Matiu 4

Satan e hakaari Jisas

(Mak 1.12,13; Luk 4.1-13)

1 # Heb 2.18; 4.15. Te Aitu Tapu ku hattaki Jisas ka too ki loto i te kuana tino kerekere ka tee hai vai ki nani Satan te hakaari ina te ia. 2Aia ni noho no nani te tipu haa naa laa ma naa poo e teeai ki kai, ku rono roo te ia i tana hiikai. 3Ku hanake roo Satan ki te ia no hua ake, “Kime koe ko te tama te Tama Hamataku, hua ake ki naa hatu nei ki huri mo haraoa.”

4Koia Jisas hua ake, “Naa hua e ttapu te Tama Hamataku e hua poroo:

‘Naa tama katoo e tee nani te nnoho ora i naa tino haraoa,

koia laatou ki tautari katoo i naa hua e au i te pukua te Tama Hamataku.’ ”

5Ki oti Satan ku too Jisas ki Jerusalem, te taon e tapu, no hakatuu roo i te tuaa hare hakaoti te Hare tapu. 6Ku hua ake roo ki te ia, “Kime koe ko te tama maauri te Tama Hamataku, koe ku hopo ki laro, e mee i naa hua e ttapu e hua poroo:

‘Te Tama Hamataku raa ka hua ake ki naa ensol aana ki mmata iho i te koe;

laatou raa ka tauhi ake te koe i laatou rima,

ki tee nani ai oo vae te ttuki i naa hatu.’ ”

7Ku hua ake roo Jisas ki te ia, “Koia naa hua e ttapu te Tama Hamataku e hua hoki poroo,

‘Teeai ki hakaari ina te Ariki Hamaatua, tau Tama Hamataku.’ ”

8Satan ku too muri Jisas ki te mouna mau aruna hamataku no hakkite ake roo naa matakaaina katoo te kerekere nei ma naa haiao ma naa taurreka laatou. 9Ku hua ake roo ki Jisas, “Anau raa ka kavatu naa kuana nei katoo kime akoe e tuu i oo turi no lootu i te nau.”

10Ku hua ake roo Jisas ki te ia, “Satan, hano hakataha i te nau! Naa hua e ttapu te Tama Hamataku e hua poroo,

‘Lootu i te Ariki Hamaatua, tau Tama Hamataku, ka hekau i te ia hokoia!’ ”

11Ku hakataha roo Satan i Jisas. Naa ensol ni oo ake no huia roo Jisas.

Jisas ku kaamata ana hekau i Galili

(Mak 1.14,15; Luk 4.14,15)

12 # Mat 14.3; Mak 6.17; Luk 3.19,20. Tevaa Jisas ni rono poro Jon ku karapuhi ina, ku ahe muri roo ki Galili. 13#Jon 2.12.Koia aia ni teeai ki noho i Nasaret, aia ni hano loo noho i Kapenaum, te taon e tuu i naa taha te Tai Galili i loto te matakaaina Sebulun ma Naptali. 14Aia ni hano ki te kuana naa ki hamaauri naa hua Asaia te profet ni hua ai poroo:

15“Naa matakaaina Sebulun ma Naptali,

e ttuu i te haarena e hano no hopo atu ki te tai,

i telaa taha te Riva Jodan,

i loto Galili, te matakaaina naa tama e teeai ni Jiu!

16Naa tama e nnoho i loto te poouri

raa ka kkite i te maahina hamataku.

Koai laatou e nnoho i te kuana poouri o te mate,

laatou raa ka kkite i te maahina.”

17 # Mat 3.2. I te vaa naa Jisas ku kaamata ka hua ake ki naa tama: “Huri tua i naa tiputipu takahara autou. Te Mataapaa te Vaelani ku taapiri ki au!”

Jisas ku varo naa tama mua ki hekau ma ia

(Mak 1.16-20; Luk 5.1-11)

18Jisas e hano i te tahuahua te Tai Galili no kite roo te haanau, Saimon (e ttapa i Pita) ma tana kave tanata Andru, laaua e ttiri te ave i loto te tai, e mee laaua ni tama haanota. 19Jisas hua ake, “Oomai loo tautari i te nau. Anau raa ka hakailoa kourua ki hutihuti naa tama.” 20Laaua ni hakavave roo ka tiake naa ave laaua ku tautari roo i te ia.

21Hanatu peelaa atu no kite roo telaa haanau, Jems ma Jon, naa tama Zebedi. Laaua e nnoho i te poki ma te tamana laaua Zebedi, e aarere ki riaki laatou ave. Ku varo ake roo Jisas ki laatou. 22Hakavave roo laaua ka tiake te poki ma te tamana laaua, ku oo roo no tautari i Jisas.

Jisas ku mee ina naa tama mmaki loo taurreka

(Luk 6.17-19)

23 # Mat 9.35; Mak 1.39. Jisas ni hano ki naa kuana katoo i Galili, ka hakailoa naa tama i loto naa hare lootu laatou, ku hua ake roo i naa hua taurreka o te Mataapaa te Tama Hamataku. Ku hakataha ina roo naa maki katoo nii mee i naa huaitino laatou. 24Te lono aana ni tere i naa kuana katoo i Siria, ku oo ake roo naa tama ma naa tama koai e mmaki. Naa maki pai naa tama e haia naa anana hakarria, naa tama e huaitino mmate, naa tama e ppore kaa mee pai e hopokia, ku hakataha ina roo Jisas naa maki katoo laatou. 25Te apiana naa tama i Galili, Dekapolis, Jerusalem, Judia, ma naa matakaaina i telaa taha te Riva Jodan ni oo tautari i te ia.

Currently Selected:

Matiu 4: NUR

Highlight

Compare

Copy