Samuweli gɩkpa-nyɔɔfɛ 6
6
Bɛ ka Dikola dɩɩ dɩdaka fɔ bɛ san Yerusalem
1Ɛwʋ gɛ Dafidi e tiri bɩtà bʋʋ bɛtàlɛ gɛtɛ ɛbɛ powu bɛ ba disepekyi dɩkɩ ma ɩgbaa ton (30,000) e ye Isareli bɛnɩ baanɩ. 2Dafidi e gyegeye bɔɔ bʋnʋn gɛ bɛ san Baala ditele gɛtɛ dɩ̀ sa Yuda, fɔ bàà ma ka Wurubwarɛ Dikola dɩɩ dɩdaka gɛtɛ bee kpèlè dɩ alɛ Yahwe, Ɔkɛma powu Wuute fɔ gɛ wo bugyu bʋ̀ sa Kerubi ɛbɛ bɛnyɔɔ fɔ boo getite fɔ bɛ ba.
3Gɛ bɛ ma ka Wurubwarɛ Dɩdaka fɔ be ye Abinadabi wɔlɛ, gɛtɛ wʋ̀ gyaga odon wuu koro fɔ, gɛ bɛ ka dɩ bɛ taga tiiramisan-fon wʋkɩ waanɩ. Gɛ Wusa ma Ahiyo gɛtɛ bè di Abinadabi bebi teni fɔ, bɛɛ dɩyɛ tiiramisan-fon 4gɛtɛ Wurubwarɛ Dikola dɩɩ dɩdaka fɔ dɩ̀ taga waanɩ fɔ. Fɔ Ahiyo ɛ̀ san dɩɩ bʋnʋn. 5Gɛ Dafidi ma Isareli bete fɔ powu bee di ɔsɛ. Bè de bɔɔkɛma powu bɛɛ nʋma ɩnʋn, gɛ bɛɛ tà adʋlɛ ɛbɛ, ma adʋlɛ-dɩrɛ ɛbɛ, ma akyaka, ma akantan ma akyaka gɛ bee lèn bɛ sa Yahwe gingyebi.
6Gɛtɛ be be gyu Nakon wanaabi yii getibakʋn fɔ, ɛkwɔ-teni, gɛtɛ ee tiira tiiramisan fɔ, ɛ kpatɩ ɛ̀ɛ̀ nʋ̀n, gɛ Wusa ɛ sa gʋlɔ e gye Wurubwarɛ Dikola dɩɩ dɩdaka fɔ, gɛtɛ dɩ kara ye dɩ nʋ̀n. 7Disere-kɩlɩn fɔ, Yahwe wowurufa wʋ ba Wusa wo koro, yema ɛ mɛ gɛmanbu gaade wuu koro Wurubwarɛ ɛ gbɛrɛ wɔ ɛ fɩna Dikola dɩɩ dɩdaka fɔ dɩɩpɩ gɛ e ku.
8Wʋ taga Dafidi, yema Yahwe wowurufa-dɩrɛ wʋ ba Wusa wo koro, gɛ bè ye ma ǹdò bee kpèlè dʋkɔbɛ alɛ Peresi-Wusa.#6:8 Peresi-Wusa gɛtɛ wuu wùlà alɛ Wurubwarɛ wowurufa wʋ tɔ Wusa wo koro
9Gɛ Dafidi e serenti Yahwe duwi dɩtɔkɔ, gɛ e lila alan, <<Lan gɛ nan mɛ gɛ nan ka Yahwe Dikola dɩɩ dɩdaka nyadɩ n san maakʋn?>> 10Okoro ɛn mɩnɩ taa ni len gɛtɛ èè to Yahwe Dikola dɩɩ dɩdaka fɔ sɩ̀ wakʋn Dafidi Ditele-dɩrɛ fɔ daanɩ. Gɛ ɛ ka dɩ ɛ san Gati-te Obedi-Edom fɔ wɔlɛ. 11Yahwe Dikola dɩɩ dɩdaka fɔ dɩ wɔ Gati-te Obedi-Edom wɔlɛ bebon besiyee, gɛ Yahwe e hira Obedi-Edom ma wɔ dɩkpaara dɩɩ bɛnɩ powu.
