Yuuhannaay 14
14
Yasuuꞌa Ubaaba Eebiib Usalalu
1Yasuuꞌa bareeyooh dehaay, “Baahasiikna, Ukwaasana aamanaana, aneeb han aamanaana. 2Baabiyu oogaw gwidaat gurfa hooy eefeen. Ani aree bareek mhiin dehookna isuumir andi. Bak biikaayeek aree ani kasooyan hookna. 3Ani difiit mhiin dehookna asoomiiri harꞌii, agartiit aneeb beeti iyaay hookna andi. Shaawti ani eefiyeeb oomhiin iikti tiyadna. 4Ani iibi andiyeeb oomhiin istoobiib usalal baraak tikteenna.” idi.
5Toomaas bariiyooh dehaay, “Wꞌankwanaay, baruuk naad teebiyeeb kinkan, aflaay been usalal kak nikteen?” idi.
6Yasuuꞌa bariiyooh dehaay, “Ani usalalu, oosdiku, aree umidhhanu. Aneeb anu Ubaaba eebi gaal han kiihaay. 7Baraak sidik aneeb tiktiinneek, Baabu han tiktiinna. Amseenee fidnaab barooh tikteenna aree rhaabaana.” idi.
8Fiilibus “Wꞌankwanaay, Ubaaba rhisaa hoon, beet toona winneet nhariw.” idi.
9Yasuuꞌa “Fiilibus bareek kasseekna gwimad door geebookna iifi, masi aneeb kanaab kitteena han? Aneeb rhiyaabka, Ubaaba han rhaab ikati. Aflaay naanhooy Ubaaba rhisaa hoon tindiya? 10Fiilibus, ani Ubaabaay eefiyeet toonaawwa, Ubaaba aniib eefiyeet toonaawwa aamanaab kitta han? Ibhali ani dehookna bhaliiyaneeb uknaayiisu yꞌaab kiikeen. Ubaaba aniib kwarriib been ooknaay shaga daayiini. 11Ani Ubaabaay eefi, Ubaaba aniib eefi andiyihoob aamanaanheeb. Bak biikaayeek aree ani akwasiyeet timꞌuujisaati sabbii aamanaanheeb. 12Oosdik andi hookna: aneeb aamaneen baliin, ani adanꞌiyeet teena iidꞌi iyadna. Ani Ubaaba iibi andiyayt, baraah masi winnayt han iidꞌi iyadna. 13Aniib oosmii tehariwneenaaka dehookna iidꞌi andi. Aflaay Ubaabaay umatuun Wꞌoorii lawi indi. 14Aniib oosmii naatka tehariwneek, ani iidꞌi andi.
Eeshuuk Imugaddasaayi Waadiya
15Baraak aneeb areeteeneek, aniit tiwasi tisnaakiirna. 16Ani Ubaaba raati andi. Baruuh aree weer shamaamiiga diimaab geebookna daayiiniib iyaaw hookna indi. 17Baruuh Ukwaasanaay oosdik lawseen Eeshuuk ikati. Tuduniya barooh rhi kitdi tari iikan kitdiyayt, barooh ishish kitdi. Laakiin baruuh geebookna eefi, aree hookna ikwaar indiyayt, barooh tikteenna. 18Ani giiganiyihoob, baraak oodꞌookna ituuꞌish kitdiina, ani agarti yꞌi hookna andi. 19Shalikt middaati harꞌii, tuduniya shaawti rhiheeb kitdi. Laakiin ani dhhaniibu, baraak han iidhhan tiyadnayt, baraak rhiheeb tiyadna. 20Been oombꞌi ani Baabiyu eefiyeet toonaawwa, baraak aniib teefeeneet toonaawwa iikan tiyadna. Oontꞌaaneet ani hookna eefi. 21Baliin aniit tiwasi gabbalamiit isnaakiir, aneeb areeyeen bareeh ikatiin. Baabu aneeb areeyeen baliib areeyi indi. Ani han bareeh areeyani, ugarooyu aree dehaay lawsi andi.” idi. 22Malya Yahuuda (Yahuudaab Wꞌiskaaryuuti kiiki) Yasuuꞌii dehaay, “Wꞌankwanaay, baruuk ugarooyook naanhooy hinee dehaay lawisitiib niyaamtiniya? Naanhooy tuduniyaatii dehaay lawsi kitdiya?” idi.
23Yasuuꞌa bariiyooh dehaay, “Aneeb areeyiiniibka aniib utꞌaliim isnaakiir. Baabu barooh areeyi indi, Baabuuwwa aneebwa barooh beeti yꞌiit geeb nikwaar niyad. 24Aneeb baaꞌareeyayka, aniib utꞌaliim han kiisinaakir. Utꞌaliim baraak timaasiwneeb aree aniib kiiki, laakiin Ubaaba aneeb diigwatiyaanaay ikati.
25Toon toona ani masi geebookna iifiyi door sooyan hookna. 26Aashuuk Imugaddasa ishamaamiiga Ubaaba aniib oosmii iifdig indiyeeb, naatka allami hookna iyadna. Aree ani sooyaneetookna toona kastooh shꞌasi hookna iyadna. 27Mꞌasig geebookna anꞌiish, umꞌasig wꞌaniib aniiw hookna. Tuduniya tiniiweet toonaatiit iyaaw hookna kaadi. Baahasiikna, aree baarakwiina!
28Baraakna aneeb, ‘Giigani, laakiin agarti yꞌi hookna andi.’ diyee timaasiwnaheeb. Ubaaba aniika winkaabuuyt, baraak aneeb areetiineek, ani Ubaaba beeti andiifeet toonaatiib afirhitiina. 29Tuun tuuna akaat baakaay oontꞌa sooyan hookna. Shaawti batuuh tikatiyihoob, baraak aamani tiyadna. 30Ani geebookna gwidaana hadiidi kaadi. Shaawti toon tuduniyaati haakim yꞌiini. Laakiin baruuh anii kehii akrir kiibari. 31Ani Ubaaba areeyaniyeet toona tuduniya ibakii tikteen. Oon usabbii aree baruuh sooyiiniyeetu toona kastooh adanꞌi.” idi.
Yasuuꞌa “Oontꞌa mꞌaana, giigni.” idi.
Currently Selected:
Yuuhannaay 14: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
