Matiu 26
26
Naa Pris hamaatua e hua teemuu ki taia Jisas ki mate
(Mak 14.1,2; Luk 22.1,2; Jon 11.45-53)
1Tevaa Jisas ni oti te hikuru naa tama, ku hua ake roo ki naa disaipol aana, 2“Pai koutou e illoa, e mee naa tino laa e lua ku takkoto kii mee ai te Pasova, anaa te Tama te Tama raa ka tukua laatou i naa rima naa tama takahara no rikitia i te koros.”
3Naa pris hamaatua ma naa hamaatua te henua ni kkutu natahi i te hare Kaiapas te Hai Pris, 4no mee roo naa hua laatou ki tauhia teemuu Jisas ka taia ki mate. 5Koia laatou e hua poro ki teeai ki mee laatou i tevaa te Pasova, i naa tama raa ka hatunaaroto kaa mee ki huhu.
Te hahine e murumuru i Jisas i Betani
(Mak 14.3-9; Jon 12.1-8)
6Jisas ni noho i Betani i te hare Saimon, te tama ni mee ina te leprosi. 7#Luk 7.37,38.Tevaa Jisas ni noho i te teevoo ka kai, e mee te hahine ni hanake ki te ia ma te roka alabasta roro manoni e tavi hamataku no murumuru roo i aruna te pokouru Jisas.
8Naa disaipol ni kkite peenaa ku hatunaaroto roo ka hua ake, “Ai kuu aa aia ku maumau kairehi te roro manoni? 9Te roro naa e nani roo aia te kavake ki he tama ka tavi i te purima mani ku kavake roo naa mani ki naa tama tee hai mee.”
10Jisas e iloa heaa laatou e hua ai, ku hua ake roo ki laatou, “Ai koutou e haia ai te hahine nei? Aia nii mee te mee taurekareka i te nau. 11Koutou raa ka nnoho ma naa tama tee hai mee i naa vaa katoo, koia koutou raa ka tee nani te nnoho ma anau i naa vaa katoo. 12Tevaa te hahine nei ni murumuru te roro manoni i aruna taku huaitino, aia nii mee ki aarere ina anau ki tanumia i te taaruma. 13Anau e hua atu ki koutou i te hamaauri, i naa kuana katoo te kerekere nei naa hua te Tama Hamataku raa ka huatia ai, heaa te hahine nei nii mee raa ka huatia hoki ki mannatu naa tama i te ia.”
Judas e ruu ki kavake Jisas ki naa tama hakarria
(Mak 14.10,11; Luk 22.3-6)
14Te tama hokotahi i te hanahuru ma rua disaipol, tana inoa ko Judas Iskariot, ni hanake ki naa pris hamaatua no hiri ake, 15“Heaa koutou raa ka kamai i te nau kime anau e kavatu Jisas ki koutou?” Ku ppau roo laatou te tipu toru naa siliva mani no kavake ki te ia. 16Kaamata i te vaa naa ka hano Judas ku matamata he haarena ki kavake ai Jisas ki laatou.
Te Kai te Pasova
(Mak 14.12-21; Luk 22.7-13,21-23; Jon 13.21-30)
17I te laa mua te Kai naa Haraoa e tee hai Yis, naa disaipol ni oo ake ki Jisas no hhiri ake, “Te kuana hea akoe e ruu i maatou ki aarere naa kai aau ki kai i te Pasova?”
18Ku hua ake Jisas ki laatou, “Hhuro ki te tama hokotahi e noho i te taon no hua ake roo ki te ia, ‘Te Tisa e hua poroo: Taku vaa ku taapiri mai. Anau raa ka kai te Pasova ma naa disaipol aaku i too hare.’ ”
19Naa disaipol ni tautari pai heaa Jisas ni hua ake ku aarere roo laatou naa kai te Pasova.
