Matiu 7

Teeai ki hakatau ina telaa tama

(Luk 6.37,38,41,42)

1“Koutou teeai ki hakatau ina naa tiputipu naraa tama, ki teeai ki hakatau hoki te Tama Hamataku naa tiputipu autou. 2#Mak 4.24.Te Tama Hamataku raa ka hakatau ina koutou tautari pai koutou e hakatau naraa tama. He hakatau pehee autou e hakatau naraa tama, te hakatau naa hoki te Tama Hamataku raa ka kavatu i koutou.

3“Ai koe e mmata ai i te otaota i loto te kanomata too kave ka teeai ki mmata koe i te laakau e taakoto i too kanomata?! 4Akoe e nani pehee te hua ake ki too kave, ‘Mai ki ppihi te otaota i too kanomata,’ i tevaa akoe roo e tee kite i te laakau i too tino kanomata?! 5Akoe he tama hua kailehi! Akoe ki hakataha ina mua te laakau i too kanomata, ki oti naa akoe ku kite hakaraaoi te hakataha ina te otaota i te kanomata too kave. 6Teeai ki kavake naa mee e ttapu te Tama Hamataku ki naa manu kaitama, kime teeai, laatou raa ka tino huri atu no kaina te koe. Akoe teeai ki riakina au moromoro i mua naa peki, laatou raa ka tino taka taka hia i laatou vae.

Kainnoo, heaki, pakuu

(Luk 11.9-13)

7“Koutou e kainnoo, te mee raa ka kavatu ki koutou; heaki, koutou raa ka kkite, pakkuu i te totoka, te totoka raa ka taaraki ki koutou. 8Naa tama katoo koai e kainnoo laa ka too naa mee laatou; naa tama e heaki raa ka lave; te tama e pakuu i te totoka, te totoka raa ka taaraki ki te ia.

9“Koai i koutou, kime tana tama e kainnoo i he haraoa, aia raa ka kavake he hatu? 10Ai kime aia e kainnoo i he ika, aia raa ka kavake he kata? 11Kime koutou naa tammana hakarria e illoa te kavake naa mee taurreka ki au tama, koutou mannatu poro te Tamana autou i te vaelani tee nani te kavake naa mee taurreka ki naa tama koai e kainnoo i te ia?

12 # Luk 6.31. “Ni mee pehee autou e rruu i naraa tama kii mee i koutou, koutou hoki kii mee peenaa i laatou: Anei ko naa Loo Moses ma naa hua naa profet ni hua ai.

Herruhi ki loto te tama totoka

(Luk 13.24)

13“Herruhi ki loto te totoka punarikiriki, e mee i te totoka ki te kuana hakariaria e tahana ma te haarena e hano ki te kuana naa e hainauhie. Purima tama e tautari te haarena naa. 14Koia te totoka ki te ora e punarikiriki ma te haarena ki hano ai e haka naenae, naa tino ruai tama e kkite ka tautari ai.

Te laakau ma naa hua aana

(Luk 6.43,44)

15“Koutou ki mmata hakaraaoi i naa profet kairrehi, laatou raa ka ooatu ki koutou pai ni sipsip, koia naa tiputipu laatou e mee pai ni manu kaitama manapuhi. 16Koutou raa ka illoa i laatou i naa tiputipu laatou e mee. Naa tama e teeai ki haki naa hua greip i naa pupu hai tara, ma naa hua fik i naa mouku rroa. 17Te laakau taurekareka raa ka hua naa hua taurreka, te laakau hakariaria raa ka hua naa hua hakarria. 18Te laakau taurekareka e tee nani te hua naa hua hakarria, ma te laakau hakariaria tee nani te hua naa hua taurreka. 19#Mat 3.10; Luk 3.9.Naa laakau katoo e teeai ki hua naa hua taurreka raa ka tuutia ka riakina ki loto te ahi. 20#Mat 12.33.Peenaa koutou ailaa ka illoa i laatou ni profet kairrehi i naa tiputipu naa ora laatou.

Anau teeai ki iloa i koutou

(Luk 13.25-27)

21“Teeai ko naa tama katoo raa ka varo i te nau ‘Te Ariki, te Ariki’ raa ka oo i loto te Mataapaa o te Vaelani, koia laatou naa tino tama e mee heaa taku Tamana i te vaelani e ruu i laatou kii mee. 22I te vaa te Laa te Hakatonu, purima tama raa ka hua mai ki te nau, ‘Te Ariki, te Ariki, i te inoa aau maatou ni hua ake ki naa tama i naa hua te Tama Hamataku, ma i te inoa aau maatou ni hakataha ina purima naa anana, no mee purima naa mirakol!’ 23Anau raa ka hua ake ki laatou, ‘Anau e tee iloa i koutou. Oo hakataha i te nau, koutou ni tama e mee naa tiputipu hakarria.’

Te hiaoa tama e penapena naa hare

(Luk 6.47-49)

24“Koai naa tama e rrono i naa hua aaku nei ka tautari, laatou e mee pai he tama e iloa ka penapena tana hare i aruna naa hatu. 25Te ua ku rrini iho ka rrohi te vai ka oko te huai te matani no paku i te hare, koia te hare e mau, e mee i te hare e hakatuu i aruna naa hatu.

26“Koia koai naa tama e rrono i naa hua aaku nei ka teeai ki tautari, aia e mee pai he tama vvare e penapena tana hare i aruna te kerekere. 27Rrini iho te ua, rrohi te vai ka oko te huai te matani roo paku i te hare no heke iho no pakuu hamataku roo ki laro!”

28 # Mak 1.22; Luk 4.32. Te vaa Jisas ni oti ai te hua naa hua nei, te apiana naa tama naa ni tteki katoo i naa hua aana e ako ake. 29Aia ni teeai kii mee pai ko naa tisa naa Loo; aia ni ako naa tama ma te haiao pai he tama e iloa hamataku.

Currently Selected:

Matiu 7: NUR

Highlight

Compare

Copy