Matiu 9
9
Tanata e mmate tana huaitino e mee ina Jisas loo taurekareka
(Mak 2.1-12; Luk 5.17-26)
1Jisas ni kake i te poki ka ahe muri ki telaa taha te Tai Galili no hanatu ki te tino taon aana. 2E mee naa tama e hhau ake te tama e mmate te huaitino ka taakoto i aruna tana moena ka oo ake ki te ia. Tevaa Jisas ni kite ai poro naa tama naa e lootu hamataku i te ia, ku hua ake roo ki te tama e mmate tana huaitino naa, “Taku tama, akoe teeai kii mee purima naa mannatu. Anau ku oti te hakataha ina naa takahara aau.”
3Naa tisa naa Loo ku rrono i naa hua Jisas, ku hua roo hoko laatou poroo, “Te tama nei e hua roo poro aia ko te Tama Hamataku!”
4Jisas e iloa heaa naa tama naa e mannatu ai, ku hhiri ake roo, “Ai koutou e mannatu ai peenaa? 5Heaa e hainauhie, ki hua poroo, ‘Au tiputipu takahara ku oti te hakataha ina,’ ma ki hua, ‘Mahike no tuu ka tere?’ 6Koia anau e ruu i koutou ki illoa poro te Tama te Tama e haiao i aruna te kerekere nei ki hakataha ina naa takahara naa tama.” Ku tahuri atu roo Jisas ki te tama e mmate tana huaitino loo hua ake, “Mahike ki aruna loo hhau too moena ku hano roo ki too hare!”
7Ku mahike roo te tama naa ka too tana moena ku hano roo ki tana hare. 8Naa tama ni kkite i te mee naa ni oho naa mouri laatou, ku hhau roo laatou te inoa te Tama Hamataku e mee i te ia ni kavake te haiao ki naa tama te kerekere.
Jisas e varo i Matiu
(Mak 2.13-17; Luk 5.27-32)
9Ki oti naa Jisas ku hano ki haho no kite roo i te tama tootoo takis, tana inoa ko Matiu, e noho i tana kuana tootoo takis ai. Ku hua ake roo Jisas ki te ia, “Tautari mai i te nau.”
Ku mahike roo Matiu no tautari i te ia.
10 #
Luk 15.1,2. Tevaa Jisas ni noho ai i te hare Matiu ka kai, purima tama tootoo takis ma naa tama e mee naa tiputipu takahara ni oo ake no kkai natahi ma Jisas ma naa disaipol aana. 11Tevaa naa Faarisi ni kkite i naa tama naa, ku hhiri ake roo ki naa disaipol Jisas, “Ai kuu aa te tisa koutou naa e kai natahi ma naa tama tootoo takis ma naa tama takahara?”
12Jisas e rono i naa hua laatou ku hua ake roo, “E teeai ko te tama tee hai maki e ruu ki mmata i te tokota, koia te tama maki. 13#Mat 12.7.Oo no heaki heaa naa hua te Tama Hamataku e hua ai poroo:
‘Anau e heaki te manava laoi;
anau tee heaki ki te manu e tinai no kavake ki te Tama Hamataku.’
“Anau e teeai ki au ki loo varo i naa tama e ttonu, koia naa tama e mee naa tiputipu hakarria.”
Jisas e hua i te tiputipu e hakatapu ki tee kai
(Mat 9.14-17; Mak 2.18-22)
14Naa disaipol Jon te Paptis ni oo ake no hhiri ake ki Jisas, “Maatou ma naa Faarisi e mee naa vaa e hakatapu tee kkai. Ai kuu aa naa disaipol aau e haare koi ka kkai i naa vaa katoo?”
15Ku hua ake roo Jisas, “Koutou e nani te tiake naa tama i te hainaakai ana ki nnoho tee kkai i tevaa te tanata e avana e noho ma laatou? E mee tevaa raa ka au te tanata e avana raa ka tooa hakataha i laatou, anaa laa naa laatou raa ka tee nani te kkai ka inu.
16“Mee tee hai tama e nani te too he hiapo hoou ku tuitui roo i te kahukahu tuai e mahae. Kime e mee peenaa, te kahukahu raa ka hahia muri te hiapo hoou loo hamataku te kuana e mahae.
17“Mee tee hai tama hoki e nani te utu te wain hoou ki loto te paeke e pena i naa kiri tuai naa sipsip. Kime e mee peenaa, te paeke raa ka hahia te wain hoou ku marrini roo te wain ma te paeke ku hakariaria hoki. Te wain hoou ki utu ki loto naa paeke hoou, anaa te hiaoa mee naa raa ka takkoto taurreka.”
