Matiu 28

Jisas ku mahike i te mate

(Mak 16.1-10; Luk 24.1-12; Jon 20.1-10)

1Te laa Sapat ku oti, anaa i tevaa te ata i te Laatapu, Meri Magdelin ma telaa Meri ni oo no mmata i te taaruma.

2Hakateki roo e mee te mahuke hamataku; he ensol te Ariki Hamataku ku hano iho i te vaelani no hakatipe te hatu hakataha i te totoka te taaruma ku noho roo i aruna. 3Naa paiaha aana e maahina katoo roo ma naa kahukahu aana e maatea katoo pai he ihi. 4Naa wahi te taaruma ni mmate te mattaku ka herrei no takkoto pai ni tama e mmate.

5Te ensol hua ake ki naa haahine, “Teeai ki mattaku, anau e iloa poro kourua e heaki i Jisas, koai ni rikitia ki te koros ka mate. 6Aia e teeai i kinei; aia ku oti te hakamahike ria muri pai aia ni hua. Oomai no mmata i te kuana aana ni moe ai. 7Kourua oo no hua ake hakavave ki naa disaipol aana, ‘Aia ku oti te hakamahike ria muri i te mate, anaa aia ku hano i mua koutou ki Galili. Koutou raa ka kkite i te ia i kinaa.’ Mannatu heaa anau e hua atu ki kourua.”

8Ku hakavave roo naa haahine ka oo hakataha i te taaruma ma te mattaku koia e pii hoki i te hiahia, ka heheau ki loo hua ake ki naa disaipol aana. 9Hakateki roo Jisas ku ttiri ma laaua no hua ake, “Te manava laoi ki taakoto i kourua.” Ku ooatu roo laaua ki te ia no tauhi naa vae aana, ku lootu roo i te ia. 10Jisas hua ake ki laaua, “Teeai ki mattaku. Oo no hua ake ki naa kave aaku ki oo ki Galili. Laatou raa ka kkite i te nau i kinaa.”

Naa hua naa soldia e wahi te taaruma

11Tevaa naa haahine ku oo i te haarena laaua, e mee naa soldia ni wahi te taaruma ni ahe muri ki te taon no hua ake ki naa pris hamaatua heaa nii mee i te taaruma. 12Naa pris hamaatua ni kkutu ma naa hamaatua naa Jiu ki mannatu heaa laatou kii mee. Ku kavake roo te koina mani hamataku ki naa soldia 13ka hua ake ki laatou, “Koutou raa ka hua poro naa disaipol aana ni oomai i te poo no huu roo te huaitino aana i tevaa koutou e mmoe. 14Kime naa hua nei e ttae ki te Hamaatua Rom, maatou raa ka hua ake poro koutou e hua hamaauri, anaa koutou raa ka tee hai mee ki mannatu tammaki ai.” 15Naa soldia ku too naa mani ku tautari roo heaa naa hamaatua ni hua ake ai. Anaa te lono i naa hua nei ni hano areha i loto naa Jiu loo nani i te laa nei.

Jisas ku hhae ake ki naa disaipol aana

(Mak 16.14-18; Luk 24.36-49; Jon 20.19-23; Hekau 1.6-8)

16 # Mat 26.32; Mak 14.28. Te hanahuru maa tahi disaipol ni oo ki Galili, ki te mouna Jisas ni hua ake ki laatou ki oo. 17Tevaa laatou ni kkite i te ia, laatou ni lootu i te ia, koia naraa tama i laatou nii mee naa mannatu e rua. 18Ku hanake roo Jisas i laatou no hua ake, “Taku Tamana i te vaelani ku oti te kamai naa haiao katoo i te vaelani ma i aruna te kerekere. 19#Hekau 1.8.Oo ki naa tama katoo i naa kuana katoo no mee laatou mo disaipol aaku. Ku paptaisi ina roo laatou i te inoa o te Tamana, te Tama, ma te Aitu Tapu. 20Anaa ku hakailoa ina laatou ki hakarono hua i naa mee katoo aaku ni hua atu ki koutou. Anau raa ka noho roo ma koutou i naa vaa katoo loo nani i te hakaoti naa mee katoo.”

Currently Selected:

Matiu 28: NUR

Highlight

Compare

Copy