Samuweli gɩkpa-nyɔɔfɛ 8
8
Akpa-akpa gɛtɛ Dafidi e di yii koro
1Ɔya wʋkɩ waanɩ fɔ, Dafidi ɛ tà bɩtà ma Filisiti bete, gɛ e di boo koro, gɛ ɛ nyɩ bɛ ɛ sa wɔ gatɩn, gɛ e to Gati gɛtɛ dì di boo ditele-dɩrɛ.
2Dafidi e di Mowabi bete mɔ boo koro, gɛ ɛ yɛ bɛnɩ fɔ bɛ dʋrɔ gɛtʋnkwaa, ɩgba yaanɩ, gɛ ɛ ka ɔŋʋʋ ɛ kɛrɛ bɛ. Ɛ̀ kɛrɛ ɔŋʋʋ fɔ dɩnyɔɔ-kamasɛ fɔ, ɛ yɛ be wolo bɛ. Mɔ gengyi ɛ̀ kɛrɛ ɔgba siyeefɛ fɔ, ɛ yɛ be kere bɛ bɛ ya bàà sara nkpa. Mowabi bete gɛtɛ be kere bɛ bɛ ya ben wolo fɔ, be biligi Dafidi bɛsʋmalɛ, gɛ gɩkyan-kamasɛ fɔ, bee le sɩka bɛ tɛ Dafidi.
3Ɛwʋ gɛtɛ wʋ̀ fɩya fɔ, Dafidi ɛ kpà ma Rehobi wobi Hadadese gɛtɛ è di Soba wogyu, ɔkʋna gɛtɛ ɛɛ fɔrɔ ɛ̀ɛ̀ ma to Efurati getu gɩɩ gɛtʋnkwaa gɩɩlanlan fɔ. 4Gɛ Dafidi e gye Hadadese wo tiiramisan ɛbɛ nkpɩn ton (1,000), ma tiiramisan ɛbɛ yɩɩ bɛsaralɛ ɩgbaa isiyee ma nkpɩn ton (7,000), ma bɩtà bʋʋ bɛtàlɛ gɛtɛ bɛ̀ san ma bɩsɩrɩ disepekyi dɩkɩ (20,000). Gɛ Dafidi e kebi tiiramisan ɛbɛ baabengyi fɔ yɩɩ-ɩsɩrɩ-kpa, mɔ e kere baanɩ akpilin ton (100) ɛ ya bàà tiira tiiramisan ɛbɛ akpilin ton (100) fɔ.
5Gɛ ɔkʋna gɛtɛ Siriya bete gɛtɛ be ye Damasiko bɛ ba bàà bɛ kpà Soba wogyu Hadadese fɔ, Dafidi e wolo Siriya bɩtà bʋʋ bɛtalɛ fɔ disepekyi ma gbaa (22,000). 6Okoro Dafidi ɛ ka bɩtà bʋʋ bɛtàlɛ akpen-akpen ɛ sɩ̀ Damasiko ditele diinyun, gɛ Siriya bete bɛ sara Dafidi wɔ gatɩn, gɛ be le lonpoo bɛ tɛ wɔ. Gɛ Yahwe ɛ yɛ Dafidi e di akpa yii koro ɔkʋn-kamasɛ gɛtɛ ɛ san fɔ.
7Dafidi ɛ ka Hadadese wɔ bɛndɩrɛ-bi bɔɔ sɩka-sɩya wanyan dɩyɛlɛ koro bɩtà baanɩ fɔ, gɛ bɛ ka yɩ bɛ ba Yerusalem. 8Egyu-dɩrɛ Dafidi e biri e kpila awɔrɔnyan-sɩya kpekpesi e ye Teba ma Berotayi atele gɛtɛ ì di Hadadese watele fɔ yaanɩ.
9Gɛ Hamati wogyu Toyi ɛ nʋn alɛ, Dafidi e di Hadadese ma wɔ bɩtà bʋʋ bɛtalɛ powu boo koro fɔ, 10ɛ sa wobi Yoram Egyu-dɩrɛ Dafidi wakʋn ɛ̀ɛ̀ ma sa wɔ onyun, fɔ èè sila wɔ gɛtɛ e di Hadadese gɛtɛ ɛɛ tɩ̀ kpà ma ɛwɔ Toyi fɔ wo koro. Yoram ɛ ka sɩka-fututu, ma sɩka-sɩya, ma gɩwɔrɔnyan-sɩya ɛ ma tɛ wɔ.
11Ɛwʋ gɛ Egyu-dɩrɛ Dafidi ɛ ka anyan nyayɩ powu ɛ tɛ Yahwe anlɛ gɛtɛ ɛ fʋrʋma ɛ ka sɩka-sɩya ma sɩka-fututu, gɛtɛ e wura e ye bɩfɩɩ gɛtɛ e di buu koro ɛ tɛ Yahwe fɔ. 12Ntʋnkwaa gɛtɛ Dafidi e di buu koro fɔ n di, Edom, ma Mowabi, ma Amon, ma Filisiti, ma Amaleki. Dafidi ɛ nɩ ka anyan gɛtɛ e wura e ye Rehobi wobi Hadadese gɛtɛ è di Soba wogyu wakʋn fɔ ɛ tɛ Yahwe.
13Okoro ɔkʋna gɛtɛ Dafidi ɛ ma wolo Edom bete ɩgbaa yɛkɩ (18,000) Bʋbɔlɛ bʋʋ Dɩtagba daanɩ e were, gɛ e biri e ye dʋkɔ e be gyu fɔ, e di diyere gepepe.
14Gɛ ɛ ka bɩtà bʋʋ bɛtàlɛ akpen-akpen ɛ sɩ̀ Edom gɩfɩɩ gaanɩ. Gɛ Edom bete fɔ be biligi Dafidi bɛsʋmalɛ. Gɛ Yahwe ɛ yɛ Dafidi e di akpa powu yii koro ɔkʋn-kamasɛ gɛtɛ ɛ san fɔ.
Dafidi Bɛndɩrɛ-bi
15Okoro Dafidi e di bugyu ɛ tɛ Isareli bete powu, gɛ ɛ mɛ ade gɛtɛ ì we kyɛkyɛ, gɛ ɩ̀ tʋna ɛ tɛ wɔ bɛnɩ powu. 16Fɔ Seruya wobi Yowabi è di gɛ bɩtà bʋʋ bɛtàlɛ fɔ bɔɔndɩrɛ, gɛ Ayiludi wobi Yewosafati mɔ è di gɛ ɛŋwaralɛ. 17Ahitubi wobi Sadoki, ma Abiyata wobi Ahimeleki mɔ bè di gɛ gedi gɩɩ bɛtɛlɛ, gɛ Seraya mɔ è di gɛ ɛŋwaralɛ, 18Yehoyada wobi Benaya è di Kereti bete ma Peleti bete bɔɔnyalɛ, gɛ Dafidi bebi mɔ bè di wɔ bɛndɩrɛ-bi.
Currently Selected:
Samuweli gɩkpa-nyɔɔfɛ 8: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
