Matiu 8

Te tama e haia te maki leprosi

(Mak 1.40-45; Luk 5.12-16)

1Tevaa Jisas ni hano iho muri i te mouna, purima naa tama ni tautari ake i te ia. 2E mee te tama e haia te maki leprosi ni hanake ki te ia no tuu roo i ana turi i mua Jisas ka hua ake poroo, “Te Ariki, kime koe e ruu, akoe e nani te mee ina anau ki taurekareka muri.”

3Jisas ku hakatae atu tana rima no paa i te ia ka hua ake, “Anau e ruu. Akoe ku taurekareka muri!” I te vaa naa koi te maki te tama naa ku oti ka taurekareka muri. 4Ku hua ake roo Jisas ki te ia, “Hakarono! Teeai ki hua ake ki he tama. Koia hano loo hakkite atu te pris, ku tooatu roo tau ofa pai Moses ni hua ai i te raa raa ki illoa ai naa tama poro te maki aau ku oti.”

Te poe te hamaatua naa soldia Rom e mee ina Jisas no taurekareka

(Luk 7.1-10)

5Te vaa Jisas ni hanatu ki loto te taon Kapenaum, e mee te hamaatua naa soldia Rom ni hanake ki te ia no tani ake ki huia te ia: 6“Te Ariki, taku poe e maki ka moe i te hare. Aia e mmate tana huaitino ka rono te isu.”

7Ku hua ake roo Jisas ki te ia, “Anau raa ka hanatu no mee ina te ia ki taurekareka.”

8Koia te hamaatua hua ake, “Te Ariki, anau e teeai he tama taurekareka ki nani ai koe te au ki loto taku hare. Tino hua naa hua, anaa taku poe raa ka taurekareka. 9Anau hoki he tama e hekau i laro naraa hamaatua ma e mee hoki naa soldia e hekau i laro aaku. Anau e hua ake ki tenaa tama poroo, ‘Hano!’, aia raa ka hano; ma ki tenaa tama, ‘Mai kaa!’, aia raa ka au. Anau e hua ake ki te poe aaku poroo, ‘Mee te mee nei!’, aia raa ka tautari.”

10Tevaa Jisas ni rono i naa hua nei, ku oho roo ana mouri ka hua ake ki naa tama tautari ake i te ia, “Anau e hua atu i te hamaauri, anau hikiai roo ki kite he tama i loto Israel e lootu hamaauri peenei i te nau. 11#Luk 13.29.Anau e hua atu ki koutou, purima naa tama koai e teeai ni Jiu raa ka oomai i te taha te anake ma te laki no nnoho ma Abraham, Aisak, ma Jekop i te kai hamataku i loto te Mataapaa te Vaelani. 12#Mat 22.13; 25.30; Luk 13.28.Koia laatou koai ni tukua ki noho ria te Mataapaa raa ka riakina ki loto te pouri, te kuana laatou raa ka ttani ka kkai naa niho laatou.”

13Ku hua ake roo Jisas ki te hamaatua naa soldia, “Ahe muri ki te hare aau, te poe aau raa ku taurekareka i te koe ni iloa poro te Tama Hamataku e nani te huia te ia.”

Te vaa naa koi, te poe te hamaatua naa soldia Rom raa ku taurekareka muri.

Jisas e mee ina purima naa tama mmaki no taurreka

(Mak 1.29-34; Luk 4.38-41)

14Jisas ni hanatu ki loto te hare Pita no kite roo i te tinana te avana Pita e maki ka taakoto i te hoa. 15Ku tuku atu roo Jisas tana rima no paa i te rima aana no mahana roo te maki hakataha i te ia, ku mahike roo ki aruna no kaamata kaa mee naa kai Jisas.

16I te ahiahi laatou ni too ake purima naa tama mmaki ma naa tama e uruhia naa anana hakarria ki Jisas. Ku hakataha ina roo Jisas naa anana hakarria ka taurreka katoo naa tama mmaki. 17Aia hua peenei tautari i naa hua te Tama Hamataku ni huatia te profet Asaia poroo,

“Aia hokoia ni hhau naa maki taatou

ka hakataha ina naa maki katoo taatou.”

18Tevaa Jisas ni kite poro purima naa tama e aareha i te ia, ku hua ake roo te ia ki naa disaipol aana ki oo ki telaa taha te vai. 19Ku hanake roo te tisa hokotahi te Loo no hua ake, “Tisa, anau e aarere ki hano ma koe ki te kuana heaa akoe e hano.”

20Ku hua ake roo Jisas ki te ia, “Naa manu kaitama e mee naa rua laatou, naa manu e mee naa ohana laatou, koia te Tama te Tama e tee hai kuana ki taakoto ka hakamaahia.”

21Tenaa tama, he tama i naa disaipol aana, hua ake ki te ia, “Te Ariki, tiake mua anau ki hano muri no tanu taku tamana.” 22Koia Jisas hua ake ki te ia, “Tautari mai i te nau, ku tiake naa tama mmate ki tanu naa tama mmate roo laatou.”

Jisas e tinai te matani haiao

(Mak 4.35-41; Luk 8.22-25)

23Ku kake roo Jisas i te poki, naa disaipol aana ni oo ma ia. 24Te huai te matani ni hakateki ka rrau ake i laatou i te tai no peau ka apuru puru te poki. Koia Jisas e taakoto ka moe. 25Naa disaipol ku ooatu roo hakaoho Jisas ka hua ake, “Te Ariki, hakahao taatou! Taatou raa ka apuru no marremu!”

26Ku hua ake roo Jisas ki laatou, “Ai kuu aa koutou ku mattaku? Ai kuu aa koutou tee mannatu haiao i te Tama Hamataku?” Ku mahike roo Jisas no hua ake ki te matani ma te peau ki ttuku no marino muri roo.

27Naa disaipol ni mannatu tammaki ka hua poroo, “Ai koai nei? Aia e hua ki te matani ma te peau, ku hakarono roo laatou ki te ia!”

Jisas e hhana naa anana hakarria i te hiaoa taanata

(Mak 5.1-20; Luk 8.26-39)

28Tevaa Jisas ni pakuu atu ki telaa taha te matakaaina Gadara, te hiaoa taanata e uruhia naa anana hakarria ni oo ake i naa taaruma no ttiri roo ma ia. Laaua e ttara roo ka tee nani he tama te hanatu i te haarena naa. 29Laaua ni vaha ka hua ake, “Akoe te Tamarikiriki te Tama Hamataku, akoe e au ki loo karapuhi ina maaua ma tevaa hikiai ki tae?”

30Te huai te raena peki e ttuu hakammao ka kkai. 31Naa anana hakarria naa ku varo hamataku ake ki Jisas, “Kime akoe e mee ki kereia maatou hakataha, ku hakauna roo maatou ki oo ki roto naa peki.”

32Ku hua ake roo Jisas ki laatou, “Huro!” Ku hhae roo laatou ka oo no herruhi i loto naa peki. Naa peki katoo naa ni heheau ka ooatu i te taha te mouna no rruku roo ki loto te vai no marremu ka mmate.

33Naa tama ni anaana naa peki ku heheau roo no hakatere te lono i heaa ni hhae ki naa taanata ni uruhia naa anana hakarria. 34Naa tama katoo i loto te taon naa ni ooatu ki Jisas. I te vaa laatou ni ttiri ma ia, ku hua ake roo laatou i te ia ki hano hakataha i te matakaaina laatou.

Currently Selected:

Matiu 8: NUR

Highlight

Compare

Copy