Matiu 27
27
Jisas ku tooa ki Pailat
(Mak 15.1; Luk 23.1,2; Jon 18.28-32)
1Haka tap'taiao i tenaa laa, naa pris hamaatua ma naa hamaatua naa Jiu ni hua ki tukua Jisas ki mate. 2Ku hakkapi roo laatou naa rima Jisas i naa heni ka hattaki no kavake ki Pailat, te hamaatua Rom.
Te mate a Judas
(Hekau 1.18,19)
3 #
Hekau 1.18,19. Tevaa Judas, te tama ni kavake Jisas ki naa rima naa tama hakarria, ni kite i laatou e kooti ina Jisas ka tuku naa taenaha i aruna aia, aia ni huri tana maanatu, ku too muri roo te tipu toru naa mani siliva no kavake muri ki naa pris hamaatua ma naa tama hamaatua. 4Ku hua ake Judas ki laatou, “Anau nii mee te tiputipu takahara, te tama aaku ni kavatu ki koutou, aia ni teeai kii mee he hara kuu mee roo koutou ki taia ki mate!”
Hua ake naa tama naa, “Heaa maatou ki mannatu hamataku ai? Anaa he mee roo aau!”
5Ku tiria roo Judas naa mani ki laro i loto te Hare tapu ku hano roo no hakariti hokoia.
6Naa pris hamaatua ni too naa mani naa ku hua ake roo, “Naa loo e hua poro mee e tapu te tuku naa mani nei natahi ma naa mani te Hare tapu, e mee i naa mani naa ni tavi ki taia te tama ka mate.” 7Ku hua natahi roo laatou ki too te mani naa no tavi ai te kerekere e ttapa pai te Kerekere Pota, kii mee ai he kuana ki tanu ai naa tama mmate naa henua mmao. 8Anaa e varo ai laatou te kuana naa “Te Kerekere o te Toto” loo nani roo i te laa nei. 9Anaa heaa naa hua te profet Jeremaia ni hua ai i mua ku hamaauri:
“Ku too roo laatou te tipu toru mani siliva naa,
te koina naa mani naa tama i Israel ni rruu ai ki tauvia te ia,
10anaa ku tavi roo laatou te Kerekere Pota i naa mani naa,
pai te Ariki Hamaatua ni hua mai ki te nau.”
Jisas ku tuu i mua Pailat
(Mak 15.2-5; Luk 23.3-5; Jon 18.33-38)
11Jisas ku tuu i mua Pailat, ku hiri ake roo Pailat ki te ia, “Akoe ko te kini naa Jiu?”
Ku hua ake roo Jisas, “Iinoo, koe naa e hua peenaa.”
12Naa pris hamaatua ma naa hamaatua naa Jiu ni hua purima hua hakarria i te ia, koia Jisas ni teeai ki hua ni hua.
13Ku hiri ake roo Pailat ki te ia, “Akoe e teeai ki rono heaa naa tama e hua i te koe?”
14Koia Jisas ni ten'taa te hua ake ni momo hua, ku mee ina roo Pailat no mannatu tammaki.
Jisas ku tukua ki mate
(Mak 15.6-15; Luk 23.13-25; Jon 18.39—19.16)
15I naa kirimahi katoo i tevaa te Pasova, te hamaatua Rom i naa hutaavaa e hhana te karapuhi hokotahi koai laatou naa Jiu e rruu. 16I te vaa naa e mee te karapuhi e illoa ai laatou, tana inoa Jisas Barabas. 17Anaa i tevaa te apiana naa tama ni kkutu natahi, Pailat ku hiri ake i laatou, “Koai te tama koutou e rruu i te nau ki hattana atu ki koutou: Barabas, ma ko Jisas, te tama e varoina te Mesaea?” 18Pailat kunaa iloa poro naa hamaatua naa Jiu ni kavake Jisas ki te ia e mee i laatou e manava haeo i te ia.
19Tevaa Pailat e noho i loto te hare kooti, te avana aana ku hakauna ake naa hua: “Akoe teeai ki mee he mee i te tama naa. Te tama naa e tee hai hara nii mee. Taku manava e teeai roo ki taurekareka e mee i te moe hakariaria aaku i te ia anaa poo.”
20Koia naa pris hamaatua ma naa hamaatua naa Jiu e haia peenaa i naa tama i te apiana ki hua ake ki Pailat ki hattana Barabas ku taia roo Jisas ki mate.