20I te ahiahi, Jisas ku noho ki laro ma naa disaipol hanahuru ma rua aana ka kai. 21I te vaa laatou ni nnoho ka kkai, Jisas hua ake ki laatou, “Anau e hua atu ki koutou, te tama hokotahi i koutou raa ka kavake anau ki naa rima naa tama e haekotia anau.”
22Naa disaipol ni mmate te arroha ku kaamata roo ka hua ake laatou taki tahi ki Jisas, “Te Ariki, hamaauri roo, mee teeai ko anau?!”
23Hua ake roo Jisas, “Te tama koai raa ka hakatoko te haraoa aana i te tihi ma anau, aia raa ka kavake anau ki naa tama haekotia anau. 24Te Tama te Tama raa ka mate pai heaa naa hua te Tama Hamataku kunaa taataa ka hua i te ia. Koia hakaroha pehee i te tama koai raa ka kavake te Tama te Tama ki naa tama hakarria! Mee ailaa e taurekareka kime te tama peenaa ni tee haanau ria!”
25Judas, te tama koai raa ka kavake te Tama te Tama ki naa tama hakarria ku hiri ake, “Rabai, koai, ko nau?”
Hua ake roo Jisas, “Iinoo, koe naa e hua peenaa.”
26I te vaa laatou e nnoho ka kkai, Jisas ku too te haahi haraoa ku hakaruma roo ki te Tama Hamataku, ku tohitohi roo ka kavake ki naa disaipol aana ka hua ake, “Anei ko taku huaitino, too no kkai.”
27Ku too roo aia te kapu no hakaruma i te Tama Hamataku ka kavake i laatou ka hua ake, 28“Anei ko taku toto e hakamaauri ai naa hua hamaatua te Tama Hamataku, taku toto ni marrini ma koutou katoo ki hakataha ina naa tiputipu takahara naa tama katoo. Koutou too no inu. 29Anau e hua atu ki koutou, anau raa ka tee nani te inu muri i te waen nei ki nani roo i te laa anau raa ka inu te waen hoou ma koutou i te Mataapaa taku Tamana.”
30Ku hai pehe roo laatou te pehe ka oo ki te Mouna Oliv.
Jisas e hua ki Pita
(Mak 14.27-31; Luk 22.31-34; Jon 13.36-38)
31Ku hua ake muri roo Jisas ki laatou, “I te poo nei koutou katoo raa ka heheau hakataha tiake anau, e mee i naa hua te Tama Hamataku ni taataa ka taakoto e hua poroo:
‘Te Tama Hamataku raa ka tinai te tama e anaana i naa sipsip,
anaa naa sipsip i loto te panihi raa ka heheau haporroto.’
32 #
Mat 28.16. “Koia i muri koi anau ku hakamahike ria muri no ora, anau raa ka hano ki Galili i mua koutou.”
33Ku hua ake Pita ki Jisas, “Kime naa tama katoo ku huro tiake koe, anau tee nani te tiake koe.”
34Hua ake roo Jisas ki Pita, “Anau e hua atu i te hamaauri, te poo nei i tevaa naa karaoa hikiai ki ttani, akoe raa ka hua naa vaa e toru poro akoe e tee iloa i te nau.”
35Hua ake roo Pita, “Ai kiaa roo anau e tukua ki mate ma koe, anau raa ka tee nani te hua atu peenaa i te koe.” Naa disaipol katoo ku hua ake hoki peenaa.
Jisas e hakaruma i Ketsamini
(Mak 14.32-42; Luk 22.39-46)
36Jisas ku hano ma naa disaipol aana ki te kuana e ttapa i Ketsamini, ku hua ake roo te ia ki laatou, “Nnoho i kinei ki hano anau no hakaruma i kilaa.” 37Ku too roo aia Pita ma te hiaoa tama a Zebedi ka hano ma ia. Tana manava ku pii te aroha, 38ku hua ake roo te ia ki laatou, “Te aroha i taku manava e hamataku roo no taapiri anau ki mate. Nnoho i kinei ka wahi natahi ma anau.”
