Matiu 6

Kavake naa mee i naa tama tee hai mee

1 # Mat 23.5. “Mmata hakaraaoi, koutou teeai kii mee naa tiputipu te lootu ki kkite ai naa tama poro koutou ni tama e lootu maauri. Kime koutou e mee peenaa, koutou tee nani te too te tavi koutou e kavatu te Tamana autou i te vaelani.

2“Tevaa koe e kavake ni mee ma naraa tama, teeai ki haka hii vaanana kaa mee he mee hamataku pai ko naraa tama e mee i loto naa hare lootu ma i naa haarena, ki hakanau ai naa tama i laatou. Anau e hua atu i te hamaauri ki koutou, naa tama naa ku oti te too te tavi katoo laatou. 3Koia i tevaa akoe e huia te tama e tee hai mee, akoe kii mee teemuu ki tee nani te hakahoa aau i oo taha e iloa. 4Mee raa ka taakoto pai he mee akoe ni kavake teemuu ma te manava aroha. Te Tamana aau koai e kite heaa akoe e mee teemuu raa ka tauvia te koe.

Hakaruma

(Luk 11.2-4)

5 # Luk 18.10-14. “I te vaa koutou e hakaruma, koutou teeai kii mee pai ko naa tama hua kairrehi! Laatou e rruu ki ttuu i loto naa hare lootu ma naa taha haarena ka hakaruma ai ki kkite naa tama katoo. Anau e hua atu i te hamaauri, laatou ku oti te too katoo laatou tavi. 6Koia i tevaa koe e hakaruma, koe ku hano ki te kuana moemoe no ppui te totoka ku hakaruma roo ki autou Tamana koai taatou e tee nani te kkite. Autou Tamana koai e kite heaa koutou e mee teemuu, raa ka tauvia koutou. 7Te vaa koutou e hakaruma, teeai ki hua ni purima hua pai ko naa tama te pouri e tautari; laatou e mannatu poro naa ariki laatou raa ka rrono i purima naa hua laatou e hua. 8Koutou teeai ki tautari i laatou. Te Tama Hamataku autou kunaa iloa heaa koutou e rruu i tevaa koutou e hhiri ake ki te ia.

9“Koutou ki hakaruma peenei:

‘Tamana maatou i te vaelani,

too inoa tapu ki hakanau ria,

10koe ki au no noho mo kini i maatou,

heaa koe e ruu ai ki hura i te kerekere,

e mee pai ko i aruna i te vaelani.

11Kamai ni kai ma maatou ki nani i te laa nei.

12Rano too roto i naa takahara maatou ni mee,

pai ko maatou e rano teroto i naa takahara naraa tama nii mee i maatou.

13Teeai ki tiake naa tiputipu hakarria ki hakaari ina maatou,

koia hakahao ria maatou i naa haiao te tama hakariaria.’

[E mee i te Mataapaa raa, teenaa he mataapaa aau;

naa haiao hamataku, teenaa ni haiao aau;

anaa naa tama katoo ni hua taurreka i te koe i naa vaa katoo.

E maauri!]

14 # Mak 11.25,26. “Kime koutou e rano teroto i naa takahara naraa tama nii mee i koutou, te Tamana autou i te vaelani raa ka rano teroto hoki i naa takahara autou. 15Koia kime koutou e teeai ki rano teroto i naa takahara laatou, te Tamana autou hoki raa ka tee nani te rano teroto i naa takahara autou nii mee.

Te vaa koutou e hakatapu ki teeai ki kkai

16“Tevaa koutou e hakatapu koutou ki teeai ki kkai, koutou teeai ki huri hakaaroha naa kanomata autou pai ko naa tama e hua kairrehi e mee. Laatou e huri hakaaroha naa kanomata laatou ki kkite naa tama poro laatou e hakatapu laatou ki teeai ki kkai. Anau e hua atu hamaauri i koutou, laatou ku oti te too katoo te tavi laatou. 17Tevaa koutou e hakatapu koutou ki teeai ki kkai, koutou ku mmuru naa rauru autou i naa roro ka heruheru ku veku roo autou kanomata, 18ki tee nani ai naraa tama te illoa poro koutou e teeai ki kkai, tino Tamana autou koai taatou e tee nani te kkite, e iloa. Te Tamana autou koai e kite heaa autou e mee teemuu raa ka tavi koutou.

