Matiu 17
17
Te huaitino Jisas ku maahina
(Mak 9.2-13; Luk 9.28-36)
1Ku hhiti naa laa e ono Jisas ku too Pita, Jems ma Jon te kave a Jems, ku oo roo hoko laatou ki aruna te mouna mau aruna. 2I kinaa naa disaipol ku kkite te huaitino Jisas ku huri no keeia. Naa paiaha aana e maahina pai ko te laa ma naa kahukahu aana e maatea hua. 3Ku kkite roo te toka toru disaipol naa i Moses ma Elijah e ttuu ake ka hua ma Jisas.
4Pita ku hua ake ki Jisas, “Te Ariki, e taurekareka roo i maatou e nnoho i kinei. Kime koe e ruu, anau raa ka penapena ni tamaa hare e toru, te hare aau, te hare Moses, ma te hare Elijah.”
5 #
Mat 3.17; 12.18; Mak 1.11; Luk 3.22. #
2 Pe 1.17,18. Tevaa aia koi tuu ka hua, te kaniva e maahina ku opo tia laatou, ku hua ake roo te roe i loto te kaniva, “Anei ko taku tino Tama anau e ruu hamataku ai, hakarono i te ia!”
6Tevaa naa disaipol ni rrono i te roe naa, laatou ni mattaku katoo ka rruku ki laro ma laatou paiaha e hhuri ki laro ki te kerekere. 7Koia Jisas ni hanatu ki laatou no paa roo i laatou ka hua ake, “Mahhike ki aruna, koutou teeai ki mattaku!” 8Naa disaipol ku mmata atu no kkite roo i Jisas e tuu ake hokoia.
9Tevaa laatou ni oo iho ki laro te mouna, Jisas hua ake ki laatou, “Teeai ki hua ake ki he tama heaa koutou ni kkite ki nani roo te Tama te Tama ku hakamahike muri i te mate.”
10Naa disaipol ku hiri ake ki te ia, “Ai naa tisa naa Loo e hua ai poro Elijah raa ka au i mua?”
11Ku hua ake roo Jisas, “Elijah raa ka au hamaauri i mua no aarere naa mee katoo. 12#Mat 11.14.Anau e hua atu ki koutou, Elijah ku oti te au, koia naa tama ni teeai ki illoa i te ia. Laatou nii mee hakariaria ina ia tautari i te ruu laatou. Laatou raa kaa mee hakariaria ina hoki peenaa i te Tama te Tama.”
13Anaa ki illoa ai naa disaipol poro Jisas e hua ake ki laatou i Jon te Paptis.
Jisas e mee ina te tama taane e uruhia te anana hakariaria loo taurekareka
(Mak 9.14-29; Luk 9.37-43a)
14Tevaa laatou ni ahe muri ki te apiana naa tama, te tanata hokotahi ku hanake no tuu ana turi i mua Jisas 15ka hua ake, “Te Ariki, aroha i taku tama! Aia e maki kaa mee pai e vvare ka porepore tana huaitino. Purima vaa aia e hopo ki loto te ahi ma i loto te vai. 16Anau ni too aia ki naa disaipol aau, koia laatou ni tee nani te mee ina ia ki taurekareka.”
17Ku hua ake roo Jisas, “Koutou ni tama e lootu kailehi ma naa manava takahara. Anei he vaa potopoto anau ni noho ma koutou ka huia koutou? Toomai te tama naa ki anau!” 18Jisas ku heatua te anana no hakataha roo i te tamarikiriki tanata no taurekareka muri roo te tama naa.
19Ku oo ake roo naa disaipol hoko laatou ki Jisas no hiri ake ki te ia, “Ai maatou ni tee nani ai te hakataha ina te anana?”
20 #
Mat 21.21; Mak 11.23; 1 Korin 13.2. Ku hua ake roo Jisas, “Koutou ku tee nani te mee, e mee i koutou tee lootu hamaauri i te nau. Anau e hua atu i te hamaauri, kime te lootu koutou i te nau e punarikiriki pai ko te hatu laakau te mastat, koutou e nani te hua ake ki te mouna nei, ‘Maneke i kinei ki kilaa!’ mee raa ka maneke. Koutou raa ka nani te mee naa mee katoo roo. 21[Koia naa mee nei raa ka hhae koi kime koutou e hakaruma ka hakatapu tee kkai.”]
22Te vaa naa disaipol ni kkutu natahi i Galili, Jisas hua ake ki laatou, “Te Tama te Tama raa ka tooa no kavake ki naa rima naa tama. 23Laatou raa ka taia te ia ka mate, anaa i te laa hakatoru aia raa ka hakamahike ria no ora.”
Naa disaipol ni rrono ku mmate roo te arroha.
Te takis te Hare tapu
24Tevaa Jisas ma naa disaipol aana ni oo ake ki Kapenaum, naa tama tootoo naa takis te Hare tapu ni oo ake ki Pita no hiri ake, “Te tisa koutou naa e tatavi hoki te takis te Hare tapu?”
25Ku hua ake roo Pita. “Iinoo.”
Tevaa Pita ni uru ki loto te hare, Jisas ku hakahua ake i mua. “Saimon, pehee tau maanatu? Koai ki tatavi naa takis ki naa kini te kerekere nei? Naa tama roo te henua naa ma ko naa horau?”
26Hua ake roo Pita. “Naa horau.”
Ku hua ake roo Jisas, “E mee pai naa tama roo te henua e tee nani te tavi. 27Koia taatou ten'taa te mee ina naa tama nei ki hatunaaroto. Hano ki te tai no ttiri tau uka ka hutihuti. Too te ika mua aau e hhuti no taaraki tana pukua, akoe raa ka kite te mani, e nani te tavi naa takis taaua. Too te mani naa no tavi naa takis taaua.”
Currently Selected:
Matiu 17: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
