Yuuhannaay 18
18
Yasuuꞌiit Tꞌabuuki
1Yasuuꞌa toon toosileel idiit harꞌii, abaat Gadaruun iidneet ookiik ikwiriyaatayi geeb giigiya. Been oomhiin aree dirꞌaat tiifi, Yasuuꞌaawwa ikwiriyaatayaahwa batooh shuumiyaan. 2Gwida doora Yasuuꞌa ikwiriyaatayeeh geeb beentooy ammarriyaabuuyt, Yahuuda itoolana beet tudirꞌaati mhiin iktiin. 3Aflaay Yahuuda tudirꞌa shuumiya. Roomaani kajar gwadibwa, ifagiiriya isuurkinaawwa Ifariisiiwwa fidgaab iiktiini udiini gawi gwꞌaadiiga gwadibwa geeb iifiin. Baraah nꞌeeti sigwidwa, faanuusaabwa, gadhꞌiiwwa yaksaaba.
4Yasuuꞌa toona dehaay iikti tiid kastooh whankaay iktiin. Aflaay bareeh beeti hantaayaayt, “Aab tehariwna?” idi.
5Baraah “Yasuuꞌaab Unaasiraayi” idiin.
Baruuh “Ani barooh akati.” idi. Yahuuda itoolana bareeyooh geeb beentooy ingid. 6Yasuuꞌa “Ani barooh akati.” idiyihoob, baraah harꞌa yꞌagarniit whaashi kehii dhibiyaan.
7Yasuuꞌa masi bareeh raatiya, “Baraakna aab tehariwna?” idi.
Baraah “Yasuuꞌaab Unaasiraayi” idiin.
8Yasuuꞌa “Ani barooh akatiyeet toona sooyan hookna. Aneeb tehariwneek aflaay een eenda eeraw giigsaana.” idi. 9Aflaay Yasuuꞌa diyaab iiktiyeet tuuna sidik tiiktiyi jillaay, baruuh een idi. Baruuh “Baaba! Een baruuk aneeb tehiiyyeeb gaal han hooy kwidhsaab kaaki.” diyaabi.
10Siimoon Bitrus bꞌadhadh iibri aree barooh ilꞌibaayt ufagiiri oowinnaay kishiyaay wꞌangwiil umaygwadiib hooy ikitꞌa. Been ukishiya Malkhus iidna.
11Yasuuꞌa Bitrusii dehaay, “Bꞌadhdhook umhiinooh shuumsa! Baabu hiiyyaayu ikatiyeeb tilhanayti kaas gwꞌi baadiyeeb hiistiniya han?” idi.
Yasuuꞌa Hannaasi Suurii
12Malya Iroomaani kajar daabtiisoohnaawwa, Yahuudi gwꞌaadiigaawwa Yasuuꞌaab yꞌabikna, aree barooh yhaakwirna. 13Barooh hankaab Hannaas haay ibeen. Hannaas Kayaafaasi ham iikti, been whawil aree ufagiiri oowin akay iifi. 14Kayaafaas Iyahuudi suurkina waseeyaab been barooh ikati, baruuh “Uun uutak uungaal kasseeh oodehayi jillaay iyaayyeet tuuna hanyiis.” diyaabi.
Bitrus Yasuuꞌaab Itwi
15Siimoon Bitruswa weer kwiriyaataayiiwwa Yasuuꞌaab iramna. Been ukwiriyaataayi uuraaw Ufagiiri uuwin barooh daayiib iktiin. Aflaay baruuh Yasuuꞌi geeb Ifagiiriyaayi suurkinaay gawi hoosh shuumiya. 16Laakiin Bitrus udheefaayt mifrꞌatiib ingad. Malya ukwiriyaataayi uuraaw been ufagiiri uuwin iktiineeb harꞌa ifirꞌaayt, udheefaay tiifiit oot bhaliisamiya. Malya Bitrus shuumisiya.
17Tꞌoor udheefaay tiifiit Bitrusii dehaay, “Baruuk been ootaki kwiriyaatayeeb gaalwa han?” tidi.
Bitrus “Abadan, ani kaaki.” idi.
18Uudoor mikwꞌaraabuuyt ikishiyaawwa ikajarwa nꞌeet talawsaa kwilalti gadaaba, aree toonꞌi iifishna. Bitrus han bareeh ibaayt geeb ingadaayt toonꞌi ifish.
Ifagiiriyaayi Suurkina Yasuuꞌaab Sakanaayiini
19Ufagiiri uuwin ikwiriyaataywa utꞌaliimiisoohwa Yasuuꞌaab sakanaaya.
