Samuweli gɩkpa-nyɔɔfɛ 7
7
Ade gɛtɛ Wurubwarɛ ɛ dɔ̀ ɛ sɩ̀ ɛ tɛ Dafidi
1Gɛtɛ Egyu-dɩrɛ Dafidi ɛ yɛ è si wo digyu-kpaara daanɩ olila waanɩ, gɛ Yahwe e to wɔ e ye wɔ bɛkyʋnlɛ gɛtɛ be silin wɔ be tuma fɔ powu baalɔ yaanɩ fɔ, 2ɛ dɔ̀ Wurubwarɛ wɔtabʋrʋlɛ Natan alan, <<Nya, gɛtɛ nmɩ ǹ si digyu-kpaara gɛtɛ bɛ ka seda wo-iyon be sere fɔ daanɩ, mɔ Wurubwarɛ Dikola dɩɩ dɩdaka fɔ dɩ̀ sangba dɩ̀ dɔ dɩyan-kwo daanɩ.>> 3Gɛ Natan e tiri wuunyun ɛ tɛ egyu-dɩrɛ alan, <<Mɛ ade-kamasɛ gɛtɛ ɩ̀ sa aamɩnlɛ yaanɩ, yema Yahwe ɛ̀ sa ma awɔ.>> 4Mɔ odente wʋtɔkɔ ke Wurubwarɛ ɛ dɔ̀ Natan alan, 5<<San ma lila mɩɩnsaranyan Dafidi alɛ, nmɩ nte lila wɔ alan, <Awɔ nan sere dikwo a tɛ mɩ nan sara daanɩ? 6Ye duwi gɛtɛ na ka Isareli bete na ye Egyipiti bè sere ma ǹdò lɛ, mɩn tɛ sara dikwo daanɩ nya. Ǹ bɔ ntɛ sara-sara gɛ dɩyan-kwo daanɩ n tɔ. 7Ɔkʋn-kamasɛ gɛtɛ na ka Isareli bete na silin na san fɔ, na were lila Isareli begyegeyelɛ gɛtɛ na yɛ bɛɛ nya mɩɩn bɛnɩ Isareli bete boo koro fɔ alɛ, anʋn yii koro gɛ ɩn ka seda wo-iyon i sere dikwo ɩ tɛ mɩ?> >>
8Okoro nkele, dɔ̀ mɩɩnsaranyan Dafidi alɛ, Yahwe, Ɔkɛma powu Wuute fɔ ɛɛ dɔ̀ alan, <Na tiri wɔ̀ na ye bɛyɛran boo gedikʋn, ɔkʋn gɛtɛ aa nya boo koro fɔ, gɛ na mɛ wɔ̀ egyegeyelɛ na tɛ mɩɩn bɛnɩ Isareli bete. 9Gɛ na sara ma awɔ ɔkʋn-kamasɛ gɛtɛ a san fɔ, gɛ na yɛ a di aa bɛkyʋnlɛ powu boo koro. Nkele nan yɛ wɔ̀ àà di diyere-dɩrɛ anlɛ bɛnɩ gbaa-gbaa gɛtɛ bɛ̀ sa gɛtʋnkwaa gii koro fɔ. 10Gɛ nan tiri ɔkankɩ n tɛ mɩɩn bɛnɩ Isareli bete, gɛ nan sɩ̀ bɛ dʋkɔ, fɔ bàà talɩ sere ɛbɛ gbagba baasarakʋn, fɔ ɛkɩ ɛn mɩnɩ ha bɛ. Gɛ bɛnɩ-kpen bɛn nan nɩ nyɩ bɛ anlɛ gɛtɛ bɛ̀ fʋrʋma bɛɛ mɛ fɔ. 11Na sere ɔpɩ na ye sɩyɛɛ ɔkʋna gɛtɛ na tiri gɔdɔ gɩɩ bɛdɔ̀lɛ bàà nya mɩɩn bɛnɩ Isareli bete boo koro fɔ. Fɔ nan tɛ yɩ getuna ye yɩɩ bɛkyʋnlɛ baalɔ yaanɩ. Gɛ Yahwe ɛ dɔ̀ wɔ̀ alan, <<<Nmɩ Yahwe gbagba nan sere dikwo n tɛ wɔ̀. 12Gengyi aawi ɩ̀ nɩma, gɛ à ku fɔ, nan tiri aadu wʋʋnɩ n sɩ̀ aa didin, gɛ nan yɛ wo bugyu bàà sere ɩkpaa. 13Ɛwɔ n di ɛnɩ gɛtɛ eè sere dikwo ɛ tɛ mɩ, gɛ nan nya gɛtɛ wo bugyu bàà sara gakpaakpa. 14Nan mɛ wote, gɛ ɛwɔ mɔ ɛɛ̀ mɛ miinbi. Gengyi gɛ ɛ̀ mɛ ade-kpen gba fɔ, nan ka gɛ ginyenibi n tiira wɔ giten n pɩna wɔ anlɛ gɛtɛ etaawe-kamasɛ ɛɛ mɛ fɔ. 15Mɔ mɩn nan to miin gelen gɛtɛ ǹ ba tɛ wɔ fɔ n ye wakʋn anlɛ gɛtɛ na to na ye Sawulo wakʋn pɛgɛ a ba aa di bʋ lɛ.
