Matiu 22
22
Te parapol te Hainaakai ana
(Luk 14.15-24)
1Jisas ku hua ake hoki naraa hua parapol. 2“Te Mataapaa te Vaelani e taakoto peenei: Tevaa hokotahi e mee te kini koai ni mee kii mee te hainaakai ana mo tana tama tanata. 3Ku hakauna roo aia naa tama hehekau aana ki oo roo hua ake ki naa tama ki oo ake ki te kai, koia laatou ni ten'taa te oo ake.
4“Ku hakauna muri roo aia naraa tama e hekau i te ia ka hua ake, ‘Oo no hua ake ki laatou koai anau ni arumia ki oomai, poro anau ku oti te aarere naa kai aaku: Naa manu ma naa purimakau ppeti aaku ku oti te taa, anaa naa kai katoo ku aarere. Ku oomai roo laatou ki te kuana te hainaakai ana!’
5“Koia laatou ni teeai ki hakarrono i naa hua ka oo ake: Te tama ku hano ki te uaka aana, telaa tama ku hano no hekau mani. 6Naraa tama ni purupuru naa tama hehekau i te kini ka taaia ku titinai roo laatou ka mmate. 7Te kini ni mate te hat'roto. Ku hakauna roo naa soldia aana ka oo roo titinai katoo naa tama hakarria naa ka tunia te taon laatou.
8“Ku hua ake roo ki naa tama hehekau aana, ‘Naa kai te hainaakai ana ku aarere, koia laatou koai anau ni varoina ki oomai ni tee nani te oomai. 9Hhuro ki te haarena no hua ake roo ki ni tama pehee koutou e kkite.’ 10Ku oo roo naa tama hekau ki naa haarena no too ake purima naa tama, naa tama taurreka ma naa tama hakarria, no pii katoo te hare te hainaakai ana i naa tama.
11“Koia i tevaa te kini ni hanake no mmata i naa tama, ku kite roo i te tama i kinaa ni teeai ki uhiuhi ni kahukahu taurreka. 12Ku hiri ake roo, ‘Taku hakahoa, akoe ni uru mai pehee ma akoe e teeai ki uhiuhi ni kahukahu taurreka?’ Te tama naa ni tee hai hua e hua ake.
13 #
Mat 8.12; 25.30; Luk 13.28. “Ku hua ake roo te kini ki naa tama koai ni oo ake, ‘Haihai ana vae ma ana rima ku tiria roo aia ki haho i te poouri ana, ki mate ia te tani ka kkii ana niho.’ ”
14Ku hakaoti roo Jisas naa hua aana ka hua, “Purima tama e varoina, koia naa ruai tama raa e hamaatino ina.”
E taurekareka ki kavake naa takis ki Sisa?
(Mak 12.13-17; Luk 20.20-26)
15Naa Faarisi ku hhae ki haho no heaki he haarena ki hakaari ina Jisas i naa hua aana. 16Ku hakauna roo naa ruai disaipol laatou ma naa ruai tama i te raena Herod ki oo ki te ia. Ku hiri ake roo laatou ki Jisas, “Tisa, maatou e illoa i te koe e hua i te hamaauri. Akoe e hikuru naa tama naa hua hamaauri i te ruu te Tama Hamataku i naa tama. Koe teeai ki maanatu heaa naraa tama e mannatu ai, e mee i te koe teeai ki maanatu poro laatou ni tama pehee. 17Koe e maanatu pehee? E taurekareka taatou ki kavake naa takis ki Sisa te tuku Rom ma e teeai?”
18Koia Jisas kunaa iloa i naa kailehi laatou e mee naa, ku hua ake roo ki laatou, “Naa tama hua kairrehi! Ai koutou e hakaari ina ai anau? 19Hakkite mai he peni e tavi ai naa takis.”
Ku too ake roo laatou te peni ki te ia, 20ku hiri ake roo aia ki laatou, “He pokouru ma te inoa ai nei?”
21Hua ake roo laatou. “Sisa!”
Ku hua ake roo Jisas ki laatou, “Kavake ki Sisa naa mee Sisa, ku kavake roo ki te Tama Hamataku naa mee te Tama Hamataku.”
22Tevaa laatou ni rrono peenaa, laatou ni oho laatou mouri ku tiake roo aia ka oo.
