Matiu 5
5
Jisas e hikuru naa tama i aruna te mouna
(Luk 6.20-23)
1Tevaa Jisas ni kite i purima naa tama, ku hano roo ki aruna te tam'tamaa mouna no noho ai. Naa disaipol aana ku oo ake no haka areha i te ia, 2ku kaamata roo aia ka hikuru laatou:
Te hiahia hamaauri
(Luk 6.20-23)
3“Naa tama e illoa poro laatou e tee hai mee i naa mee te Tama Hamataku, raa ka haia hakaraaoi ina roo te Tama Hamataku,
e mee i te Mataapaa te Vaelani he kuana laatou.
4Naa tama e ttani raa ka haia hakaraaoi ina roo te Tama Hamataku,
e mee i te Tama Hamataku raa ka mee hakaraaoi.
5Naa tama e tuku laatou ki laro, raa ka haia hakaraaoi ina roo te Tama Hamataku,
e mee i laatou raa ka too heaa te Tama Hamataku ni hua ake hamaauri ai.
6Naa tama e rruu hamataku ki tautari i naa tiputipu taurreka, raa ka haia hakaraaoi ina roo te Tama Hamataku,
e mee i te Tama Hamataku raa ka mee hakaraaoi.
7Naa tama e manava aroha i naraa tama, raa ka haia hakaraaoina roo te Tama Hamataku,
e mee i te Tama Hamataku raa ka manava aroha i laatou.
8Naa tama e tee hai takahara, raa ka haia hakaraaoi ina roo te Tama Hamataku,
e mee i laatou raa ka kkite i te Tama Hamataku.
9Naa tama e hekau ki hura te noho e taurekareka, raa ka haia hakaraaoi ina roo te Tama Hamataku,
e mee i te Tama Hamataku raa ka varoina laatou poro ni tamarriki aana.
10 #
1 Pe 3.14. Naa tama e haia hakariaria ina e mee i laatou e tautari i naa tiputipu taurreka, raa ka haia hakaraaoi ina roo te Tama Hamataku,
e mee i te Mataapaa te Vaelani he kuana laatou.
11 #
1 Pe 4.14. “Koutou ki hiahia kime naa tama e tau koutou ka taaia koutou ka hua purima naa hua kailehi i koutou e mee i koutou e tautari i te nau. 12#Hekau 7.52.Manava laoi ka hiahia, e mee i te tavi hamataku autou e taakoto mai i te vaelani. Teenaa naa profet i te raa raa ni mee ina hakarria hoki.
Te horo ma te maahina te kerekere
(Mak 9.50; Luk 14.34,35)
13 #
Mak 9.50; Luk 14.34,35. “Koutou e mee pai ni horo te kerekere. Koia kime te taurekareka te horo ku teeai, raa ka mee ina pehee ki taurekareka muri? Naa horo peenaa ku hakarria ku riakina roo ki haho no taka taka naa tama i laatou vae.
14 #
Jon 8.12; 9.5. “Koutou e mee pai ko te laiti te kerekere. Te taon e tuu i aruna te tam'tamaa mouna e tee nani te ruru. 15#Mak 4.21; Luk 8.16; 11.33.Tee hai tama e hakkati te lamu ku tuku roo i laro te tihi. Teeai. Laatou e hakatuu i aruna te mee e hataakoto ai te lamu ki maahina i naa tama katoo i loto te hare. 16#1 Pe 2.12.I te haarena naa, koutou ku tiake naa laiti autou ki maahina i naa kanomata naa tama, ki nani naa tama te kkite i naa tiputipu taurreka autou e mee ku hakanau roo laatou ka hhau te inoa te Tamana autou e noho i te vaelani.
Naa hua i naa Loo
17“Koutou teeai ki mannatu poro anau e au ki loo hakataha ina naa Loo Moses ma naa hua naa profet. Teeai. Anau e au no haia heaa laatou ni hikuru atu ki hamaauri. 18#Luk 16.17.Anau e hua atu i te hamaauri, ki nani roo te vaelani ma te kerekere nei e oti, raa ka teeai roo he hua hokotahi raa ka mahana i naa hua naa Loo. 19Kime he tama e teeai ki hakarono hua ka tautari he loo i naa tam'tamaa loo nei ka hua naraa tama ki tautari ake i te ia, te inoa te tama naa raa ka taakoto punarikiriki roo i te Mataapaa te Vaelani. 20Anau e hua atu ki koutou: Kime naa tiputtipu koutou e mee koi pai ko naa tiputtipu naa tisa naa Loo ma naa Faarisi, koutou raa ka tee nani te herruhi i loto te Mataapaa te Tama Hamataku. Koutou ki tautari hakaraaoi i te ruu te Tama Hamataku i naa tiputtipu koutou.
Teeai ki tinai te tama ki mate
21“Koutou ku oti te rrono i naa hua ni kavake ki naa tippuna autou i te raa raa poroo,
‘Teeai ki tinai te tama ki mate;
kime he tama e tinai te tama ka mate,
aia raa ka kooti ina.’
22“Koia anei anau e hua atu ki koutou: Kime he tama e hat'roto i tana kave, aia raa ka kooti ina. Kime aia e varo ake ki tana kave, ‘Akoe he tama hakariaria!’, aia raa ka tooa ki te kansol. Ai kime aia e hai ake tana kave poro aia he tama vvare, aia raa ka hano i te kuana te ahi tee nani te mate.
23“Anaa kime aia e too ake tana ofa ki te olta, koia ku maanatu roo i tana kave e mee naa hua hakarria i te ia, 24tiake te ofa aana i mua te olta ku hano mua roo no hakatonu naa hua ma tana kave, ki oti aia ku au muri no kavake tana ofa ki te Tama Hamataku.