21Pailat ku hiri ake ki te apiana, “Koai i te toka rua nei e rruu ai koutou ki hattana atu ki koutou?”
Hua ake roo laatou, “Barabas!”
22Hiri ake roo Pailat, “Heaa anau kaa mee i Jisas e varoina te Mesaea?”
Varo ake roo laatou katoo, “Rikitia aia ki te koros!”
23Koia Pailat ku hiri ake, “He hara pehee aana nii mee?”
Laatou ku kaamata ka vaha hamataku: “Rikitia aia ki te koros!”
24Pailat ku kite i te ia ku tee hai hua ki hua, e mee naa tama ku vaha pai ni tama kuu mee ki huhu. Ku too roo aia te vai no veku ana rima i mua laatou katoo ka hua ake, “Anau e tee hai mee kii mee i te mate te tama nei! Nei he mee roo autou hoko koutou!”
25Naa tama katoo ku hua ake, “Tiake te mate aana ki taakoto i naa rima maatou ma naa tamarriki maatou!”
26Ku hattana roo aia Barabas ka too ake i laatou. Koia aia ku tiake laatou ka taia Jisas ki te wipi, ku too roo ki rikitia ki te koros.
Naa soldia e hua takaro i Jisas
(Mak 15.16-20; Jon 19.2,3)
27Ku hakauna roo Pailat naa soldia ka too Jisas ki tana hare, ku haka areha katoo roo naa soldia i naa taha Jisas. 28Ku uhuuhu roo laatou naa kahukahu Jisas ka hakauhi laatou i te kahiapo mmea i te ia. 29Ki oti ku penapena roo laatou te hau i te mataaraa te laakau e hai tara ka ppono i tana pokouru. Ku tuku roo te laakau i tana rima maua ka ttuu laatou turi i mua aia ka hua takaro i te ia. Laatou hua ake poroo, “Te Kini naa Jiu ki noho i naa vaa katoo!” 30Laatou ku havare i te ia ka too te laakau no rikiriki tana pokouru. 31Tevaa laatou ni oti te takaro i te ia, laatou ku hanahia muri te kahiapo mmea ka hakauhiuhi muri aia i ana kahukahu. Ku hattaki roo aia ka too ki rikitia ki te koros.
Jisas ku rikitia ki te koros
(Mak 15.21-32; Luk 23.26-43; Jon 19.17-27)
32I te vaa laatou ku hhae atu ki haho, laatou ku ttiri ma te tama i Sairin, tana inoa ko Saimon. Ku hua ake haiao roo laatou ki Saimon ki hhau te koros Jisas. 33Laatou ku ooatu ki te kuana e ttapa i Kolkota, e hua poroo, “Te Kuana naa Penu Pokouru.” 34I kinaa laatou ku kavake te waen hakariaria ki inu Jisas; koia aia ni mami ku ten'taa roo te inu. 35Tevaa laatou ku oti te rikitia Jisas ki te koros, laatou ku takaro satu ka vvae naa kahukahu aana i laatou. 36Ku nnoho roo laatou i kinaa ka wahi i te ia. 37I aruna tana pokouru e mee naa hua ni kooti ina ai aia e taataa ka tuku ka taakoto poroo: “Anei ko Jisas, te Kini naa Jiu.” 38I naa taha Jisas laatou ni hakatautau hoki te toka rua tama kairaurau, te tama i tana rima maua ma te tama i tana rima maui.
39Naa tama e hakahara i naa taha naa ku ruru laatou pokouru ka hua takaro ake i Jisas poroo, 40#Mat 26.61; Jon 2.19.“Anaa ko koe nii mee ki heua te Hare tapu ku penapena muri roo i loto naa laa e toru? Huia roo akoe hokokoe! Hepu iho i te koros kime akoe ko te Tama te Tama Hamataku!”
41Naa pris hamaatua, naa tisa naa Loo ma naa hamaatua naa Jiu ni hua takaro hoki peenaa i te ia. 42Laatou e hua poroo, “Aia ni huia naraa tama, koia aia tee nani te huia roo aia! Aia he Kini naa tama Israel! Tiake aia ki hepu iho i te koros, anaa taatou raa ka nani te lootu i te ia. 43Aia e hakarono i te Tama Hamataku ka hua poro aia ko te Tama te Tama Hamataku. Taatou ki mmata kime te Tama Hamataku raa ka au no hakahao ina ia!”