Naa tama koai e mahhike muri i te mate tee nani te aavvana
(Mak 12.18-27; Luk 20.27-40)
23 #
Hekau 23.8. I te laa naa koi, naa Sadusi koai e hua poro naa tama mmate e tee nani te mahhike muri, ni oo ake ki Jisas. 24Ku hhiri ake roo ki Jisas, “Tisa, Moses ni taataa te loo nei mo maatou: ‘Kime he tanata e mate ka tiake tana avana e tee hai tama, te kave tanata te tanata naa ki aavana i te hahine naa kii mee ni tamarriki ma tana kave.’ 25Ni mee naa hai kave e hitu. Te tama mua ni aavana no mate koia aia ni tee hai tamarriki, ku tiake ake roo tana avana ki aavana i tana kave. 26Ku mee roo peenaa hoki i te tama hakarua ma hakatoru, loo nani katoo i te tama haka hitu. 27Ki oti naa te hahine ku mate. 28I te laa naa tama mmate raa ka mahhike muri ai no ora, te hahine nei raa kaa mee pai he avana ai? E mee i te toka hitu i laatou katoo nei ni avvana i te ia.”
29Jisas hua ake, “Koutou e hhara e mee i koutou e tee illoa i naa hua e ttapu ma te haiao te Tama Hamataku. 30I te vaa naa tama mmate ki mahhike muri, laatou raa kaa mee pai naa ensol te vaelani, laatou tee nani te aavvana. 31Koia i te iloa naa tama mmate e mahhike muri no ora, koutou ailaa ni teeai ki varo heaa te Tama Hamataku ni hua atu ki koutou? I muri i tevaa Abraham, Aisak, ma Jekop kunaa mmate, te Tama Hamataku ni hua poroo, 32‘Anau ko te Tama Hamataku aa Abraham, ma te Tama Hamataku aa Aisak, ma te Tama Hamataku aa Jekop.’ Aia ko te Tama Hamataku naa tama e ora, teeai ko naa tama mmate.”
33Tevaa te apiana naa tama ni rrono i naa hua nei laatou ni tteki katoo i naa hua aana.
Te Loo e hamataku i naa Loo katoo
(Mak 12.28-34; Luk 10.25-28)
34Tevaa naa Faarisi ni rrono poro Jisas ni hakateemuu ina naa Sadusi, laatou ni kkutu natahi. 35Anaa te tama hokotahi i laatou, he tisa naa Loo, ni hakaari ki taikina Jisas ma naa hua nei.
36Aia ku hiri ake, “Tisa, te loo hea e hamataku i naa loo katoo?”
37Hua ake roo Jisas, “ ‘Ruu i te Ariki Hamaatua, too Tama Hamataku ma too manava katoo, too ata katoo, ma too maanatu katoo.’ 38Te loo nei e hamataku roo i naa loo katoo. 39Te loo hakarua e hamataku peenaa hoki: ‘Ruu i te tama i au taha pai akoe e ruu i te koe roo.’ 40#Luk 10.25-28.Naa loo katoo Moses ma naa hua naa profet e taakoto katoo i naa loo e lua nei.”
Koai te Mesaea
(Mak 12.35-37; Luk 20.41-44)
41Tevaa naa Faarisi ni kkutu natahi, Jisas hiri ake ki laatou, 42“Koutou e mannatu pehee i te Mesaea? Aia he tama ai?”
Ku hua ake laatou, “Te tama aa David.”
43Hua ake roo Jisas ki laatou, “Ai David, i te haiao te Aitu Tapu ni varo i te Mesaea poroo, ‘taku Ariki?’ i te ia ni hua poroo,
44‘Te Ariki Hamaatua ni hua ake ki taku Ariki:
Noho i taku rima maua
ki nani roo anau e tuku naa tama haekotia koe
i laro au vae.’
45“Mmata kaa koutou, ai kime David e varo i te ia ‘taku Ariki’ anaa te Mesaea he mokopuna David pehee?”
46Tee hai tama nii mee ni hua ka hua ake, anaa kaamata roo i te laa naa tee hai tama ni maanatu ki hiri ake muri ki te ia.
Currently Selected:
Matiu 22: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