Te tama hahine Jairus ma te hahine e maki ni paa te kahukahu Jisas
(Mak 5.21-43; Luk 8.40-56)
18Tevaa Jisas koi hua ai peenei, e mee te hamaatua naa Jiu ni hanake ki te ia no tuu roo i ana turi i mua te ia ka hua ake, “Taku tama hahine kai te mate, koia au no tuku too rima i aruna te ia ki ora muri te ia.” 19Ku mahike roo Jisas ka hanatu ma ia ma naa disaipol hoki aana.
20E mee te hahine e mee tana maki, te toto aana e tere loo nani naa kirimahi e hanahuru ma rua, e hanake i muri Jisas no paa roo i te muri tana kahukahu. 21Ku hua roo hokoia poroo, “Kime anau e tino paa i tana kahukahu, anau raa ka taurekareka.”
22Jisas ku tahuri no kite roo i te ia, ku hua ake roo, “Taku tama, koe teeai ki maanatu tamaki. Koe ku taurekareka i te koe e lootu hamataku i te nau.” Te maki te hahine ni oti ka taurekareka muri i te vaa naa.
23Ku hanatu roo Jisas ki te hare te hamaatua naa no kite roo i naa tama e iriiri naa parunu ma purima naa tama e vaa i kinaa, 24ku hua ake roo ki laatou, “Koutou katoo oo ki haho! Te tamarikiriki hahine nei e teeai ki mate, aia e tino moe.” Koia laatou ni ppiha i te ia. 25Tevaa naa tama katoo ku oti te kereia ki haho, ku uru atu roo Jisas ki hare no tauhi te rima te tamarikiriki, ku mahike roo te tamarikiriki ki aruna. 26Te rono i naa mee Jisas nii mee nei ni tere ki naa kuana katoo i te matakaaina naa.
Jisas e mee ina te hiaoa tama kanomata ppuni no taurreka
27Tevaa Jisas ni tiake te kuana naa ka hano, te hiaoa tama kanomata ppuni ni tautari atu i te ia ka varovaro atu, “Te Tama David, aroha i maaua.”
28Tevaa Jisas ni hano ki loto te hare, te toka rua tama kanomata ppuni naa ni ooatu ki te ia. Ku hiri ake roo Jisas ki laaua, “Kourua e mannatu hamaauri poro anau e nani te haia kourua ki kkite muri?”
Ku hua ake roo tokorua raa, “Iinoo te Ariki!”
29Ku paa roo Jisas i naa kanomata laaua ka hua, “Mee raa ka taakoto peenaa i kourua e mannatu hamaauri i te nau.” 30Ku kkite muri roo laaua. Jisas ku hua haiao ki laaua, “Teeai ki hua ake roo ki he tama i te mee nei.”
31Koia laaua ni oo no hakatere roo te rono Jisas i naa kuana katoo i te matakaaina naa.
32Tevaa laaua ni hhae ka oo ki haho, e mee te tama e uruhia te anana hakariaria ka tee nani te hua ku too ake naa tama ki Jisas. 33Tevaa te anana ku oti te hakataha ina ka oo ki haho, te tama tee nani te hua ku hua muri. Te apiana naa tama naa ni oho naa mouri laatou ka hua, “Tee hai mee roo peenei ni hhae i loto Israel i te raa raa.”
34 #
Mat 10.25; 12.24; Mak 3.22; Luk 11.15. Koia naa Faarisi hua ake, “Anaa ko te hamaatua naa anana hakarria e kavake te haiao ki te ia ki nani te hhana naa anana hakarria.”
Momo tama e hekau i te uaka
35 #
Mat 4.23; Mak 1.39; Luk 4.44. Jisas ni hano ki naa taon katoo ka hakailoa haare naa tama i naa hare lootu ka hua haare i te Rono Taurekareka o te Mataapaa ka hakattaha ina purima naa maki hakarria. 36#Mak 6.34.Tevaa te ia ni kite i te apiana naa tama, tana manava ni aroha i laatou e mee i laatou e nnoho hakaaroha ka haporroto pai ko naa sipsip e tee hai tama ki anaana i laatou. 37#Luk 10.2.Ku hua ake roo te ia ki naa disaipol aana, “Te uaka ku maatua ka aarere ki haki, koia naa tino momo tama ki haki. 38Hakaruma ki te Ariki koai e mee tana uaka nei ki hakauna mai ni tama ki hekau ka haki naa kai te uaka.”
Currently Selected:
Matiu 9: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
