Matiu 1

Naa tippuna Jisas Krais

(Luk 3.23-38)

1Anei ko naa hua e hakatere mai naa tippuna Jisas Krais. Jisas e au i te manava David, David e au i te manava Abraham.

2Abraham ko te tamana Aisak,

Aisak ko te tamana Jekop,

Jekop ko te tamana Judah ma ono kave taanata.

3Judah ko te tamana Peres ma Sera (te tinana laaua ko Tamar),

Peres ko te tamana Hesron,

Hesron ko te tamana Ram.

4Ram ko te tamana Aminadap,

Aminadap ko te tamana Nason,

Nason ko te tamana Salmon,

5Salmon ko te tamana Boas (tana tinana ko Rahab),

Boas ko te tamana Obet (tana tinana ko Rut),

Obet ko te tamana Jesi,

6anaa Jesi ko te tamana Kini David.

David ko te tamana Solomon (tana tinana ni avana i Uria),

7Solomon ko te tamana Rehoboam,

Rehoboam ko te tamana Abiya,

Abiya ko te tamana Asa,

8Asa ko te tamana Jehosafat,

Jehosafat ko te tamana Jehoram,

Jehoram ko te tamana Usia,

9Usia ko te tamana Jotam,

Jotam ko te tamana Ahas,

Ahas ko te tamana Hesekaia,

10Hesekaia ko te tamana Manase,

Manase ko te tamana Emon,

Emon ko te tamana Josaia,

11Josaia ko te tamana Jehoiakin ma ono kave, i tevaa naa tama Israel ni karapuhi i Babilon.

12I muri laatou ni karapuhi i Babilon:

Jehoiakin ko te tamana Sieltiel,

Sieltiel ko te tamana Serubabel,

13Serubabel ko te tamana Abiut,

Abiut ko te tamana Eliakim,

Eliakim ko te tamana Asor,

14Asor ko te tamana Sadok,

Sadok ko te tamana Akim,

Akim ko te tamana Eliud,

15Eliud ko te tamana Eliasar,

Eliasar ko te tamana Matan,

Matan ko te tamana Jekop,

16Jekop ko te tamana Josep, Josep te horona Meri ni hae mai ai Jisas, e tapa ina laatou poro ko Krais.

17Kaamata i Abraham ka au loo nani i David, anaa he hanahuru ma haa haanauna, telaa hanahuru ma haa i tevaa David ka hano loo nani i tevaa laatou ni karapuhi i Babilon, telaa hanahuru ma haa i tevaa laatou ni karapuhi ai loo nani te Mesaea ku hae mai.

Jisas ku haanau ria mai

(Luk 2.1-7)

18 # Luk 1.27. Naa hua i te haanau mai ana Jisas e taakoto peenei: Tana tinana Meri ni hakailona ki avana i Josep, koia i tevaa laaua hikiai ki nnoho natahi, Meri ni iloa poro aia raa ka hai tama i naa haiao te Aitu Tapu.

19Josep he tama e noho tonu naa vaa katoo i tana ora, koia aia e ten'taa te hakanapa ina Meri i naa kanomata te henua; kuu mee roo tana maanatu ki tiake teemuu tana avana. 20Tevaa aia koi maanatu ai peenaa, te ensol te Tama Hamataku ku hakahae ake i te ia i loto tana moe ka hua ake, “Josep te tama David, teeai ki mataku te too Meri ki too hare pai he avana aau. Te tamarikiriki e taakoto i loto tana manava he tama te Aitu Tapu. 21#Luk 1.31.Aia raa ka haanau te tamarikiriki tanata ku ttapa roo tana inoa i Jisas, e mee i te ia raa ka hakahao naa tama aana i naa takahara laatou.”

22Naa mee katoo nei ni hhae ki hamaauri naa hua te Tama Hamataku ni hua ake ki te profet i mua:

23“Te hahine hikiai ki moe ma he tanata e tinae

raa ka haanau te tamarikiriki tanata,

ku varoina roo laatou ki Imanuel.”

(Imanuel e hua poroo, “Te Tama Hamataku e noho ma taatou”).

24Te vaa Josep ni mahike ake, ku tautari roo heaa te ensol te Tama Hamataku ni hua ake, ku aavana roo i Meri. 25#Luk 2.21.Koia aia ni teeai ki moe ma Meri no nani roo i tevaa Meri ku haanau tana tama tanata. Ku ttapa roo te tamarikiriki i Jisas.

Currently Selected:

Matiu 1: NUR

Highlight

Compare

Copy