Matiu 21
21
Jisas ku hanatu pai he kini ki loto Jerusalem
(Mak 11.1-11; Luk 19.28-40; Jon 12.12-19)
1Tevaa Jisas ma ana disaipol ni ooatu taapiri ki Jerusalem, laatou ni ooatu ki Betfage i te Mouna Oliv. I kinaa, Jisas ku hakauna te toka rua disaipol aana 2ka hua ake ki laaua, “Kourua oo ki te henua e tuu mai i mua kourua, hakavave roo kourua raa ka rrave ma te donki e haihai ka tuu i kinaa ma tana tama i ana taha. Vvete laaua ku toomai ki te nau. 3Kime he tama e hiri atu, ku hua ake roo poro te Ariki e hua ki too ake, anaa aia raa ka kavatu naa donki naa.”
4Naa mee nei raa ka hhae ki hano tonu ma naa hua te profet ni hua poroo:
5“Huake ki te tama hahine a Saion,
‘Mmata kaa, te kini autou ku hanatu ki koutou!
Aia e haare teemuu ka tere atu i aruna te donki,
ma i aruna te tama te donki.’ ”
6Ku oo roo te hiaoa disaipol no tautari heaa Jisas ni hua ake. 7Laaua ni too ake te donki ma tana tama, anaa horahora roo naa hiapo laaua i aruna naa donki naa, ku kake roo Jisas no noho i aruna. 8Purima naa tama ni horahora naa hiapo laatou i aruna te haarena, naraa tama e tuutuu naa mataaraa ninito ka horahora i aruna te haarena. 9Te apiana naa tama e oo i mua ma laatou koai e tautari atu i muri ni vaha ka hua:
“Hau te inoa te Tama aa David!
Te Tama Hamataku raa kaa mee hakaraaoi i te ia
koai e au i te inoa te Ariki Hamaatua!
Hau te inoa te Tama Hamataku ki aruna!”
10Tevaa Jisas ni hanatu ki loto Jerusalem, naa tama katoo te taon ni vaha hamataku ka hirihiri, “Ai koai te tama naa?”
11Te apiana naa ku hua ake, “Anei ko Jisas, te profet i Nasaret i loto Galili.”
Jisas ku hano ki te Hare tapu te Tama Hamataku
(Mak 11.15-19; Luk 19.45-48; Jon 2.13-22)
12Jisas ni hanatu ki loto te Hare tapu te Tama Hamataku no kereia roo naa tama e hekau mani i kinaa. Aia ni hurihuri naa teevoo naa tama e hekau mani ma naa hoa e ttoko ai naa rupe. 13Ku hua ake roo aia ki laatou, “Naa hua e taataa i te Peepaa e tapu e hua poroo: ‘Taku hare raa ka taakoto mo hare hakaruma,’ koia ku huri hia koutou mo kuana naa tama kairaurau ki hakammuni ai.”
14Naa tama kanomata ppuni ma naa tama tee nani te haare ni oo ake ki Jisas i te Hare tapu, ku mee ina roo Jisas no taurreka muri. 15Naa pris hamaatua ma naa tisa naa Loo ni hatunaaroto i tevaa laatou ni kkite ai i naa mee taurreka Jisas nii mee, ma naa tamarriki e vvaha i loto te Hare tapu poroo, “Hau te inoa te Tama aa David.”
16Ku hhiri ake roo laatou ki Jisas, “Akoe e rono heaa naa tamarriki nei e hua ai?”
Ku hua ake roo Jisas, “Iinoo. Ea raa, koutou ni teeai ki varo naa hua e ttapu nei, e hua poroo,
‘Koe ni hikuru naa tamarriki
ki hhau te inoa te Tama Hamataku.’ ”
17Ku tiake roo Jisas laatou ka hano ki te taon Betani no noho ai i te poo naa.
Jisas e hua hakariaria i te laakau fik
(Mak 11.12-14,20-24)
18Haka tap'taiao roo, Jisas ku ahe muri ki Jerusalem, anaa aia ku hiikai. 19Ku kite roo aia i te laakau fik e tuu i te taha te haarena ku hanatu roo no kite i te laakau fik e tuu tee hai hua, koia naa tino rau. Ku hua ake roo aia ki te laakau, “Akoe raa ka tee nani te hua muri ni hua!” I te vaa naa koi, te laakau fik ku kaamata ka pakupaku.
20Tevaa naa disaipol ni kkite i te mee naa ku oho roo laatou mouri. Ku hhiri ake roo laatou ki te ia, “Te laakau fik nei e pakupaku hakavave pehee?”
21 #
Mat 17.20; 1 Korin 13.2. Hua ake roo Jisas, “Anau e hua atu i te hamaauri, kime koutou e lootu hamaauri i te nau, koutou e nani te hua ake ki te laakau fik pai ko anau nii mee, anaa teeai ko te tino mee nei, koia koutou e nani te hua ake hoki ki te mouna, ‘Mahike ka hano no hopo ki loto te tai,’ mee raa kaa mee hoki peenaa pai koutou e hua. 22Kime koutou e lootu maauri i te Tama Hamataku, koutou raa ka nani te too he mee pehee koutou e rruu ai i tevaa koutou e hakaruma.”
Te haiao Jisas
(Mak 11.27-33; Luk 20.1-8)
23Jisas ku hanatu no uru hoki ki loto te Hare tapu te Tama Hamataku, anaa tevaa aia e hikuru ina naa tama i kinaa, naa pris hamaatua ma naa tisa naa Loo, natahi ma naa hamaatua te henua, ni oo ake ki te ia loo hua ake, “Hua mai ki maatou, koai e hua atu poro akoe e nani te mee naa mee nei? Koai ni kavatu te haiao kii mee naa hekau naa?”