39Hanatu aia hapela atu no tuu roo i ana turi ma ana kanomata e huri iho ki te kerekere ka hakaruma, “Tamana, kime koe e ruu akoe ku too te kapu naa isu nei hakataha i te nau, koia teeai ki tautari heaa anau e ruu; tautari heaa koe e ruu.”
40Ku ahe muri roo aia ki naa disaipol aana no kite roo i laatou e mmoe. Ku hua ake roo te ia ki Pita. “Ai kuu aa roo koutou toka toru ku tee nani roo te nnoho ka wahi natahi ma anau ki nani he haoa hokotahi? 41Koutou ki wahi ka hakaruma i naa vaa katoo ki tee nani ai koutou te hakaari ina naa tiputipu takahara. Te aitu e ruu kii mee naa mee, koia te huaitino e naenae.”
42Ku hano muri roo aia tevaa hakarua no hakaruma, “Taku Tamana, kime koe e ruu ki inu anau te kapu te isu nei, ka tee nani te too te kapu nei hakataha i te nau, tautari heaa koe e ruu.”
43Hanake muri aia hoki no kite muri roo i naa disaipol e mmoe, e mee i naa kanomata laatou e taenaha i te hii mmoe. 44Jisas ku tiake laatou ka hano i tevaa hakatoru no hakaruma hoki naa hua aana ni hua.
45Ku ahe muri roo aia ki naa disaipol aana no hua ake, “Koutou koi mmoe ka hakamaahia? Mmata! Te vaa ku taapiri mo te Tama te Tama ki tooa no kavake i naa rima naa tama hakarria. 46Mahhike ki aruna, taatou ki oo. Mmata, te tama koai ka kavake anau ki naa tama hakarria raa ku tae mai!”
Jisas ku tauhia
(Mak 14.43-50; Luk 22.47-53; Jon 18.3-12)
47Jisas koi tuu ka hua, ku paku ake roo Judas, te tama hokotahi i te hanahuru ma rua disaipol, hanatahi ma purima naa tama roo. Laatou ni hakauna ina ake naa pris hamaatua ma naa hamaatua naa tama. Laatou ni oo ake ma naa naihi ma naa laakau. 48Te tama ni hua ki kavake Jisas ki naa tama hakarria ni hua ake ki laatou, “Te tama anau raa ka hehoni ai, anaa ko ia. Koutou ku tauhi aia!” 49Judas ku hanatu tonu ki Jisas no hua ake, “Rabai, te manava laoi ki taakoto i te koe,” ku hehoni roo i te ia.
50Ku hua ake Jisas, “Nasoa, hakavave kaa mee heaa akoe e au ai.”
Ku oo ake roo laatou no ppuru Jisas ka tauhi ka mau. 51Te tama hokotahi i laatou koai ni tuu ma Jisas ni too tana naihi no tuutia roo te kautarina te poe te Hai Pris ka motu.
52Hua ake roo Jisas ki te ia, “Tuku muri too naihi i tana kuana. Koai e huhu ma te naihi, aia raa ka mate i te naihi. 53Akoe e maanatu poro anau e tee nani te varo i taku Tamana ki hakauna iho purima naa ensol i aruna naa raena e hanahuru ma rua ki huia anau?! 54Koia kime peenaa, naa hua e taataa ka takkoto i te Peepaa e tapu raa ka hamaauri pehee i te kuana e hua poro naa mee nei raa ka hhae mai peenaa?”
55 #
Luk 19.47; 21.37. Ku hua ake roo Jisas ki te apiana naa tama, “Ai koutou e oomai ai ma naa naihi ma naa laakau no tauhia anau pai roo anau he tama kairaurau? Naa laa katoo anau e noho ka hikuru koutou i te Hare tapu, koia koutou ni teeai ki tauhia anau. 56Koia naa mee katoo nei e hhae ki nani ai naa hua naa profet ni taataa ka taakoto ki hamaauri.”
Te vaa naa, naa disaipol katoo ni tiake Jisas ka heheau ka oo.
