Matiu 15

Naa loo naa tippuna i te raa raa

(Mak 7.1-13)

1I te vaa naa e mee naraa Faarisi ma naraa tisa naa Loo ni oo ake i Jerusalem, ku ooatu roo laatou ki Jisas no hiri ake, 2“Ai kuu aa naa disaipol aau e teeai ki tautari naa Loo naa tippuna taatou i te raa raa ni hua mai i taatou ki tautari? Laatou e teeai ki veku mua laatou rima i tevaa laatou e mee ki kkai!”

3Jisas hua ake, “Ai koutou e tautari ai naa tiputipu autou ka teeai ki tautari naa loo te Tama Hamataku? 4E mee i te Tama Hamataku e hua, ‘Hakarono hua i naa tammana ma naa tinana autou,’ ma ‘Te tama e hua ni hua hakarria i tana tamana ma tana tinana, aia raa ka taia ki mate.’ 5Koia koutou e hua poro kime he tama e mee ana mani ki huia tana tamana ma tana tinana, koia aia e hua ake ki laaua, ‘Anau ku oti te hamaatino naa mee nei ki kavake ki te Tama Hamataku,’ 6te tama naa e teeai ki maanatu i tana tamana kaa mee hakaraaoi i te ia. I te tiputipu nei koutou e tuku naa hua te Tama Hamataku ki laro ka hhau naa tiputipu autou ni too i autou tippuna ki aruna. 7Koutou naa tama hua kairrehi! Asaia e hua hamaauri i tevaa aia ni hua i koutou poroo:

8‘Naa tama nei e hhau taku inoa ma laatou muaihu,

koia laatou manava e mmao i te nau.

9Mee teeai ki tonu i laatou ki lootu i te nau

e mee i naa loo laatou e hakailoa ai naa tama,

anaa ni loo koi laatou;

mee teeai ni loo aaku.’ ”

10Jisas ku varoina te apiana naa tama ka oo ake ki te ia, ku hua ake roo ki laatou, “Hakarrono ki illoa koutou! 11Heaa e uru ki loto te pukua te tama e teeai ki mee ina te tama ka ʻkerekereʼ, koia te mee e hhae ki haho te pukua e mee ina te tama ka ʻkerekereʼ.”

12Ku oo ake roo naa disaipol ki te ia no hhiri ake, “Akoe e iloa poro naa Faarisi ni hat'roto i naa hua aau ni hua?”

13Ku hua ake roo Jisas, “Naa laakau katoo taku Tamana i te vaelani ni teeai ki ttoki raa ka unuunu katoo i naa aka laatou. 14#Luk 6.39.Tiake laatou; laatou kanomata e ppuni. Kime te tama kanomata ppuni e hattaki telaa tama kanomata ppuni, laaua katoo raa ka rruku i te rua.”

15Hua ake roo Pita, “Naa hua parapol naa e hua ki aa?”

16Jisas hiri ake ki laatou, “Koutou hoki ku vvare pai ko naa tama naa? 17Koutou e hikiai ki illoa? Heaa e uru ki loto te pukua raa ka hano ki loto te manava, ki oti ku hhae mai roo ki haho te huaitino. 18#Mat 12.34.Koia naa mee e hhae ki haho te pukua e oomai i te manava, anaa ko naa mee e mee ina te tama ka ʻkerekereʼ. 19E mee i naa mannatu hakarria e hhae mai i loto te manava te tama ki tinai te tama ki mate, ki moemmoe ma naraa haahine, huuhuu hekau, hua kailehi, ma ki tau telaa tama. 20Anei ko naa mee e mee ina te tama ka kerekere. Koia ki kai ma naa rima kerekere e teeai ki mee ina te tama ka kerekere.”

Te hahine e maanatu haiao ka lootu hamaauri i Jisas

(Mak 7.24-30)

21Jisas ku tiake te kuana naa ku hano roo ki naa matakaaina e taapiri ki naa taon Taire ma Saidon. 22Te hahine i Kenan koai e noho i kinaa ni hanake ki Jisas no varo ake, “Te Ariki, te Tama David! Aroha i te nau! Te tama hahine aaku e uruhia naa anana ka mee ina hakariaria.”

23Koia Jisas ni teeai ki hua ake ni hua ki te ia. Ku ooatu roo naa disaipol no hua ake ki Jisas, “Kereia te hahine naa ki hano. Aia e tautari mai ka varovaro peenaa i taatou.”

24Ku hua ake roo Jisas, “Anau e hakauna mai ki huia koi naa tama Israel e mee pai ni sipsip e teeai.”

25Te hahine naa ku hanake no ttuu i ana turi i mua Jisas ka hua ake, “Te Ariki, huia anau!”

26Hua ake roo Jisas, “Mee teeai ki taurekareka ki too naa kai naa tamarriki no riakina roo i naa manu kaitama.”

27Hua ake roo te hahine, “Te Ariki, mee hamaauri, koia naa manu kaitama hoki e kkai naa kaikaina e rruku i te hoa laatou hamaatua.”

28Ku hua ake roo Jisas ki te ia, “Akoe e lootu hamaauri i te nau. Heaa koe e ruu mee raa ka mee ina i te koe!” Anaa te vaa naa koi tana tama hahine ku taurekareka.

Jisas e haanai purima naa tama

29Jisas ku tiake te kuana naa ku hano roo ki Tai Galili. Ku hano roo ki aruna te tama mouna no noho ai. 30Te purima tama ni oo ake ki te ia ma naa tama vae mmate, naa tama kanomata ppuni, naa tama ppiri, naa tama tee nani te hua, ma naraa purima tama mmaki, no haka moemoe i mua naa vae Jisas; ku hakataha ina roo aia naa maki laatou. 31Naa tama ni tteki i tevaa laatou ni kkite ai i naa tama tee nani te hua ku hua, naa tama ppiri ku taurreka, naa tama vae mmate ku haare, ma naa tama kanomata ppuni ku kkite; anaa ku hhau roo laatou te inoa te Tama Hamataku Israel.

32Jisas ni varo i ana disaipol ka oo ake ki te ia, ku hua ake roo, “Anau e aroha roo i naa tama nei; laatou ni nnoho ma anau naa laa e toru ka tee hai mee ki kkai. Anau e ten'taa te hakauna laatou ki oo hikkai, laa ki herrei laatou i te haarena.”

33Ku hua ake roo naa disaipol aana, “Maatou ka toomai ni purima haraoa i hea i te kuana taakoto hua nei ki haanai ai purima naa tama nei?”

34Hiri ake roo Jisas, “E hia naa haraoa e nnoho ma koutou?”

Hua ake roo laatou, “E hitu ma naa ruai tama ika.”

35Ku hua ake roo Jisas ki te apiana ki nnoho i te kerekere. 36Ku too roo aia naa haraoa e hitu ma naa ika no lootu i te Tama Hamataku, ku tohitohi roo ka kavake ki naa disaipol, anaa naa disaipol ku too no tuha i naa tama. 37Naa tama katoo ni kkai no ppohu. Ku too roo naa disaipol naa kete e hitu ka hhao naa kai toe no ppii. 38Te koina naa taanata katoo ni kkai e nani naa himata e haa, teeai ki pau ria naa haahine ma naa tamarriki. 39Ku hakauna roo Jisas te apiana naa tama ka oo, ku kake roo i te poki ka hano ki te matakaaina Magadan.

Currently Selected:

Matiu 15: NUR

Highlight

Compare

Copy