24Jisas hua ake ki laatou, “Anau raa ka hiri atu hoki ki koutou i te mee hokotahi. Kime koutou e hua mai tonu, anau raa ka hua atu ki koutou koai e hua poro anau e nani te mee naa mee nei. 25Koutou hua mai, koai ni hua ake ki Jon ki paptais naa tama: Ko te Tama Hamataku, ma teeai, ko naa tama te maarama nei?”
Laatou ku kaamata ka hua hoko laatou, “Taatou ka hua pehee? Kime taatou e hua poro ko te Tama Hamataku, aia raa ka hua, ‘Ai koutou ni tee hakarono ai i Jon?’ 26Koia kime taatou e hua poro e au i naa tama koi, taatou e mattaku i naa tama heaa laatou raa kaa mee, e mee hoki i laatou e mannatu poro Jon he profet.”
27Ku hua ake roo laatou ki Jisas poroo, “Maatou e tee illoa.”
Anaa Jisas hua ake hoki ki laatou, “Anau hoki e tee nani te hua atu ki koutou koai e hua mai poro anau e nani te mee naa mee nei.”
Te parapol i te hiaoa tama taanata
28Jisas hua ake hoki ki laatou, “Koutou e mannatu pehee? E mee te tanata hokotahi ana tama e rua. Ku hua ake roo aia ki te tama matua, ‘Taku tama, hano roo hekau i te uaka greip anei.’
29“Te tama matua naa ku hua ake, ‘Anau e ten'taa,’ koia i muri aia ku huri tana maanatu ku hano roo.
30“Ku hano roo te tamana no hua ake ki telaa tama aana peenaa hoki. Hua ake roo te tama naa, ‘Iinoo,’ koia aia ni teeai ki hano.
31“Te tamana e ruu i koai te tama i te toka rua nei?”
Hua ake roo laatou, “Te tama mua.”
Jisas ku hua ake ki laatou, “Anau e hua atu i te hamaauri, naa tama tootoo takis ma naa tama e moemmoe ka hai naa tiputipu hakarria ma naraa tama raa ka herruhi ki loto te Mataapaa te Tama Hamataku i mua koutou. 32#Luk 3.12; 7.29,30.E mee i Jon ni hanatu ki koutou ki loo hakkite atu te haarena e tonu, anaa koutou ni teeai ki hakarono i te ia, koia naa tama tootoo takis ma naa tama hakarria ni hakarono i te ia. Ai kiaa koutou ni kkite i te mee nei, koutou ni teeai ki huri naa mannatu autou ka hakarono i te ia.”
Te parapol i naa tama e toki naa greip
(Mak 12.1-12; Luk 20.9-19)
33Jisas hua ake hoki ki laatou, “Hakarono kaa ki nanei hua parapol: E mee te tama e toki naa greip i tana uaka, ku paanihi roo hakareha te kuana naa ka keri roo te rua ki kkumi ai naa greip, anaa penapena roo te tama hare ki nnoho ai naa tama e anaana te uaka. Anaa kavake roo ki naraa tama ki hekau ai, ku hano roo ia ki naraa henua. 34Tevaa ki haki naa hua greip ku tae ku hakauna roo aia naa poe ki oo no too ake te tuhana aana i naa greip.
35“Naa tama e anaana tana uaka ku purupuru naa poe aana ka taia te tama hokotahi, tinai telaa tama ka mate ka tauatia telaa tama hoki ki naa hatu. 36Te tama e mee tana uaka ku hakauna naraa poe, e purima i aruna naa poe mua, ka oo. Naa tama e anaana te uaka nii mee hakarria hoki i naa tama naa. 37Hakaoti naa aia ku hakauna roo tana tama ki laatou, ka hua poroo, ‘Laatou raa ka hakarono hua ki taku tama.’
38“Koia i tevaa naa tama naa ni kkite i te tama naa, laatou ni hua hoko laatou, ‘Anei ko te tama te tamana te uaka nei. Taatou ki tinai te tama nei ki mate ku too roo taatou ana mee katoo.’ 39Ku ppuru roo laatou te tama naa ka ttiri ki haho te uaka, ku tinai roo aia ka mate.”
40Jisas hua ake, “Tevaa te tamana te uaka e hanatu ai, aia raa kaa mee pehee i naa tama naa?”
41Laatou hua ake, “Aia raa ka tinai naa tama hakarria katoo, ku kavake roo te uaka ki naraa tama ki hekau ai, naa tama koai raa ka kavake tonu tana tuhana i tevaa naa greip ku haki ai.”
42Jisas hua ake ki laatou, “Ea raa, koutou ni teeai roo ki varo heaa e taataa i loto naa peepaa e ttapu?
‘Te hatu naa tama penapena hare ni ten'taa ai,
anei ku taurekareka hamataku ka rruu ai naa tama.
Te Ariki Hamaatua nii mee naa mee nei,
mee taurekareka roo i maatou kanomata!’ ”
43Ku hua ake roo Jisas, “Anau e hua atu ki koutou, te Mataapaa te Tama Hamataku raa ka hakataha ina i koutou no kavake roo ki naa tama koai e mee naa tiputipu taurreka. 44[Aia koai e heke i aruna te hatu nei raa ka mahae no tapa tapa mee, koia koai te hatu nei e heke ai, aia raa ka maheuheu.”]
45Tevaa naa pris hamaatua ma naa Faarisi ni rrono i naa hua Jisas ni hua ake, laatou ni illoa poro Jisas e hua i laatou. 46Ku hakaari roo laatou ki tauhi Jisas no kooti ina, koia laatou ni mattaku i te apiana naa tama, e mee i naa tama naa e hua poro Jisas he profet maauri.
Currently Selected:
Matiu 21: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
