Matiu 14

Te mate Jon te Paptis

(Mak 6.14-29; Luk 9.7-9)

1I te vaa naa Herod te kini i Galili ni rono i naa tama e hua i Jisas. 2Ku hua ake roo ki naa tama e hekau i te ia, “Anei ko Jon te Paptis; aia ku oti te mahike muri i te mate! Anei e haiao ai te ia kii mee naa mirakol.”

3 # Luk 3.19,20. Herod ni haihai Jon no ponotia roo i te karapuhi e mee i Herodias, te avana mua tana kave Filip. 4Aia nii mee peenei e mee i Jon ni hua ake ki te ia poroo, “Mee teeai ki tonu i te koe ki aavana i Herodias!” 5Herod ni mee ki taia Jon ki mate, koia ni mataku i naa tama, e mee i laatou e hua poro Jon he profet.

6I te vaa Herod nii mee tana kai ki matino tana vaa ni haanau ai, te tamarikiriki hahine Herodias ni hanake no anu i mua laatou katoo. Herod ni hiahia hamataku, 7ku hua ake roo ki te tamariki hahine, “Anau raa ka kavatu ni mee pehee te koe e hiri mai ai.”

8Te tinana te hahine naa ku kavake tana maanatu ku hua ake roo te hahine raa ki Herod, “Tevaa nei koi ku kamai te pokouru Jon te Paptis i aruna he pereti.”

9Te kini ni rono i naa hua naa ku maanatu tamaki roo, koia e mee i te ia ku oti te ttiri naa hua ki te hahine i mua naa tama katoo, ku hua ake roo ki naa soldia aana ki kavake heaa te hahine e ruu ai. 10Ku hua ake roo ki ana soldia ki oo no ttuu te komanu Jon i loto te hare karapuhi. 11Te pokouru Jon ni too ake naa tama i aruna te pereti no kavake ki te hahine, ku hhau roo te ia ka too ki tana tinana. 12Naa disaipol Jon ni oo ake no too tana huaitino no tanu. Ki oti ku oo roo no hua ake ki Jisas.

Jisas e haanai naa taanata e nani naa himata e rima

(Mak 6.30-44; Luk 9.10-17; Jon 6.1-14)

13Tevaa Jisas ni rono i naa hua poro laatou ni taia Jon ka mate, ku tiake roo te kuana naa ka kake i te poki no hano hokoia ki te kuana e purono. Te apiana naa tama ni rrono peenaa ku tautari atu roo i te ia i laatou vae i aruna te henua. 14Tevaa Jisas ni tae ka hepu i te poki no kite i te apiana naa, aia ni aroha roo i laatou, ku mee ina roo naa tama mmaki ka taurreka.

15Te mee ku taapiri ki ahiahi ku oo ake roo naa disaipol aana no hua ake ki te ia, “Te kuana nei e taakoto hua anaa te laa hoki ku taapiri ki huru. Hakauna naa tama ki oo ki naa matakaaina taapiri ki nani laatou te tavi ni kai ma laatou.”

16Ku hua ake roo Jisas, “Laatou tee nani te oo. Koutou kavake ni kai ma laatou ki kkai.”

17Hua ake roo laatou, “Maatou e mee koi naa tino haraoa e rima ma naa ika e lua i kinei.”

18Hua ake roo Jisas, “Toomai naa mee naa ki te nau i kinei.” 19Ku hua ake roo aia ki te apiana ki nnoho i te mouku. Jisas ku too naa haraoa e rima ma te hiaoa ika, ku mmata roo ki te vaelani no lootu i te Tama Hamataku ka tohitohi naa haraoa. Ku kavake roo ki naa disaipol ki tuha haare i naa tama katoo. 20Laatou katoo ni kkai ka ppohu, ku too roo naa disaipol naa kai ttoe loo hhao naa kete e hanahuru ma rua no ppii. 21Te koina katoo naa tama ni kai e nani pai ni himata e rima tino taanata, teeai ki pau ria naa haahine ma naa tamarriki.

Jisas e tere i aruna te tai

(Mak 6.45-52; Jon 6.15-21)

22Ku hua ake roo Jisas ki naa disaipol ki hakkei i te poki ka oo ki telaa taha te tai, ku hakauna roo te apiana naa ka oo. 23Ki oti ku kake roo aia hokoia ki te taha te mouna no hakaruma. Tevaa te laa ni huru, aia ni noho hokoia i kinaa. 24Te vaa naa te poki ku oti te hano mmao i te henua, anaa te matani ni oko mai i mua ma te peau no hauhaua te poki.

25I te vaa te ata i te tap'taiao, Jisas ku hanatu ki naa disaipol, aia e haare atu i aruna te tai. 26Tevaa naa disaipol ni kkite i te ia, laatou ni mattaku ka hua, “Anaa he anana!” Laatou ni hua ka vaha ma te mattaku.

27Koia hakavave roo Jisas hua ake ki laatou, “Koutou teeai ki mattaku! Anei ko anau.”

28Pita ku varo ake, “Te Ariki, kime anaa ko koe maauri, hua mai i te nau ki haare atu ki te koe i aruna te tai.”

29Hua ake roo Jisas, “Mai kaa!” Ku hepu roo Pita i te poki ka tere atu ki te ia i aruna te tai. 30Koia i tevaa Pita ni kite i te haiao te matani, aia ni mataku ku kaamata roo ki apuru ka tanitara, “Te Ariki, huia anau!”

31Ku hakavave roo Jisas ka hakatae atu tana rima no tauhi te ia ka hua ake, “Ai kuu aa te koe ku teeai ki maanatu haiao i te Tama Hamataku?! Ai te koe e maanatu tamaki ai ka mataku?”

32Hakkei natahi laaua i te poki, te matani ku ttuku ka marino. 33Naa disaipol i aruna te poki ni lootu i Jisas ka hua, “Hamaauri roo, akoe ko te Tama te Tama Hamataku.”

34Laatou ni oo ki telaa taha no tae atu roo i Genesaret. 35Tevaa naa tama te henua naa ni maatino poro ko Jisas, laatou ni hakauna naa hua ki naa taon katoo, ku too ake roo laatou naa tama mmaki ki Jisas. 36Laatou e ttani ki Jisas ki tiake naa tama mmaki ki ppaa koi naa rima laatou i tana kahukahu, anaa naa tama katoo ni ppaa naa rima laatou i te ia ni taurreka muri.

Currently Selected:

Matiu 14: NUR

Highlight

Compare

Copy