Hakatipu naa hekau ma naa mani i te vaelani

(Luk 12.33,34)

19 # Jas 5.2,3. “Koutou teeai ki hakatipu purima naa mani ma naa hekau autou i aruna te kerekere nei, te kuana naa ronarona ma naa ros raa ka mee ina no takahara, ma naa tama huuhuu hekau raa ka haahaa naa hare ka huu. 20Koia hakatipu naa mani ma naa hekau autou naa i te vaelani i aruna, ki tee nani ai naa ronarona ma naa ros te mee takahara, ma naa tama huuhuu hekau e tee nani te haahaa no huu. 21Te kuana naa hekau aau e takkoto ai too manava raa ka taakoto ai hoki.

22“Naa kanomata taatou e mee pai he lamu naa huaitino taatou. Kime naa kanomata aau e taurreka, te huaitino aau katoo raa ka maahina. 23Koia kime naa kanomata aau e hakarria, te huaitino aau hoki raa ka pouri. Ai kime naa kanomata aau tee hakamaahina ki loto too manava, too manava raa ka pouri hamataku loo.

24“Tee hai tama hatapatapa e nani te hekau i te hiaoa hamaatua; te tama naa raa ka ruu i te tama hokotahi ka ten'taa i telaa tama; aia raa ka hakarono hua i te hamaatua nei ka tee hakarono hua i te hamaatua laa. Koutou tee nani te hekau i te Tama Hamataku ma naa mani natahi.

Koutou teeai ki mannatu tammaki

25“Anaa e hua atu ai anau ki koutou, teeai ki mannatu tammaki i naa ora koutou ma naa kai koutou ki kkai, naa huaitino autou, ma ni aa koutou ka uhiuhi. Te ora e hamataku i aruna naa kai, ma te huaitino i aruna naa kahukahu. 26Mmata kaa i naa manu te kaniva, laatou e tee illoa te ttoki ma e hanaopo naa kai, laatou e tee hai hare ki tuku ai laatou kai; te Tama Hamataku roo e haanai laatou. Koutou naa tama e hamattaku roo i aruna naa manu! 27Koai i koutou e maanatu tamaki i tana ora e nani te hukurui mai he laa vaa ki tana ora? 28Ai koutou e mannatu tammaki ai i naa hiapo? Mmata kaa i naa kaute e hhomo pehee: Laatou e teeai ki hekau ka penapena ni kahukahu ma laatou. 29Koia anau e hua atu ki koutou, te Kini Solomon ma naa hekau taurreka katoo aana e tee hai ana kahukahu e mmata taurekareka pai ko naa kaute nei. 30Anaa ko te Tama Hamataku e hakauhiuhi naa mouku te pupu, naa mouku e takkoto anei, taiao ku teeai, ku riakina ka tunia i te ahi. Ea raa, te Tama Hamataku raa ka tee nani te hakauhiuhi ina koutou? Ai kuu aa koutou tee mannatu haiao i te Tama Hamataku!

31“Koutou teeai ki mannatu tammaki ka hua poroo, ‘Niaa taatou ka kkai?’ ma ‘Niaa taatou ka inu?’ ma ‘Niaa taatou ka uhiuhi?’ 32Anei ko naa mee naa tama te pouri e mannatu hamataku ai. Te Tamana autou i te vaelani e iloa i naa mee katoo autou e rruu ai, 33koia koutou ki mannatu mua i naa mee te Mataapaa te Tama Hamataku ma heaa aia e ruu i koutou kii mee, ki nani ai aia te kavatu naa mee katoo nei ki koutou. 34Teeai ki mannatu tammaki heaa koutou raa kaa mee taiao, ttari ki taiao aa koutou ku mannatu heaa koutou kii mee. Naa laa katoo e mee naa taenaha.

Currently Selected:

Matiu 6: NUR

Highlight

Compare

Copy