Yuuhannaay 15
15
Yasuuꞌa Sidki Inabu
1Yasuuꞌa “Ani sidki inabu, Baabu aree dirꞌaat kinaabi. 2Baruuh firaay baayaksay oolꞌiidka hoosu kantꞌi. Firaay haay yꞌiiniib oolꞌiidka inwiik, aflaay nhasiit gwida firaay haay yꞌiini. 3Baraakna ani allamaneetookna toonaatii suur akay nhasaana. 4Baraak aniib daayaana, ani han hookna daayi andi. Uulꞌiid uukna firaay haay kaꞌeeya, laakiin wꞌinabi hindiib daayiiniyeek, firaay haay yꞌiini. Baraak han bak aniib daayi bitdiineek, firaay haay yꞌi kitdiina.
5Ani wꞌinabu, baraak aree oolꞌiidaana. Baliin aniib daayeen, aree ani bareeyooh daayaniyeeb, gwida firaay haay yꞌi iyadna. Aneeb anu aree naat han tidꞌaneet toona kaꞌadgirtaana. 6Aniib baadaayayka, oolꞌiidiit atoogdiit balami indi. Baliin aalꞌid dibaltiit nꞌeetiib itoogiidna, beentooy aree itooliiwna. 7Baraak aniib daateeneek, aniib ibhali aree hookna daayeeneek, aflaay toona tutehariwneet kastooh raati tiyadna, aree imaar tiyadna. 8Baabiyu umatuun, baraak gwida firaay tidꞌanihoob lawiini. Toon tehayꞌaatii aree anii kwiriyaatay tikatiina.
9Baabu aneeb areeyiini, ani han bak areeyani hookna. Aniib ooreeriib daayaana. 10Ani Baabiiti tiwasi asnaakirayt ureeriyooh daayaneet toonaatiit, baraak aniit tiwasi tisnaakiirneek, aniib ooreeriib daayi tiyadna. 11Aniit tifirha diimaab geebookna daayeeni jillaay ani een ibhali sooyan hookna. Tifirhaataakna han timmiimaat ikatiin. 12Taan bataah aniit tiwasi ikatiin: Ani areeyani hookna, baraak han taktak areeyaana. 13Tak yꞌaraweeyooh jillaay umidhhanooh iniiwihoob, oonaayka winka reer kiihaay. 14Ani sooyaneet teena tidꞌaneek baraak arawi tikatiina. 15Ishagaamana wꞌankwanaayuuhna danꞌiyeet toona kiikannayt, shaawti ishagaamana iyaad hookna kaadi. Ani Baabiisu amaasiweet toona kastooh sooyan hookna, shaawti yꞌaraw iyaad hookna andi. 16Baraak aneeb haydaab kitteena. Laakiin ani bareek hayidayt difiit gwida firaay baanhiid haay eeteeni jillaay afdig hookna. Aflaay Ubaaba aniib oosmii tehariwneet toona kastooh iyaaw hookna indi. 17Tuun batuuh aniit waseetu: taktak areeyaana.
Uudehay ikwiriyaatay iribna
18Uudehay eeribnuukna, baraah hankaab aneeb iribneet toona shꞌaana. 19Baraak tuduniyaatiib tikatiineek, tuduniya tuknaatiit areeyi hookna tindi. Laakiin ani toon tuduniyaatii waasan hookna, batiiyeeh aree kitteena. Oon usabbii aree uudehay eeribna hookna. 20Ani sooyaneet toona, ‘Ikishiya yꞌankwanaayeeka wawinkaab kiikeen.’ shꞌaana! Uudehay aneeb amaag weeraab ikatiineek, bareek han amaag waraayeen hookna. Aniib utꞌaliim isnaakiirneek, bareek han isnaakiirna hookna. 21Laakiin baraah aneeb diigwatiyaab kiikanna aree baraak aniib tikatiineet toonaati sabbii, baraah toon toona kastooh sakeen. 22Ani bareeyooh dehaay yꞌanayt bhaliisamaab baakaayeek, baraah maagti gwabab kiidꞌiin. Laakiin oontꞌa baraah tumaagtoohna afoomi kiidiin. 23Aneeb inriibka Baabu han inriib. 24Suur gaal han kwaasaab biikaayeet teena ani bareeyooh bitik kwaasaab baakaayeek, maagti gwabab iibriineet toona kitꞌatookkaan. Laakiin oontꞌa baraah ani adꞌiyeet timꞌuujisa rhiyaana, masi aree aneebwa Baaboowwa mhalleen iribna. 25Laakiin whaggiyoohna kataabt tuuna ibakii tikatiyeet toonaatu: ‘Sabab anu iribnaheeb.’ indi uuktaab.
26Oosdik Ukwaasanaay ikatiib Ubaabaay yꞌiiniib Ishamaamiiga Aashuuk yꞌiit lawseen. Ani bareeh Ubaabaay dehookna iifdig andi, aree baraah aniib hadiidi iyadna. 27Baraakna han tibadootee geebu tiifiinayt, aniib hadiidi tiyadna.” idi.
Currently Selected:
Yuuhannaay 15: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