44Te toka rua tama hakarria e ttau i naa taha Jisas nii mee hoki naa hua takaro laaua i te ia.
Jisas ku mate
(Mak 15.33-41; Luk 23.44-49; Jon 19.28-30)
45Tevaa ku tae i te haipelo te kkai, te henua ni opo tia katoo te pouri no tae i naa kiloko e toru i te hakahiahi. 46Ailaa ku nani naa kiloko e toru, Jisas ku tani ka varo hamataku, “Eloi, Eloi, lama sabaktani?” e hua poroo, “Taku Tama Hamataku, Taku Tama Hamataku, ai kuaa koe ku tiake anau?”
47E mee naa tama ni ttuu i kinaa ni rrono ku hua roo poroo, “Aia e varovaro i Elijah.”
48Te tama hokotahi i laatou ku hakavave ka kami no too te kahiapo. Ku hakapara roo i te waen vinega ka tuku i te laakau, ku tuku ake roo i Jisas ki inu. 49Naraa tama e hua poroo, “Tiake ki mmata taatou kime Elijah e hanake no huia aia!”
50Jisas ni tani hakamataku hoki ku hhuti roo tana maanava hakaoti ku mate roo.
51I te vaa naa te hiapo e tautau i te Hare tapu ku mahae i te hiaoa taha, kaamata i aruna no pakuu i laro. Te kerekere ku naue ma naa hatu ku mattohi. 52Naa taaruma ku mahhae ka tarraki, anaa purima naa tama te Tama Hamataku ni mmate ku haka mahhike ria muri no ora. 53Laatou ni tiake naa taaruma, anaa i tevaa Jisas ni mahike, ku oo roo laatou ki loto te Taon e Tapu te Tama Hamataku. Purima naa tama ni kkite i laatou.
54Tevaa te hamaatua naa soldia ma naa soldia koai ni wahi i Jisas ni kkite katoo i te mahuke ma naa mee katoo ni hhae, laatou ni mattaku katoo ka hua, “Hakamaauri roo, aia ko te Tama te Tama Hamataku!”
55 #
Luk 8.2,3. Purima haahine ni ttuu hakammao ka mmata. Laatou ni tautari haare Jisas i Galili ki huia aia i heaa aia e ruu. 56Anaa ko Meri Magdelin, Meri te tinana Jems ma Joses, ma te tinana naa tama Zebedi.
Jisas ku tanumia
(Mak 15.42-47; Luk 23.50-56; Jon 19.38-42)
57I te ahiahi, e mee te tama hai mani i Aramatia ni hanake, tana inoa ko Josep. Aia he disaipol hoki Jisas. 58Josep ni hano ki Pailat no hua ake roo ki kavake te huaitino Jisas, anaa Pailat hua ake ki naa tama ki kavake te huaitino Jisas ki te ia. 59Josep ku too te huaitino Jisas no opo i te hiapo maatea 60ka hakamoe i loto te taaruma hoou aana e penapena i te hatu. Ku hakatipe roo aia te huai te hatu no opo te mata te taaruma ku hano roo. 61Meri Magdelin ma telaa Meri ni nnoho i telaa taha te taaruma ka mmata iho.
Naa soldia e wahi te taaruma
62I tenaa laa, anaa ko te laa te Sapat, naa pris hamaatua ma naa Faarisi ni oo natahi no mmata i Pailat. 63#Mat 16.21; 17.23; 20.19; Mak 8.31; 9.31; 10.33,34; Luk 9.22; 18.31-33.Laatou hua ake, “Maatou e mannatu ake i tevaa te tama e hua kailehi naa koi ora ai, aia ni hua poroo, ‘I muri naa laa e toru anau raa ka hakamahike ria muri no ora.’ 64Kavake ni hua i naa tama e wahi ki wahi i tana taaruma ki nani naa laa e toru, ki tee nani naa disaipol aana te oo no huu tana huaitino ku oo roo no hua ake ki naa tama poro aia ku hakamahike ria muri i te mate. Naa kailehi nei raa ka takahara roo i naa kailehi i mua.”
65Ku hua ake Pailat ki laatou, “Too ni wahi ku oo roo no wahi i te taaruma pai koutou e illoa ki wahi pehee.” 66Ku oo roo laatou no tuku te hakailona te tuku i aruna te hatu te taaruma. Ku tuku roo laatou naa wahi ki rorohi i te taaruma.
Currently Selected:
Matiu 27: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
