw tiyadna, laakiin imaarheeb kitdiina. Ani eebiyeeb oomhiini mabay kaꞌadgirtaana.” idi.
35Iyahuudi taktakee dehaay, “Baruuh naaysooh niyaami indiyayt, hinin barooh nimaar kindi? Yoonaaneet timadiina udehayuun hooy kwarriyeet beeti diftiit, Iyoonaani allami indi han? 36Baruuh ‘Hiriwheeb tiyadna, laakiin imaarheeb kitdiina. Ani eebiyeeb oomhiini mabay kaꞌadgirtaana.’ indiyihoob een naan haay isehariiw?” idiin.
37Been wꞌiidi bꞌi wꞌaakhareeb, aree baruuh hooy daayika bꞌi ikati. Yasuuꞌa asti yakiyaayt tageega hissii, “Yaweebka anii dehaay mꞌaanaat gwꞌaana! 38Aneeb aamaniiniibka gwꞌaana! Uuktaab ‘Midhhan iyaw yami thaw bariisooh kwaaneen.’ diyaabi.” idi. 39Een ibhali barooh aamaneen uudehay malyaab imeerneeb Eeshuuk haay isehiriw. Yasuuꞌa umatuunii dehaay yakamaab kiikuuyt, been oodoor ookiik Aashuuk attiyeewiyaab kiikeen.
40Yasuuꞌaab een ibhali diyee imaasiw oodehayii gwadi, “Uun uutak sidik Unabi ikati!” idiin.
41Wari aree “Uun Umasiih ikati!” idiin.
Laakiin wari “Umasiih Jaliilee kak yꞌiini!” idiin. 42Uuktaab “Umasiih Whadꞌa Daawidiit tidirriyaaytii yꞌiini, Daawid hooy ikwiireet tumadiina Beetlahameeb aree itfari.” diyaabi. 43Yasuuꞌi sabbii aree uudehay yꞌadhadhna. 44Gwadi barooh abuuk yhariwna, laakiin gaal han wꞌayooh kehii daasaab kiiki.
Iyahuudi Suurkinaayi Wꞌiimaani Naaw
45Ikajar ifagiiriya isuurkinaawwa Ifariisiiwwa beeti yꞌagarnihoob, baraah raatamamiyaana, “Naanhooy barooh haay yꞌaab kitteena?” ittiyoodaayna.
46Ikajar igwibiina, “Oon ootakiit hadiidi tak han kiihaay!” idiin.
47Ifariisi “Bareekna han itlis hookna han? 48Isuurkinaayee tari Ifariisiyee gaal han barooh aamaniya? 49Uun uudehay Muusaay whag kiikanna, shaawti bareeh Ukwaasanaay wꞌaat kehii daayi indi.” idiin.
50Ifariisiyeeb gaal Niigoodiimoos iidni beentooy iifi. Been uutak suur Yasuuꞌi rheesamtiib giigaabi. Baruuh irawee dehaay, 51“Hineeb whaggiib ibhaliyeeh baasinaakiir gaal han gwabab kinsꞌabik. Baruuh gwibbaab ikatiyeet toona nishabib.” idi.
52Baraah igwibiina, “Baruuk han Jaliilee yꞌaabwa han? Eektab agriiya, nabiib Jaliilee yꞌiiniib biihaayeet toona iikan tindiya.” idiin.
53Malya gaalka ugawooh ookna ibi.
Currently Selected:
Yuuhannaay 7: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
