Yuuhannaay 17
17
Yasuuꞌa Ugarooyooh Dehaay Siileeliya
1Yasuuꞌa een ibhali idiit harꞌii, teebri ishbibaayt siileeliya:
“Baaba, tuusꞌa yꞌaatu, Wꞌoorook soowina, aflaay Wꞌoor han isoowiin hook. 2Baruuk barooh kassooh oodehayi kehii hadꞌaayeet tehiiyya. Aflaay baliib kasseeh baruuk barooh tehiiyyeeb aree bareeh umidhhan udaayim iniiw ikati. 3Umidhhan udaayim bariitook kanaant ikati. Ukwaasana usidkiib oongaal, masi ubaruuk diigwattaneeb Yasuuꞌaab Umasiihiit kanaant ikati. 4Ani toobuuti kehii umatuunook rhisan. Ushaga baruuk aneeb tehiiyyeeb faaysan. 5Baaba, tuduniya daamaat baakaay geebook iibriyeeb umatuun tꞌiiteena, oontꞌa han suurook soowinaheeb.
6Tuduniyaatiib eefeen baliib baruuk aneeb tehiiyyeeb bareeh asookin hook. Baraah bariiyeeka, aree bareeh tehiiyyaheeb. Baraah ibhaliyeek isnaakirna. 7Oontꞌa aree baraah kastooh toona baruuk tehiiyyeetu bariisook yꞌaat tikatiyeet toona ikteenna. 8Ani baruuk tehiiyyeetu tudiigwat askatim, baraah han agbiliyaan. Ani sidik bariisook yꞌaab akatiyeet toona ikteenna. Baruuk diigwataayu tikatiyeet toona han aamaniyaan. 9Ani bareeyooh dehaay siileelani. Tuduniyaati dehayii dehaay kasiileelan, laakiin baliib baruuk tehiiyyeeyu dehaay siileelani. Baraah bariiyeek ikatiin. 10Abariyeena kastuuh bariitooktu, aree baruuk tibariyeena kastuuh aniiti. Aniib umatuun aree bareesooh lawiini. 11Oontꞌa ani marook yꞌani, shaawti tuduniyaatiib daayi kaadi. Laakiin baraah tuduniyaatiib daayeen. Ubaaba Umugaddas! Oosmook wꞌakraab aneeb tehiiyyeenaay simii bareeh sꞌasiga. Aflaay baraah aniitwa bariitookwa gal ikatiin. 12Ani bareeyooh geeb iifiyi door, oosmook wꞌakraab been oosim aneeb tehiiyyeenaay bareeh asꞌasig aree agwꞌad. Ootak ookwidh yhayid nuun bareeh gaal han hooy kwidhaab kiiki. Shaawti uuktaab sidik ikati.
13Oontꞌa ani yꞌani hook, aree een ibhali ani masi tuduniyaatiib haayee hadiidani. Aflaay baraah timmiimaat aniit firha iginꞌaayeeb ibariin ikatiin. 14Tudiigwattook bareeh sooyan. Ani tuduniyaatii baakaayeet toonaatiit, baraah han tuduniyaatii kiikeenayt, uudehay bareeh iribna.
15Bareeh tuduniyaatii sifarꞌooyt hook kaahariw. Laakiin bareeh yꞌamag dehayii tisꞌasiigeet toona hook aharriiw. 16Ani tuduniyaatii baakaayeet toonaatiit, baraah han tuduniyaatiib kiikeen. 17Bareeh usidkii marook abika, ibhaliyaak sidika. 18Baruuk aneeb tuduniya beeti tifdigeenaayt, ani han bareeh tuduniya beeti afandiig. 19Bareeyooh jillaay aree ugarooyu nuunan. Aflaay baraah han sidik igarooyeehna barook nuuneen.
20Bareeh eebhatni jillaay dehook kasiileelan. Laakiin baliib bareetoohna tudiigwat maasiwtiit aneeb aamaneen han dehaay siileelani. 21Baraah gal ikatiini jillaay dehaay siileelani. Baaba! Baruuk aniib tehaya, ani bariiyook ahayeet toonaatiit, baraah han hoon daayeen ikatiin. Baraah gal ikatiin, shaawti uudehay aneeb baruuk diigwataayu tikatiyeet toona aamani iyadna. 22Baruuk tehiiyyeeyu umatuun beeb ani bareeh ahii. Aflaay baraah aniitwa bariitookwa gal ikatiin. 23Ani bareeyooh eefi aree baruuk aniib tehaya. Aflaay baraah han winneet gal ikatiin. Shaawti tuduniyaati dehay aneeb baruuk diigwataayu tikatiyeet toona iikan iyadna. Aneeb areetaneet toonaatiit bareeh han areetiniyeet toona iikan iyadna.
24Baaba, bareeh tehiiyyaheeb, ani daayaniyeeb oomhiin aree geebu daayeeneet toona aharriiw. Shaawti umatuun baruuk aneeb tehiiyyeeb, aniib umatuun rhi iyadna. Baruuk tuduniya kwaasaab baakaay areetaaheeb.
25Ubaaba Uushbu! Tuduniya bitkaanuuk han, laakiin ani akteen hook. Baruuk diigwataayu tikatiyeet toona han baraah ikteenna. 26Ani bareeh asookin hook, aree bak isuuririm andi. Shaawti anii dehaay tibariyeeb ooreer bareeyooh han daayiini. Aflaay ani han bareeyooh daayani.” idi.
Currently Selected:
Yuuhannaay 17: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