25“Kime he tama e mee ki kooti ina koe, tevaa kourua koi oo i te haarena, akoe ki hakavave ka hakatonu naa hua ma ia. Kime teeai, koe raa ka tooa te tama naa ki te tama e hakarono te kooti, ku tukua roo koe i naa rima naa polis no karapuhi ina. 26Anau e hua atu i te hamaauri, akoe raa ka tee nani te hhae ki haho ki nani roo te koe e tavi te kooti katoo aau.
Teeai ki moe ma te avana telaa tanata
27“Koutou ku oti te rrono i naa hua te Loo e hua poroo,
‘Teeai ki moe ma te avana telaa tanata.’
28“Koia anei anau e hua atu i koutou: Kime he tama e mmata i te hahine ka vaanana ki moe ma ia, aia ku oti te mee te takahara i loto tana manava. 29#Mat 18.9; Mak 9.47.Kime too kanomata i too maua e mee ina koe no mee te tiputipu takahara, hanahia ka tiria ki haho! E taurekareka i he kuana hokotahi i tau huaitino e teeai ma tau huaitino katoo e tiria i te ahi. 30#Mat 18.8; Mak 9.43.Kime too rima maua e mee ina koe loo mee te takahara, tuutia hakataha ka tiria! Mee e taurekareka i he kuana hokotahi i tau huaitino e teeai ma tau huaitino katoo e tiria i te ahi.
Te tama e kereia tana avana
(Mat 19.9; Mak 10.11,12; Luk 16.18)
31 #
Mat 19.7; Mak 10.4. “E mee hoki naa hua e huatia i mua poroo, ‘Kime he tama e kereia tana avana, aia ki taataa he peepaa i mua no kavake, ki hakkite ake poro laaua ku teeai ki avvana.’ 32#Mat 19.9; Mak 10.11,12; Luk 16.18; 1 Korin 7.10,11.Koia anei anau e hua atu ki koutou: Kime he tanata e kereia tana avana koia te hahine naa ni teeai kii mee ni takahara, te tanata naa ku mee te takahara ka haia te hahine naa no mee te tiputipu takahara kime te hahine naa ku avana muri; anaa telaa tanata koai e avana i te hahine naa kuu mee te takahara hoki.
Naa hua e ttiri
33“Koutou ni rrono hoki i naa hua nei ni kavake ki naa tippuna autou i mua: ‘Ni hua pehee autou nii mee i te Ariki Hamaatua, koutou ki mee ina naa hua naa ki hamaauri, koutou teeai ki hua kailehi.’ 34#Jas 5.12; Mat 23.22.Koia anei anau e hua atu ki koutou: Koutou teeai ki ttiri ni hua haka haiao poro anaa ni hua hamaauri. Koutou teeai ki ttiri ni hua i loto te inoa te vaelani, e mee i tena he kuana te Tama Hamataku e noho ai. 35Koutou hoki teeai ki ttiri ni hua i loto te inoa te kerekere, e mee i tena he kuana naa vae aana e tuku ai. Koutou teeai ki ttiri hoki ni hua i loto te inoa Jerusalem, e mee i tena he taon te Kini hamataku. 36Koutou teeai ki ttiri hoki ni hua ka ttapa naa pokouru koutou ki haka haiao naa hua koutou, e mee i koutou tee nani te mee he rauru ki maatea ma ki riparara. 37Tino hua ‘Iinoo’ ma ‘Teeai’; naraa hua aau e hua e au i te tama hakariaria.
Teeai ki hakaahe muri te takahara tenaa tama
(Luk 6.29,30)
38“Koutou ni rrono i naa hua e hua poroo, ‘Kime he tama e mee ina te kanomata tenaa tama no takahara, koutou ku mee ina hoki tana kanomata ki takahara, ai kime he tama e hatia te niho tenaa tama koutou ku hatia hoki tana niho.’ 39Koia anei anau e hua atu i koutou: Teeai ki hakaahe muri naa takahara te tama e mee i te koe. Kime he tama e rriki too paiaha, huri atu hoki telaa taha paiaha ki rikitia.
40“Ai kime he tama e kooti ina koe ki too tau kahukahu, kavatu te kahukahu haumakariri hoki aau ki too ia. 41Kime he tama e mmiri ki hano koe he mael hokotahi, hano ma ia he hiaoa mael. 42Kavake ki te tama koai e kainnoo atu i he mee, ka teeai ki tahuri hakataha i te tama koai e mee ki tinao i te koe.
Manava laoi i naa tama e haekotia koutou
(Luk 6.27,28,32-36)
43“Koutou ni rrono hoki i naa hua e hua poroo, ‘Manava laoi i naa tama i oo taha ka ten'taa i naa tama e haekotia koutou.’ 44Koia anau e hua atu ki koutou: Manava laoi i naa tama e haekotia koutou ka hakaruma i laatou koai e mee hakariaria koutou, 45ki nani ai koutou te mee pai ni tamarriki te Tamana autou i te vaelani. Aia e hakamaahina iho te laa aana i aruna naa tama takahara ma naa tama taurreka natahi, ka hakauna iho te ua i aruna naa tama taurreka ma naa tama takahara natahi. 46Kime koutou e manava laoi koi i naa tama e manava laoi i koutou, he tavi pehee autou raa ka too?! Naa tama tootoo takis e tautari hoki peenaa! 47Ai kime koutou e mee hakaraaoi i naa tino kave autou, he taurekareka pehee autou e hakkite i naraa tama? Naa tama teeai ki lootu i te Tama Hamataku e tautari hoki peenaa. 48Mee naa ora koutou ki ttonu pai ko te Tamana autou i te vaelani e tonu katoo.
Currently Selected:
Matiu 5: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
