Matiu 16

Naa tama e rruu ki kkite he mirakol

(Mak 8.11-13; Luk 12.54-56)

1 # Mat 12.38; Luk 11.16. Naa Faarisi ma naa Sadusi ni rruu ki hakaaria Jisas. Ku hua ake roo ki te ia kii mee he mirakol ki hakkite ake poro aia e mee naa hekau te Tama Hamataku.

2Ku hua ake roo Jisas, “Te vaa te laa kuu mee ki huru, koutou raa ka hua poro te mee raa ka marino, e mee i te kaniva e mmea. 3Anaa i te tap'taiao koutou raa ka hua, ‘I te laa nei, te henua raa ka hai ua, e mee i te kaniva e mmea ka popoouri.’ Koutou e nani koi te mmata i naa tiputipu te kaniva ka illoa i te taakoto te laa naa, koia koutou e tee nani pehee te illoa i naa tiputipu e hekau i tevaa nei? 4#Mat 12.39; Luk 11.29.Koutou naa tama te laa nei e hakarria ka teeai ki lootu hamaauri. Koutou e rruu ki hakkite atu he mirakol? Mee teeai! Tino mirakol koutou raa ka kkite ko te mirakol Jona.”

Ku hano roo Jisas ka tiake laatou.

Mmata hakaraaoi i naa ʻyisʼ naa Faarisi ma naa Sadusi

(Mak 8.14-21)

5Tevaa laatou ni hakahiti ai ki telaa taha Tai Galili, naa disaipol ni rano teroto te too ni haraoa ka oo ma laatou. 6#Luk 12.1.Ku hua ake roo Jisas ki laatou. “Mmata hakaraaoi koutou i naa ʻyisʼ naa Faarisi ma naa Sadusi.”

7Naa disaipol ku kaamata ka hua ki laatou roo, “Aia e hua mai peenaa e mee i taatou ni teeai ki toomai ni haraoa.”

8Jisas e iloa heaa naa disaipol e ttuu ka hua ai, ku hiri ake roo ki laatou, “Ai koutou e ttuu ka hua ai poro koutou e tee hai haraoa? Ai kuu aa koutou teeai ki mannatu haiao i te Tama Hamataku?! 9#Mat 14.17-21.Koutou e hikiai roo ki illoa? Koutou ku teeai ki mannatu i naa haraoa e rima ni tohitohi anau ka haanai ai himata e rima naa taanata? E hia naa kete koutou ni haohao no ppii? 10#Mat 15.34-38.Ai naa haraoa e hitu ni kkai naa taanata e haa naa himata, e hia naa kete koutou ni haohao no ppii? 11Koutou ku tee illoa pehee poro anau teeai ki hua atu i naa haraoa? Mmata hakaraaoi koutou i naa ʻyisʼ naa Faarisi ma naa Sadusi.” 12Ku illoa roo naa disaipol poro Jisas e teeai ki hua ake ki laatou ki mmata hakaraaoi i naa ʻyisʼ e pena ai naa haraoa, koia ki mmata hakaraaoi laatou i naa hua naa Faarisi ma naa Sadusi e hikuru laatou.

Pita e hua poro Jisas ko te Mesaea

(Mak 8.27-30; Luk 9.18-21)

13Jisas ku hanatu ki te matakaaina Sisaria Filipai no hiri ake roo ki naa disaipol, “Naa tama e hua poro te Tama te Tama koai?”

14 # Mat 14.1,2; Mak 6.14,15; Luk 9.7,8. Hua ake roo laatou, “E mee naa tama e hua poro ko Jon te Paptis; naraa tama e hua poro ko Elijah, ma naraa tama e hua poro ko Jeremaia ma he tama i naraa profet te raa raa.”

15Hiri ake roo Jisas ki laatou, “Ai koutou? Koutou e hua poro anau koai?”

16 # Jon 6.68,69. Hua ake roo Saimon Pita, “Akoe ko te Mesaea, te Tama te Tama Hamataku e noho ora i naa vaa katoo.”

17Hua ake roo Jisas, “Taurekareka roo i te koe, Saimon te tama a Jon! Naa hua hamaauri naa e teeai ki kavatu naa tama te kerekere nei; naa hua naa e kavatu tonu taku Tamana i te vaelani. 18Anau e hua atu ki te koe Pita: Akoe he hatu; i aruna te hatu nei anau raa ka pena naa tama te lootu aaku, anaa te haiao te mate e tee nani te taumia naa tama te lootu nei. 19#Mat 18.18; Jon 20.23.Anau raa ka kavatu ki te koe naa kii te Mataapaa te Vaelani. Heaa te koe e ppui i te kerekere nei raa ka puuia i te vaelani, ma heaa te koe e hakattana i te kerekere nei raa ka hakattana ina i te vaelani.” 20Ku hua ake roo Jisas ki naa disaipol aana ki teeai ki hua ake ki he tama poro aia ko te Mesaea.

Jisas e hua poro aia raa ka taia ki mate

(Mak 8.31—9.1; Luk 9.22-27)

21Kaamata i te vaa naa, Jisas ku kaamata ka hua ake ki naa disaipol aana: “Anau raa ka hano ki Jerusalem no hakarrono te isu i te purima mee i naa rima naa hamaatua te henua, naa hamaatua te lootu ma naa tisa naa Loo. Anau raa ka taia ka mate, koia ki hhiti naa laa e toru te Tama Hamataku raa ka hakamahike ria anau no ora muri.”

22Pita ku too Jisas ki te taha no kaamata roo ka heatua te ia no hua ake, “Te Ariki, koe tee nani te haia peenaa!”

23Jisas ku tahuri no hua ake ki Pita, “Satan, hakataha i te nau! Akoe teeai ki puuia taku haarena. Naa mannatu aau naa teeai ni mannatu e kavatu te Tama Hamataku; anaa ni mannatu naa tama te kerekere.”

24 # Mat 10.38; Luk 14.27. Ku hua ake roo Jisas ki naa disaipol aana, “Kime he tama e ruu ki tautari mai i te nau, aia ki tiake naa mee tana tino e ruu ai ku hhau roo tana koros i naa laa katoo loo tautari i te nau. 25#Mat 10.39; Luk 17.33; Jon 12.25.Te tama e ruu ki hakahao tana ora, aia raa ka teeai ki kite i tana ora, koia te tama e tiake mai tana ora ki te nau, aia raa ka rave tana ora. 26He taurekareka pehee te tama raa ka too kime te ia e too naa mee katoo te kerekere, koia e teeai ki tauhi te ora hamaauri? 27#Mat 25.31; Rom 2.6.Te Tama te Tama raa ka au i te haiao ma te maahina tana Tamana ma naa ensol aana no kavake roo naa tavi naa tama, tautari ni aa laatou ni ppena i te kerekere nei. 28Anau e hua atu hamaauri ki koutou, e mee naa tama e ttuu i kinei koai raa ka tee nani te mmate ki nani roo laatou ku kkite i te Tama te Tama e au pai he Kini.”

Currently Selected:

Matiu 16: NUR

Highlight

Compare

Copy