16Aadu waanɩ wʋʋ bɛnɩ nan di bugyu Isareli gakpaakpa. Gɛ gigyu-bɩya fɔ gɩn nan ye aa gʋlɔ gaanɩ gɩ nya.> >> 17Ɛwʋ gɛ Natan ɛ dɔ̀ ade-tirilɛ-wùlàlɛ fɔ powu ɛ tɛ Dafidi.
Dafidi wonyun-tiri
18Ɛwʋ gɛ Egyu-dɩrɛ Dafidi ɛ san ɛ ma kura Yahwe bʋnʋn baanɩ, gɛ e tiri onyun alan,
<<Oo Yahwe-kpatakpɩrɩ, nmɩ ma mɩɩn dɩkpaara tiin di gɩnyankɩ, tɩɩn kʋtʋma, mɔ a ka mɩ gɛlɛɛ a be ye nfan. 19Oo Yahwe-kpatakpɩrɩ, ma nyawʋ powu wʋʋ gama fɔ, a biri a dɔ̀ ade gɛtɛ yaà be sere aasaranyan dɩkpaara. Oo Yahwe, Ɔkɛma powu Wuute, anlɛ gɛ à fʋrʋma aa mɛ a tɛ bɛnɩ-nyalɛ?
<< 20Oo Yahwe-Kpatakpɩrɩ, anʋn gɛ nmɩ Dafidi nan nɩ talɩ n dɔ̀ wɔ̀? Yema à nyɩ̀ nmɩ aasaranyan. 21Aade-dɔ̀lɛ ma aa gelenbi yii koro a mɛ ade ma gɩsaa nyayɩ powu a ka a wùlà nmɩ aasaranyan. 22Oo Yahwe-Kpatakpɩrɩ, à lɩ. Ɛkɩ ɛn ma anlɛ awɔ, gɛ Wurubwarɛ ɛkɩ ɛn ma fɩya ma awɔ, anlɛ gɛtɛ ɛtɩ gbagba tɩ nʋn ma taaten lɛ. 23Gɩfɩɩ gɩkɩ gɩn ma gɛtʋnkwaa gii koro anlɛ Isareli gɛtɛ a tiri a ye gɩdɩ gaanɩ gɛ a ka bɛ a mɛ awɔ gbagba aa bɛnɩ fɔ. Ade-dɩrɛ ma gɩsaa gɛtɛ a mɛ a tɛ bɛ fɔ ɩ yɛ à di diyere gɛtʋnkwaa powu gaanɩ. A berema bɩfɩɩ ma buu bekpen a ye aa bɛnɩ gɛtɛ a tiri a ye Egyipiti gɛtɛ bàà mɛ aayo fɔ bɔɔ bʋnʋn, ɔkʋna gɛtɛ bɛ̀ san bɛɛ fɔrɔ fɔ. 24A mɛ Isareli bete awɔ gbagba aa bɛnɩ gakpaakpa, gɛ awɔ Yahwe a biligi boo Wurubwarɛ. 25Nkele, Yahwe, Wurubwarɛ, yɛ aade gɛtɛ a dɔ̀ a sɩ̀ a tɛ aasaranyan ma wɔ dɩkpaara fɔ yàà ba waanɩ gakpaakpa. Mɛ anlɛ gɛtɛ a dɔ̀ a sɩ̀ fɔ, 26gɛlɛ fɔ aa diyere daà ye gakpaakpa. Fɔ bɛnɩ baà dɔ̀ alan, <Yahwe-Kpatakpɩrɩ fɔ è di Wurubwarɛ tɛ Isareli.> Gɛ aasaranyan Dafidi dɩkpaara daà yela gakpaakpa aa bʋnʋn. 27Oo Yahwe Ɔkɛma wuute, Isareli bete boo Wurubwarɛ a tiri ade nyayɩ a wùlà nmɩ aasaranyan, gɛ a dɔ̀ alan, <Nan sere dɩkpaara n tɛ wɔ̀.> Gɛlɛ wuu koro aasaranyan wo koro gi ton wɔ, gɛ e tiri onyun nyawʋ ɛ tɛ wɔ̀ alan, 28<Oo Yahwe-Kpatakpɩrɩ, à di Wurubwarɛ, aa di aade-dɔ̀lɛ-sɩ̀lɛ yii koro, gɛ a dɔ̀ ade-kpara nyayɩ à sɩ̀ aasaranyan. 29Nkele yɛ wàà mɛ aa gelenbi gɛtɛ àà hira nmɩ aasaranyan dɩkpaara, fɔ wàà sara gɛlɛ wu ma ye aa bʋnʋn baanɩ gakpaakpa. Yema awɔ, Yahwe-Kpatakpɩrɩ a tabʋrʋ a sɩ̀, gɛ aa gehira fɔ gii koro aasaranyan dɩkpaara daà wura gehira gakpaakpa.> >>
Currently Selected:
Samuweli gɩkpa-nyɔɔfɛ 7: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
