Matiu 2
2
Naa tama e illoa i naa hetuu e oo ake i te anake
1Meri ni haanau Jisas i loto te taon Betlehem i loto Judia, i tevaa Herod ni kini ai. 2E mee naa tama e illoa i naa hetuu ni oo ake i te taha te anake ki Jerusalem no hhiri, “Ai i hea te tamarikiriki ni haanau ria ki noho pai he kini naa Jiu? Maatou ni kkite i tana hetuu i te anake ku oomai roo maatou ki loo lootu i te ia.”
3I te vaa Herod ni lono ai i te mee naa, tana maanatu ni teeai ki tonu. Naa tama hoki i Jerusalem ni mannatu tammaki. 4Ku varo roo aia naa pris hamaatua katoo ma naa tisa naa Loo ka hiri ake poroo, “Te Mesaea raa ka heke i te kuana hea?”
5Ku hua ake roo naa tama naa, “I te taon Betlehem i loto Judia, e mee i naa hua te profet i mua ni taataa peenei:
6‘Koia akoe Betlehem, e tuu i loto Judia,
e teeai ki au i muri naa taon e mee naa inoa hamattaku laatou i Judia;
e mee te kini raa ka haanau mai i loto akoe naa,
ai raa ka anaana naa tama aaku Israel.’ ”
7Ku varo roo Herod i naa tama e illoa i naa hetuu ka oo ake no hua teemuu laatou no iloa roo te ia i tevaa te hetuu ni hae ai. 8Ku hakauna roo Herod naa tama naa ka oo ki Betlehem ka hua ake poroo, “Oo no heaki hakaraaoi roo i te tamarikiriki. I te vaa koutou e kkite i te ia, oomai muri no hua mai ki te nau ki iloa, ki hano hoki anau no lootu i te ia.”
9Ku oti te hakarono naa hua te kini, ku oo roo laatou i te haarena. Te hetuu laatou ni kkite i mua i te taha te anaake ni hano i mua laatou no tuu roo i aruna te kuana te tamarikiriki e taakoto ai. 10I te vaa laatou ni kkite i te hetuu, laatou ni hiahhia roo. 11Herruhi laatou ki loto te hare no kkite roo i te tamarikiriki ma tana tinana Meri. Ku ttuu roo laatou i laatou turi ka lootu i te ia. Ku taaraki roo laatou pahikete ka kavake naa mee laatou ni too ake: Naa kol ma naa ʻfrankinsenseʼ ma naa ʻmyrrhʼ.
12Ku ahe muri roo laatou ki te henua laatou i telaa haarena, tautari i te moe te Tama Hamataku ni hua ake ki laatou ki teeai ki oo muri ki Herod.
Josep, Meri ma Jisas ku hhuro no mmuni i Isip
13Tevaa naa tama e illoa i naa hetuu ku oti te oo, te ensol te Tama Hamataku ku hae ake ki Josep i te moe no hua ake, “Herod raa ka heaki i te tamarikiriki ki taia ki mate. Akoe ki mahike no too te tamarikiriki ma tana tinana ku hakavave roo ka oo ki Isip no nnoho roo i kinaa ki nani roo anau e hua atu ki kourua ki oo.” 14Ku mahike roo Josep no too Meri ma te tamarikiriki i te poo ka oo ki Isip 15no nnoho ai roo no nani Herod ku mate. Te mee nei e taakoto peenei ki hano tonu ma naa hua te Tama Hamataku ni huatia ai tana profet poroo:
“Anau ni varo taku Tama ki hakataha i Isip.”
Naa tamarriki ku taaia ka mmate
16Tevaa Herod ni iloa poro naa tama illoa i naa hetuu ni kailehi ina te ia, ku hat'roto roo. Ku kavake roo te ia naa hua ki oo naa tama no taaia naa tamarriki taanata, naa kirimahi laatou e lua ma naa tamarriki kai te rruku, ki mmate i te taon Betlehem ma naa henua taapiri. Herod e mee peenaa e mee i te ia ni hhiri hakaraaoi ka iloa i naa tama e illoa i naa hetuu naa i tevaa pehee te hetuu naa ni hae. 17Naa mee nei e mee no hamaauri roo naa hua te profet Jeremaia ni hua i mua:
18“Te roe te tama e rono tia i Rama,
e tanitani hakaaroha,
Reisel e tanitani aroha i ana tamarriki,
ku ten'taa roo i naa tama ki haka teemuu te ia,
e mee i naa tamarriki aana katoo ku mmate.”
Josep, Meri ma Jisas ku ahemuri ki Nasaret
19Tevaa Herod ku oti te mate, te ensol te Tama Hamataku ku hae ake ki Josep i tana moe i Isip 20no hua ake poroo, “Mahike, too te tamarikiriki ma tana tinana, ku ahemuri roo ki Israel. Naa tama ni mee ki taia te tamarikiriki ki mate ku oti te mmate.”
21Ku mahike roo Josep no too Meri ma te tamarikiriki ku ahemuri roo ki Israel. 22Koia tevaa Josep ni rono poro Akelaus ku hui Herod pai he kini Judia, ku mataku roo te hano ki kinaa. Ku hano roo aia ki te matakaaina Galili, e mee i te ia ni too naraa hua i tana moe. 23#Mak 1.24; Luk 2.39; Jon 1.45.Aia ni hano no noho roo i te taon Nasaret. Ku hamaauri roo naa hua te Tama Hamataku ni huatia naa profet i te raa raa poroo:
“Aia raa ka varoina poro he tama i Nasaret.”
Currently Selected:
Matiu 2: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
