Matiu 19

Jisas e hua i naa hai avvana e mavvae

(Mak 10.1-12)

1Tevaa Jisas ni hakaoti te hua i naa mee naa, aia ni tiake Galili ka hano ki loto te matakaaina Judia i telaa taha te Riva Jodan. 2Te apiana naa tama ni tautari haare i te ia, ku mee ina roo naa tama mmaki no taurreka i kinaa.

3Naa ruai Faarisi ni oo ake ki te ia ki loo hakaaria ia. Laatou hhiri ake poroo, “Naa Loo taatou e nani te hattana te tanata ki tiake te avana aana i ni mannatu pehee aia e mannatu ai?”

4Ku hua ake roo Jisas, “Koutou ni teeai ki varo naa hua ni taataa ka hua poro i te kaamata, te Tama Hamataku ni penapena naa taanata ma naa haahine? 5Anaa te Tama Hamataku ni hua, ‘Anei heaa te tanata raa ka tiake tana tamana ma tana tinana ku hakapaa roo ma tana avana, anaa laaua raa kaa mee pai he huaitino hokotahi.’ 6Laaua raa ka teeai kii mee pai he hiaoa koia hokotahi. Tee hai tama pela e nani te vaaea koai te Tama Hamataku ni hakapaa natahi.”

7 # Mat 5.31. Naa Faarisi ku hhiri ake ki te ia, “Ai ki aa Moses ni tuku naa Loo poro te tanata ki kavake he peepaa te hai aavana ku mavvae ki tana avana, ku hakauna roo te hahine ki hano?”

8Ku hua ake roo Jisas, “Moses ni hua atu ki koutou ki nani te kereia naa aavana autou, e mee i autou manava e maakaka ka hainattaa te hakailoa. Koia mee ni teeai ki taakoto peenei i te kaamata. 9#Mat 5.32; 1 Korin 7.10,11.Anau e hua atu ki koutou: Kime te avana te tanata e teeai ki moe ma he laa tanata koia te tanata ku tiake aia ka hano roo aavana i te raa hahine, te tanata naa e mee te tiputipu hakariaria.”

10Hua ake roo naa disaipol ki Jisas, “Kime te tiputipu nei e taakoto peenaa i loto te tanata ma te hahine, ailaa e taurekareka i laaua ki teeai ki avvana.”

11Ku hua ake roo Jisas, “Naa hua nei e teeai ki hano ki naa tama katoo, koia ki naa tama koi te Tama Hamataku e kavake ai. 12E mee naa tama e tee nani te avvana e mee i laatou ni haanau mai roo peenaa; naraa tama ku mee ina naraa taanata kii mee laatou peenaa; naraa tama teeai ki aavvana e mee i laatou e mee naa hekau i te Mataapaa te Vaelani. Tiake aia koai e ruu ki too naa hua nei ki tautari.”

Jisas e hakaruma i naa tamarriki

(Mak 10.13-16; Luk 18.15-17)

13Naa tama ni too ake naa tamarriki ki Jisas ki paa ana rima ka hakaruma i laatou, koia naa disaipol ni heatua laatou.

14Ku hua ake roo Jisas, “Tiake naa tamarriki ki oomai ki te nau; teeai ki puuia laatou. Te Mataapaa te Vaelani he kuana naa tama peenaa.” 15Ku tuku roo Jisas ana rima i aruna naa tamarriki, ku hano roo tiake te kuana naa.

Te tama taane e pii te mani

(Mak 10.17-31; Luk 18.18-30)

16Te tanata hokotahi ni hanake ki Jisas no hiri ake, “Tisa, heaa e taurekareka anau kaa mee ki nani anau te too te ora e taakoto i naa vaa katoo?”

17Ku hua ake roo Jisas, “Ai kuu aa akoe ku hiri mai i te nau poro heaa e taurekareka? E mee te Tama Hamataku hokotahi e taurekareka. Tauhi naa loo kime akoe e ruu ki too te ora e taakoto i naa vaa katoo.”

18Te tanata naa hiri ake, “Naa loo hea?”

Ku hua ake roo Jisas, “Teeai ki tinai te tama ki mate; teeai ki moe ma te avana telaa tama; teeai ki huuhuu hekau; teeai ki mee ni hua kailehi; 19hakarono hua i too tamana ma too tinana; ma ruu i te tama i oo taha pai akoe e ruu i te koe roo.”

20Te tama taane naa hua ake, “Anau ni tautari naa loo katoo nei. Heaa hoki anau kii mee?”

21Hua ake roo Jisas ki te ia, “Kime akoe e ruu ki tonu too ora, hano no kavake naa hekau aau ki naa tama ki tauvia, ku too roo naa mani no kavake ki naa tama e tee hai mani, anaa akoe raa ka pii te hekau i te vaelani. Ku au roo akoe no tautari mai i te nau.”

22Tevaa te tama taane naa ni rono peenaa, aia ni hano ma purima naa mannatu, e mee i te ia e pii te mani.

23Ku hua ake roo Jisas ki naa disaipol aana, “Anau e hua atu i te hamaauri, te tama e pii te mani e hainattaa te uru i te Mataapaa te Vaelani. 24E hainauhie i te kemol ki uru i te kanomata te nila koia te tama hai purima hekau e hainattaa roo te uru i te Mataapaa te Tama Hamataku.”

25Tevaa naa disaipol ni rrono i naa hua nei ku oho roo naa mouri ka hhiri poroo, “Koai kaa e nani te hao?”

26Jisas ku mmata tonu atu ki laatou ka hua ake, “Naa mee nei e tee nani naa tama te mee, koia te Tama Hamataku e nani te mee naa mee katoo.”

27Pita ku hakahua ake ki te ia, “Mmata kaa! Maatou ku oti te tiake naa hare maatou ki oomai no tautari i te koe. Heaa maatou raa ka too?”

28 # Mat 25.31; Luk 22.30. Ku hua ake roo Jisas ki laatou, “Anau e hua atu i te hamaauri. Tevaa te Tama te Tama raa ka noho no kini i tevaa hoou, koutou te hanahuru ma rua disaipol aaku nei raa ka nnoho hoki pai ni kini naa kaaina e hanahuru ma rua Israel. 29Naa tama katoo koai ni tiake naa hare, naa kave taanata, naa kave haahine, naa tammana, naa tinana, naa tamarriki ma naa uaka laatou ki tautari i te nau, laatou raa ka too muri te lau naa vaa i aruna i naa mee katoo, anaa laatou raa ka too hoki te ora e taakoto i naa vaa katoo. 30#Mat 20.16; Luk 13.30.Koia purima tama koai e mua anei raa ka hakamuri, koia purima naa tama koai ni hakamuri anei raa ka mua.

Currently Selected:

Matiu 19: NUR

Highlight

Compare

Copy