Yuuhannaay 16
16
Eeshuuk Imugaddasa
1Yasuuꞌa bareeh sooya, “Wꞌiimaanookna bitkwidhsayni jillaay, kastooh toon toona sooyan hookna. 2Baraah udiini gawii iifirꞌa hookna iyadna. Damaan aree yꞌiini, bareekna indiirka Ukwaasanaay jillaay toon toona shagaamiiniyeeb hiisiini. 3Uudehay Ubaabaawwa aneebwa biikaanneet toonaatii, teen teena saki iyadna. 4Laakiin ani toon toona sooyan hookna. Aflaay uudoor yꞌiit teen teena idꞌanihoob, ani sooyaneet toona baraak shꞌi tiyadna. Ani geebookna iifiyi sabbii, suur een sooyaayookna kaaki.
Eeshuuk Imugaddasaayi Ushaga
5Laakiin oontꞌa ani beeb aneeb diigwatiyaab beeti iibi andi. Masi aree naad iibi andiyeeb bareesookna gaal han, ‘Nhooh teebiya?’ diyaab kiiki. 6Oontꞌa teen teena sooyan hooknayt, iginꞌaayaakna gadab itabna. 7Laakiin oosdik andi hookna: ani giiganiyeet tuuna dehookna hanyiis. Ani baagiigayeek, ishamaamiiga yꞌi hookna kiidi. Laakiin ani giiganiyeek, malya barooh dehookna diigwati andi. 8Aashuuk yꞌeenihoob, tuduniyaati dehay danuub ibariineet toona sooyi iyadna. Masi tooshbu sooyi iyadna, Ukwaasanaay hukwim han sooyi iyadna. 9Baraah aneeb aamanaab kiikeenayt, maagnaayt sakeena, 10ani Ubaaba iibi andi, aree baraak shaawti rhiheeb kitdiinayt, baraah Ukwaasanaay wꞌadliib shhagwaaba, 11aree oon tuduniyaati haakim suur akay haakamamaabuuyt, baraah whukwimiib shhagwaaba.
12Ani masi gwidaana andiyeetookna abari. Laakiin oontꞌa baraak afhamteenee dehaay gwidaata. 13Laakiin Aashuuk yꞌeenihoob, Ukwaasanaay oosdik rhisi iyadna. Kassooh oosdik ookiik rhisi hookna iyadna. Baraah iknaayeet hadꞌaayeetii hadiidi kiidiin. Laakiin baraah toona tꞌeemsiiwneet hadiideena, teena harꞌook yꞌeent aree sooyi hookna iyadna. 14Baraah ani andiyeet toona abkiit bareek sooyeenayt, aneeb matuun iyawnaheeb. 15Baabu ibariyeet tuuna kastuuh aniitu. Oon usabbii aree Aashuuk ani aniiweet toona abkiit bareekna sooyeenayt een andi hookna.
Tifirhaawwa Igadabwa
16Shalik door shaawti rhi kitdiinaheeb, laakiin malya shalik doori harꞌii rhiheeb tiyadna.” idi.
17Ikwiriyaatay gwadi taktak sakanaayaana, “Uun naa miyaad ikati? Shalik door rhi kindi indi, malya shalik doori harꞌii barooh rhi niyad indi. Baruuh masi, ‘Ani Ubaaba iibi andiyayt tuun tikati.’ indi. 18‘Shalikt midda’ indiyeeb, naan haay isehariiw? Baruuh indiyeet toona kanaab kinki.” idiin.
19Baraah naan raati iidneeb Yasuuꞌa iktiin. Aflaay bareeyooh dehaay, “Shalik door rhi kitdiinaheeb adi hookna, malya shalik doori harꞌii rhiheeb tiyadna adi hookna. Baraak taktak sakanaateeneet toon toona kitti han? 20Oosdik andi hookna: baraak waawi tiyadna, milooti tiyadna. Laakiin uudehay afirhi iyadna, aree baraak gadabi tiyadna. Laakiin igadabaakna firhaat iikti iyadna. 21Takat firaay danwiilihoob, udooruuh yꞌaabuuyt lhamtini. Laakiin wꞌoor itfariyihoob baruuh tuduniyaatiib faraay ikatiyi sabbii batuuh afirhitni aree tilhanayteeh teebdhiin. 22Baraakna han bak tikatiina: oontꞌa gadabteena, laakiin malya masi rhi hookna andi, aree afirhi tiyadna. Baliit tifirha aree gaal han hookna iniinee dehaay kaꞌadgiriya. 23Been uumbꞌi yꞌiiniyihoob, baraak naat han raati kitdiinaheeb. Oosdik andi hookna: aniib oosmii Ubaabaay tehariwneet toona kastooh iyaaw hookna indi. 24Oontꞌa ookiik baraak aniib oosmii naat han raataab kitteen. Raataana imaar tiyadna, aflaay tifirhaataakna timmiimi iyadna.” idi.
Tuduniyaati Kehii Tinasra
25Yasuuꞌa bareeh sooya, “Ani teen teena mitaalee sooyan hookna. Laakiin ani mitaalee baahadiidayi door yꞌi indi. Ubaabaay oosdik gwꞌagwuuyt sooyi hookna andi. 26Been uumbꞌi yꞌiiniyihoob, aniib oosmii barooh raati tiyadna. Ani bareeyookna jillaay Ubaaba raati andi kaadi hookna. 27Ubaaba uukna areeyiini hookna. Baraak aneeb areetaani sabbiiwwa, ani Ukwaasanaay yꞌaab akatiyeet toona aamantaani sabbiiwwa, baruuh han areeyiini hookna. 28Awooh ani Ubaabaay yꞌaabu, aree tuduniyaatii dehaay yꞌan. Oontꞌa aree tuduniya ishtiit Ubaaba beeti itꞌigir andi.” idi.
29Malya ikwiriyaatayaah bariiyooh dehaay, “Oontꞌa baruuk gwꞌagwuuyt hadiidtiniya, mitaalee hadiidaab kitta. 30Oontꞌa baruuk naatka tikteeniyeet toona nikan. Gaal naat raatiiniyeet toona kitehariwa. Tuun tuuna aree baruuk Ukwaasanaay yꞌaab tikatiyeet toona aamansitni hoon.” idiin.
31Yasuuꞌa “Oontꞌa aamantaana han? 32Damaan yꞌi hookna indi, suur akay aree yꞌaabu, kassaakna itbirir tiyadna. Gaalka whaashookna ookna iibi tiyadna. Baraakna aneeb oodꞌu iiyꞌishheeb tiyadna. Laakiin ani sidik oodꞌu kaaki, Ubaaba geebu eefi.
33Ani bareek een haay andiyeetookna toona, aflaay aniib amshawwaaytiit mꞌasig imaar tiyadna. Tuduniya lhasi hookna tindi. Laakiin ariknaa! Ani tuduniya agrib!” idi.
Currently Selected:
Yuuhannaay 16: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