12Duwi dɩkɩ bɛ bɛ dɔ̀ egyu Dafidi alan, <<Yahwe e hira Obedi-Edom, ma wɔ dɩkpaara dɩɩ bɛnɩ powu, ma gɩnyan-kamasɛ gɛtɛ ɛ̀ ba fɔ, Wurubwarɛ Dikola dɩɩ dɩdaka fɔ dii koro.>> Ɛwʋ gɛ Dafidi ɛ san ɛ ma ka Wurubwarɛ Dikola dɩɩ dɩdaka fɔ e ye Obedi-Edom dɩkpaara, gɛ ɛ ka dɩ ɛ ba wo ditele-dɩrɛ fɔ daanɩ ɔsɛ waanɩ. 13Gɛtɛ ɛbɛ gɛtɛ bè tola Yahwe Dikola dɩɩ dɩdaka fɔ be dugba bɩsɩrɩ kooron fɔ, Dafidi ɛ ka ɛkwɔ-teni ma dɩkwɔ dɩtan gɛtɛ dɩ̀ ba ayo ɛ tɛ Yahwe gedi. 14Dafidi ɛ sa gɛgba tinlɛ diboro fututu, gɛ e lèn ma wɔkɛma powu Yahwe bʋnʋn ɛ ka sa wɔ gebù. 15Gɛlɛ wuu koro Dafidi ma Isareli bete fɔ powu, bɛ ka ɔsɛ wafala yɩɩ gɛgbɛrɛ, ma akantan yɩɩ gɛfʋ̀n bɛ ka Yahwe Dikola dɩɩ dɩdaka fɔ bɛ ba Yerusalem.
16Gɛtɛ Yahwe Dikola dɩɩ dɩdaka fɔ dii gyu Dafidi ditele-dɩrɛ daanɩ fɔ, Sawulo wobi-nanɩbi Mikali ɛ nya ma nfansɩrɩ, gɛ e we egyu Dafidi ee lèn, gɛ ee firigi ɛ sa Yahwe gingyebi fɔ, ɛ nya wɔ ɛ waran.
17Gɛ bɛ ka Yahwe Dikola dɩɩ dɩdaka fɔ bɛ ma sɩ̀ dɩyan dii dikwo gɛtɛ Dafidi e sere ɛ sɩ̀ dàà mɛ dɩɩ gɛsarakʋn fɔ daanɩ. Gɛ Dafidi ɛ tɛ Yahwe gekuma ma olila yii gedi. 18Gɛ gɛtɛ Dafidi ɛ tɛ gekuma gii gedi ma olila wuu gedi e were fɔ, e hira bɛnɩ fɔ powu Yahwe, Ɔkɛma powu Wuute fɔ diyere daanɩ.
19Gɛ e yo boroboro, ma dati wo keki, ma resin wo keki ɛ tɛ Isareli wɔnɩ-kamasɛ gɛtɛ e tuma dʋkɔ fɔ, beteni ma bɛnanɩ powu. Wʋʋ gama fɔ, bɛnɩ fɔ powu bɛ da baakpaara yaanɩ.
20Gɛtɛ Dafidi e biri ɛ san wɔ dɩkpaara ɛ̀ɛ̀ ma hira wɔ dɩkpaara dii bɛnɩ fɔ, Sawulo wobi-nanɩ Mikali e ye okòro e be tuma wɔ gɛ ɛ dɔ̀ alan, <<Isareli wogyu-dɩrɛ ɛ sa wo koro diyere dɩrɛ ǹdò. E tigi koro dibolon-kwaa wɔ bɛndɩrɛ-bi bɔɔ bɛsʋgʋgyan gɛtɛ be se fɔ bɔɔ bʋnʋn, anlɛ gɛtɛ enyimapulɛ ɛɛ mɛ fɔ.>>
21Gɛ Dafidi ɛ dɔ̀ Mikali alan, <<Ǹ te lèn nàn tɔ̀là Yahwe gɛtɛ e tiri mɩ e kere aate ma wɔ dɩkpaara dɩɩ bɛnɩ powu ɛ ya, gɛ ɛ mɛ mɩ egyegeyelɛ ɛ tɛ wɔ bɛnɩ Isareli bete fɔ. Okoro nan len n tɔ̀là wo diyere. 22Nan tiri koro n tɩyɛra n da anlɛ gɛtɛ aa nya mɩ anlɛ miin di gɩnyankɩ lɛ. Mɔ bɛdɩ-nanɩ bɛtɔkɔ baà ka gebù-dɩrɛ bɛ tɛ mɩ.>> 23Sawulo wobi-nanɩ Mikali en wo ebi ka ma sere duwi gɛtɛ e ku.
Currently Selected:
Samuweli gɩkpa-nyɔɔfɛ 6: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
