Matiu 18
18
Koai e hamaatua roo i te Mataapaa te Vaelani
(Mak 9.33-37; Luk 9.46-48)
1 #
Luk 22.24. I te vaa naa naa disaipol ni oo ake ki Jisas no hiri ake, “Koai e hamaatua roo i te Mataapaa te Vaelani?”
2Ku varo roo Jisas i te tamarikiriki ka au no hakatuu i mua laatou. 3#Mak 10.15; Luk 18.17.Ku hua ake roo, “Anau e hua atu ki koutou i te hamaauri: Kime koutou e teeai ki huri koutou no mee pai ko naa tamarriki, koutou raa ka tee nani te uru ki loto te Mataapaa te Vaelani. 4Te tama e hamaatua i te Mataapaa te Vaelani ko te tama e tuku aia ki laro kaa mee pai ko te tamarikiriki nei. 5Anaa koai te tama e too he tamarikiriki peenei ki tana hare i taku inoa, e too hoki anau.
Tiputipu takahara
(Mak 9.42-48; Luk 17.1-2)
6“Koia kime he tama e mee ina he tamarikiriki hokotahi e lootu i te nau kii mee naa takahara, e taurekareka te tama naa ki haihai he huai te hatu i tana komanu ku hakatere roo i te moana ki marremu.
7“Hakaaroha roo i naa tama te kerekere nei e mee i naa mee e takkoto e nani te mee ina naa tama kii mee naa takahara. Naa mee peenei raa ka hhae mai, koia hakaaroha roo i naa tama koai e mee naa tiputipu nei ki hhae mai! 8#Mat 5.30.Kime too rima ma too vae e haia koe kii mee naa takahara, tuutia ka tiria! E taurekareka kime koe e too te ora maauri ma tee hai rima ma tee hai vae, ma ki tauhi au rima ma au vae ka tiria natahi ma koe ki loto te ahi e ura i naa vaa katoo. 9#Mat 5.29.Anaa kime tau kanomata e mee ina koe kaa mee naa takahara, kapea ka tiria hakaatea! E taurekareka kime koe e too te ora maauri ma te kanomata hokotahi, ma ki tauhi te hiaoa kanomata katoo ka tiria natahi ma koe ki loto te ahi hamataku.
Te parapol i te sipsip e teeai
(Luk 15.3-7)
10 #
Luk 19.10. “Mmata hakaraaoi ki teeai ki mee ina hakariaria koutou he tama i naa tamarriki nei. Anau e hua atu ki koutou, naa ensol naa tama nei e nnoho natahi peenaa ma taku Tamana i te vaelani. 11[E mee i te Tama te Tama ni au roo heaki ka too muri koai ni teeai.]
12“Koutou e mannatu pehee? Kime he tama e mee tana lau sipsip, ku hopo roo te sipsip hokotahi ka tere, aia raa ka tee nani te tiake te tipu hiva ma hiva sipsip naa i te taha te mouna ku hano roo no heaki mai te sipsip ni teeai naa?! 13Anau e hua atu, i tevaa aia ku rave ai te sipsip naa, aia raa ka hiahia roo i te sipsip hokotahi naa i aruna te tipu hiva ma hiva sipsip ni teeai ki hhae ki haho. 14Peenaa hoki te Tamana autou i te vaelani e ten'taa i he tamarikiriki hokotahi i naa tamarriki nei ki teeai.
Te kave tanata e mee te takahara i te koe
15 #
Luk 17.3. “Kime too kave e mee ni tiputipu takahara i te koe, hano ki te ia no hakkite ake naa takahara aana nii mee i te koe, koia kourua ki hakatonu teemuu koi i loto kourua. Kime aia e hakarono i te koe, akoe ku too muri too kave naa. 16Koia kime aia e tee hakarono i te koe, too he laa tama ma he hiaoa tama ki haka haiao ai naa hua autou, e mee i koutou he toka rua ma he toka toru e hua natahi. 17Kime aia e ten'taa te hakarono i koutou, ku hua ake roo ki illoa naa tama te lootu; ai kime aia e ten'taa hoki te hakarono i naa tama te lootu, ku haia roo pai he tama tee iloa i te Tama Hamataku ma he tama tootoo takis.
