Matiu 20
20
Te parapol i naa tama hekau i te uaka naa greip
1“Te Mataapaa te Vaelani e taakoto pai he tama koai ni hano haka tap'taiao ki loo heaki ni tama ki hekau i tana uaka e ttoki naa greip. 2Aia ni maanatu ki tauvia naa tama naa i naa mani siliva i te laa hokotahi, ku hakauna roo laatou ka oo no hekau i te uaka.
3“Pai naa kiloko e hiva i te tap'taiao, aia ku hano no kite roo i naraa tama e ttuu tee hekau i te kuana naa tama e kkutu ai. 4Ku hua ake roo te ia ki laatou, ‘Koutou hoki ki oo no hekau i te uaka, anaa anau raa ka tauvia hakaraaoi ina koutou.’ 5Ku oo roo laatou.
“Aia ni hano muri hoki i naa kiloko e hanahuru ma rua ma naa kiloko e toru no mee hoki pai ko mua. 6Pai naa kiloko e rima aia ni hanatu muri no kite roo i naraa tama e ttuu tee hai hekau e mee. Ku hiri ake roo aia ki laatou, ‘Ai kuu aa koutou ku ttuu haare i te laa katoo nei tee hai hekau e mee?’
7“Hua ake roo laatou, ‘Tee hai tama ni hua mai i maatou ki hekau.’
“Hua ake roo te ia ki laatou, ‘Oo hoki koutou no hekau i taku uaka.’
8“Tevaa te laa ku ahiahi, te tama e mee tana uaka ku hua ake ki tana pohipoe, ‘Varoina naa tama hekau katoo ku tauvia roo laatou, kaamata ma naa tama ni varoina ki hekau hakamuri ku hano roo ma naa tama ni kaamata mua.’
9“Naa tama hekau koai ni kaamata naa hekau i naa kiloko e rima ni tauvia ki naa mani siliva taki tahi. 10Tevaa naa tama mua ni hekau ni oo ake ki too naa tavi laatou, laatou ni mannatu poro laatou raa ka too i aruna, koia laatou ni too naa mani siliva taki tahi hoki pai ko naraa tama. 11Laatou ni too laatou tavi ku kaamata roo ka hat'roto i te tama te uaka. 12Ku hua ake roo ki te ia, ‘Naa tama nei koai ni hekau hakamuri ni hekau tino haoa hokotahi, koia akoe ni tavi laatou hakanaatahi pai ko maatou koai ni mmate roo te hekau i te laa katoo ma te vvela.’
13“Koia aia hua ake ki te tama hokotahi laatou poroo, ‘Taku hakahoa, anau e teeai kii mee hakariaria i te koe. Ai akoe ni teeai ki ruu ki hekau ki too naa mani siliva taki tahi? 14Too tau tavi ka hano. Anau e mee ki kavake ki naa tama ni hekau hakamuri nei e hia pai anau e tavi i te koe. 15Anau ailaa e tee nani te mee heaa anau e ruu kii mee i aku mani? Ma akoe ailaa e maanatu hakariaria i te nau e manava laoi?’ ”
16 #
Mat 19.30; Mak 10.31; Luk 13.30. Ku hakaoti roo naa hua Jisas poroo, “Naa tama hakamuri raa ka mua, anaa naa tama e mua raa ka hakamuri.”
Jisas e hua hoki poro aia raa ka mate
(Mak 10.32-34; Luk 18.31-34)
17Jisas ni hano ki aruna ki Jerusalem, ku too roo aia te hanahuru ma rua disaipol ki te taha no hua ake teemuu roo ki laatou, 18“Taatou ku oo ki Jerusalem, anaa te Tama te Tama raa ka tauhia ku kavake roo ki naa rima naa pris hamaatua ma naa tisa naa Loo. Laatou raa ka kooti ina ia ku hua natahi roo ki taia te ia ki mate, 19anaa laatou raa ka kavake aia ki naa tama teeai ni Jiu. Naa tama naa raa ka takaro i te ia ka taia ki te wipi, ku rikitia roo aia i te koros ka tiake ki mate. I te laa hakatoru aia raa ka hakamahike ria muri no ora!”
Te ruu te tinana
(Mak 10.35-45)
20Te tinana naa tamarriki taanata Zebedi ni hanake ma ana tama ki Jisas no ttuu i laatou turi i mua Jisas ka hua ake poro aia e ruu he mee i te ia.
21Jisas ku hiri ake, “Heaa akoe e ruu?”
Ku hua ake roo te tinana, “Hua mai hamaauri poro te toka rua tama aaku nei raa ka nnoho ma koe, te tama i too maua ma te tama i too maui, i tevaa akoe ku Kini.”
22Ku hua ake roo Jisas ki laatou, “Koutou e tee illoa heaa koutou e hhiri ai. Kourua e nani te inu i te kapu aaku raa ka inu?”
Hua ake roo laaua, “Maaua e nani.”
23Hua ake roo Jisas ki laaua, “Kourua raa ka nani maauri te inu i te kapu aaku, koia ki nnoho i taku maua ma taku maui, e teeai he mee aaku ki kavatu. Naa kuana nei ni kuana laaua koai taku Tamana ni aarere ma laaua.”
24Tevaa naraa hanahuru disaipol ni rrono i naa hua nei, laatou ni hat'roto i te toka rua hai kave naa. 25#Luk 22.25,26.Jisas ku varoina laatou ki oo ake ki te ia no hua ake, “Koutou e illoa roo poro naa kini naa tama teeai ni Jiu e haiao roo i aruna laatou, anaa naa hamaatua laatou e haiao roo te haia naa tama ki tautari i naa hua laatou. 26#Mat 23.11; Mak 9.35; Luk 22.26.Koia te tiputipu nei ki teeai ki taakoto i loto koutou. Kime he tama i koutou e ruu ki hamaatua, aia kii mee mo tama hehekau i koutou, 27anaa koai e ruu ki mua aia, aia kii mee mo tama hekau naraa tama. 28E mee pai ko Tama te Tama ni teeai ki au ki hekau naa tama i te ia, koia aia ni au kii mee naa hekau naa tama ku kavake roo tana ora ki tavi muri purima naa tama.”
Te hiaoa tama kanomata ppuni ku kkite muri
(Mak 10.46-52; Luk 18.35-43)
29Tevaa Jisas ma naa disaipol aana ni tiake Jeriko ki oo, te apiana naa tama ni tautari ake i te ia. 30Te hiaoa tama kanomata ppuni e nnoho i te taha te haarena ni rrono poro Jisas ku hakahara i te haarena, ku varo ake roo, “Te Ariki, te tamarikiriki aa David, aroha i maaua!”
31Te apiana naa tama ni heatua laaua ka hhua ake ki nnoho teemmuu, koia laaua ku varo hamataku roo, “Te Ariki, te tamarikiriki aa David, aroha i maaua!”
32Jisas ni tuu ku varo roo ka hiri ake ki laaua, “Heaa kourua e rruu i te nau kii mee i kourua?”
33Ku hua ake roo laaua, “Te Ariki, maaua e rruu ki kkite muri.”
34Jisas ni aroha i laaua ku paa roo i naa kanomata laaua. I te vaa naa, naa kanomata laaua ku kkite muri ku tautari haare roo i Jisas.
Currently Selected:
Matiu 20: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