Jisas ku tooa ki te Kansol
(Mak 14.53-65; Luk 22.54,55,63-71; Jon 18.13,14,19-24)
57Naa tama koai ni tauhia Jisas ni too aia ki te hare Kaiapas, te Hai Pris, te kuana naa tisa naa Loo ma naa hamaatua te lootu e kkutu ai. 58Koia Pita ni tautari haare i Jisas hakammao, no nani roo i te panihi te hare te Hai Pris. Ku uru atu roo aia ki hare no noho ma naa wahi ki kite ia heaa naa tama raa kaa mee i Jisas.
59Naa pris hamaatua ma naa tama katoo te Kansol ni heaki ni hua kairrehi ki tukua ai Jisas ki mate. 60Koia laatou ni teeai ki kkite ni hara i te ia, ai kiaa roo purima naa tama ni oo ake roo hua ake naa hua kairrehi i te ia.
Ki oti naa te hiaoa tama ku oo ake 61#Jon 2.19.no hua ake, “Te tama nei ni hua poroo, ‘Anau e nani te heua te Hare tapu te Tama Hamataku ki raro ku hakatuu muri roo i naa laa e toru.’ ”
62Te Hai Pris ku mahike no hua ake ki Jisas, “Aa koe e hai hua ki hua i naa hua naa tama nei e mee i te koe?” 63Koia Jisas ni noho teemuu.
Te Hai Pris ku hua ake ki te ia, “Anau e hua atu ki hua mai koe i te hamaauri i te inoa te Tama Hamataku e ora: Hua mai i maatou kime akoe ko te Mesaea, te Tama te Tama Hamataku.”
64Hua ake roo Jisas ki te ia, “Iinoo, koe naa e hua peenaa. Koia anau e hua atu ki koutou: I te vaa ka au, koutou raa ka kkite i te Tama te Tama e noho i te rima iloa te Tama Hamataku ka hano iho i aruna naa kaniva te vaelani.”
65Te Hai Pris ku hhae tana kahukahu ka hua, “Tama nei e hua takahara i te Tama Hamataku! Ai taatou e rruu ai ni laa tama ki oomai no hua? Koutou kai te rrono i naa hua hakarria aana! 66Koutou e mannatu pehee?”
Varo ake roo laatou, “Aia e nani ki taia ki mate.”
67Ku havarea roo laatou ana paiaha ka tuukia i laatou rima. Naraa tama e paakia ia 68ka hua takaro ake, “Te Mesaea, hua mai kaa, koai ku paakia koe!”
Pita e hua poro aia tee iloa i Jisas
(Mak 14.66-72; Luk 22.56-62; Jon 18.15-18,25-27)
69Pita e noho i loto te panihi i haho te hare te Hai Pris, ku hanake roo te hahine e hekau i te Hai Pris no hua ake, “Akoe hoki ni haare ma Jisas te tama i Galili.”
70Koia Pita ku hua ake, “Anau e tee iloa heaa akoe e hua ai.”
71Ku hano roo aia ki te totoka te panihi. Telaa hahine ni kite i te ia ku hua ake roo ki naa tama e ttuu i kinaa, “Te tama nei ni haare ma Jisas te tama i Galili.”
72Hua ake muri roo Pita, “Anau e tee iloa i te tama naa!”
73Hapela ake naa tama ni ttuu i kinaa ku oo ake ki Pita no hua ake, “Iinoo, akoe he tama hoki i laatou. Maatou e illoa e mee i te koe e hua pai ko naa tama naa.”
74Hua ake roo Pita, “Hakamaauri roo, te Tama Hamataku e nani te mee takahara i te nau kime anau e kairehi! Anau e tee iloa roo i te tama naa!”
Te vaa naa koi te karaoa ku tani. 75Pita ku maanatu ake muri i naa hua Jisas ni hua ake: “Tevaa te karaoa hikiai ki tani, akoe raa ka hua naa vaa e toru poro akoe e tee iloa i te nau.” Ku hhae roo aia ki haho no tani hamataku.
Currently Selected:
Matiu 26: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