20Yasuuꞌa “Ani diimaab oodehayi suurii hadiidan, aniib utꞌaliim kassuuh Iyahuudi diini gawiib iikti, tari Ukwaasanaay gawiib iikti. Aree uudehay kassaah beentooy itdibilna. Ani naat han kwibsaab kaaki. 21Aflaay naanhooy raattiniyaheeb? Oodehay aneeb imaasiw raata. Ani sooyaneet toona bareeh raata, ani adiyeet toona baraah ikteenna.” idi.
22Yasuuꞌa een ibhali idiyihoob, ikajaree gaal bariiyeeh eefiir iithꞌaayt, “Ufagiiri oowin kak bak tinfariida?” idi.
23Yasuuꞌa bariiyooh dehaay, “Ani naat han maagnaayt diyaab akatiyeek, batuuh naan tikatiyeeb oodehay kasseeh tooy eefeen sooyaa. Laakiin ani adiyeet tuuna sidik tikatiyeek, naanhooy tithꞌaheeb?” idi. 24Hannaas masi barooh amhakwira Kayaafaas ufagiiri oowin istoob.
Bitrus Masi Yasuuꞌaab Itwi
25Siimoon Bitrus masi beentooy ingid nꞌeet iifish. Aflaay dehay weer bariiyooh dehaay, “Baruuk been ootaki kwiriyaatayee gaal kittaa han?” idiin.
Laakiin Bitrus itwi, “Abadan, ani kaaki.” idi.
26Ufagiiri oowinnaay kishiyaayee gaal, Bitrus wꞌangwiil ikitꞌeeb ootaki ayaay tak iikti hadiidiya, “Tudirꞌaatiib bariiyooh geeb rhaayook kaaki han?” idi. 27Bitrus masi itwi, “Abadan” idi. Gaal door uujiik kuukillaaya.
Yasuuꞌa Biilaatoos Istoobna
28Fajir karuumaab Yasuuꞌaab Kayaafaasiib ugawii haay giigiyaaniit whaakimi gaw istoobna. Iyahuudi suurkina oogaw tehooy shuumaab kiikeen. Whasamti Wꞌiidiib mꞌariit tamiini jillaay, igarooyeehna sinhasooyt yhiriwna. 29Aflaay Biilaatoos ifirꞌaayt bareeh raatiya, “Oon ootak naan atehimaabaana?” idi.
30Baraah “Maagt gwibbaab biikaayeek tooy haay kaꞌeena hook.” idiin.
31Biilaatoos “Aflaay baraak abiiyaakna haay difnaat whaggiisookna haakamaana.” idi.
Iyahuudi igwibiina, “Hinin gaal han nideereet toona hag kinbari.” idiin. 32Tuun haay tiiktiyeeb usabab, Yasuuꞌiib ibhali sidik iiktiineet toonaatu, ibhali baruuh tuyattooh tuyaayi iideet mitiyaayihoob diyaab iiktiyeeba.
33Biilaatoos oogaw yꞌagaraayt shuumiya, aree Yasuuꞌaab waliikiya. Malya “Baruuk Iyahuudi hadꞌaabwa han?” idi.
34Yasuuꞌa “Tuun tuuraat bariisook tikati han tari wari anii naat sooyaan hook?” idi.
35Biilaatoos bariiyooh dehaay, “Aneeb Yahuudiib hiistiniyaheeb han? Aan barook aneeb nuuneen uudehaywa ifagiiriya isuurkinaawwa bariiyeek dehaya. Naan gwibbaabwa?” idi.
36Yasuuꞌa “Aniit tehadꞌaayi toon tuduniyaatiit kitti. Aniit tehadꞌaayi toon tuduniyaatiit tiiktiyeek, aniib yꞌaamanana Iyahuudi suurkina finaayiinka kiisꞌabiknaheeb. Abadan, aniit tehadꞌaayi tooyeet kitti.” idi.
37Biilaatoos barooh raatiya, “Aflaay baruuk hadꞌaabwa han?” idi.
Yasuuꞌa “Baruuk ani hadꞌaabu tindiya. Toon toonaati jillaay ani tuduniyaatiib faraayu, tuduniyaatiib yꞌaabu, oosdik whadiidti jillaay yꞌaabi. Sidkiib ikatiibka, aneeb isnaakiir.” idi.
38Biilaatoos “Uusdik aree naanaatu?” idi. Malya Biilaatoos Iyahuudi beeti barraab ifirꞌaayt malya, “Oon ootak haay atehimaniyi sabab hooy karhan. 39Laakiin tꞌaada baraak tibariineet, Whasamti Wꞌiidiibka diimaab abuukiib gaal dehookna afandiig. Iyahuudi hadꞌaay fiduug hoosu tehariwna?” idi.
40Baraah tageega hissii waliikiyaana, “Abadan, oon kiiki! Baarabaas fidiga!” idiin. Baarabaas gwiharanaabi.
Currently Selected:
Yuuhannaay 18: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