Naa mee e ppui ma e hakattana
18 #
Mat 16.19; Jon 20.23. “Anau e hua atu i te hamaauri, ni aa koutou e ppui i te kerekere nei raa ka puuia i te vaelani, anaa ni aa koutou e hakattana i te kerekere raa ka hakattana ina i te vaelani.
19“Anau e hua atu muri, kime he toka rua e mannatu natahi i he mee ka hakaruma ai, te Tamana i te vaelani raa ka mee ina te mee naa. 20Kime he toka rua ma he toka toru e kkutu natahi i taku inoa, anau raa ka noho ma laatou.”
Te parapol i te poe e tee nani te rano teroto
21 #
Luk 17.3,4. Ku hanake roo Pita ki Jisas no hiri ake, “Te Ariki, kime taku kave e hekau kaa mee peenaa naa tiputipu takahara i te nau, e hia naa vaa anau raa ka rano teroto i naa takahara aana nii mee i te nau? E nani naa vaa e hitu?”
22Ku hua ake roo Jisas, “Anau e hua atu, mee teeai ni vaa e hitu, koia naa vaa e tipu hitu ma hitu.
23“Te Mataapaa te Vaelani e taakoto pai he kini e mee ki hakahako naa tinao naa poe aana. 24Noho ia ki kaamata ki haka tonutonu naa tinao, naa tama ku too ake te tanata koai ni tinao purima naa mani i te ia. 25Te poe naa ni tee nani ana mani te tavi muri tana tinao, ku kavake roo te kini naa hua ki naa tama ki too te tanata naa ma tana avana ma ana tamarriki ma naa hekau katoo aana, ku kavake roo ki naraa tama ki tauvia anaa ku too ake muri ana mani.
26“Te poe naa ku tuu i ana turi i mua te kini ka hua ake, ‘Aroha i te nau ka ttari, ki oti anau ku tavi muri naa mee katoo!’ 27Te kini ni aroha i te ia ku hua ake roo ki teeai ki tavi muri tana tinao, anaa ku tiake roo ka hano.
28“Te tanata naa ku hano no ttiri roo ma te tama e hekau natahi laaua koai ni tinao naa ruai mani i te ia. Aia ni kkumi te komanu te tama hekau laaua naa ka hua ake, ‘Tavi mai muri heaa akoe ni tinao i te nau!’
29“Te tanata hekau laaua naa ku ttuu i ana turi ka hua ake ki te ia, ‘Aroha i te nau ka ttari, ki oti anau raa ka tavi atu muri naa mani aau.’
30“Koia aia ni ten'taa, ku hano roo aia no ponotia te tanata e mee tana tinao naa i te karapuhi ki nani roo aia e tavi muri tana tinao. 31Tevaa naraa poe ni kkite heaa te tama naa e mee, laatou ni mmate te arroha ku oo roo no hua ake naa mee katoo ki te kini.
32“Ku aru roo te kini i te poe naa ka hanake ki hare. Ku hua ake roo, ‘Akoe he poe hakariaria. Anau ni rano teroto katoo naa tinao aau i te koe ni tani mai i te nau, ku aroha roo anau i te koe. 33Ai kuu aa akoe ku tee aroha roo i te tama e hekau natahi ma koe pai ko anau ni aroha i te koe?!’ 34Te kini ni hat'roto ku hakauna roo te tanata naa ki te karapuhi ki nani roo aia e tavi muri katoo ana tinao.
35“Taku Tamana i te vaelani raa kaa mee peenei hoki i koutou taki tahi kime roo koutou e rano teroto i naa takahara autou kave i loto autou manava.”
Currently Selected:
Matiu 18: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
