Matiu 13
13
Te parapol te tama e riaki naa hatu wit
(Mak 4.1-9; Luk 8.4-8)
1I te laa naa koi Jisas ni hhae i te hare naa ka hano no noho i te tahuahua i tai ka hikuru naa tama. 2#Luk 5.1-3.Purima tama ni oo ake roo muimui haka areha ina te ia, ku hano roo Jisas no kake no noho i aruna te poki ka ttuu te apiana naa i te tahuahua. 3Ku hua ake roo Jisas purima hua i naa hua parapol.
“Tevaa hokotahi te tama ni hano no riaki naa hatu wit i tana uaka. 4E mee naa hatu ni rruku i te haarena, ku herrei ake roo naa manu no kaina. 5Naraa hatu ni rruku i te kuana hatuhatu ka tee hai kerekere hakaraaoi no kaamata roo ka hhomo. 6Koia te laa ni tii no vela ina roo naa laakau wit, e mee naa wit tee hai patiaka i te kerekere e hatuhatu ka pakupaku. 7Naraa hatu wit ni rruku ka hhomo i loto naa mouku hai tara. Naa wit naa ni opo tia naa mouku hai tara raa no mmate. 8Koia naraa hatu wit ni rruku i te kerekere taurekareka no hhomo ka ttau naa hua: Naa laakau wit e ttau ai naa hua pai he lau, naraa laakau e tipu ono, naraa laakau e tipu toru.”
9Ku hakaoti roo naa hua Jisas ka hua ake, “Koai e hai kautarina, aia ki hakarono.”
Naa hua parapol e hua ki aa
(Mak 4.10-12; Luk 8.9,10)
10Naa disaipol ni oo ake ki Jisas no hiri ake, “Ai akoe e hua ake ai ki naa tama i naa hua parapol?”
11Ku hua ake roo Jisas, “Te iloa i naa hua e huu te Mataapaa te Vaelani e kavatu ki koutou, koia teeai ki laatou. 12#Mat 25.29; Mak 4.25; Luk 8.18; 19.26.Te tama e hai mee aia raa ka too naraa mee ki nani katoo naa mee aana; koia te tama e tee hai mee, naa momo mee aana naa raa ka hakataha ina i te ia. 13Anei e hua ake ai anau ki laatou i naa hua parapol:
Ai kiaa laatou e hhila, laatou tee nani te kkite maauri,
ai kiaa laatou e rrono, laatou e tee nani te rrono ka illoa maauri.
14“Naa hua te profet Asaia e hua i laatou:
‘Naa tama nei raa ka hakarrono, koia tee nani te illoa;
laatou raa ka heaki, koia tee nani te kkite,
15e mee i laatou e pouri laatou roto,
ka haturituri laatou kautarina
ka hapunipuni laatou kanomata.
Ki teeai laa laatou e nani te kkite i laatou kanomata,
ka rrono i laatou kautarina,
ma naa roto laatou raa ka tarraki,
anaa laatou raa ka ten'taa te oomai ki te nau
ki mee ina laatou ki taurreka muri.’
16 #
Luk 10.23,24. “Koia koutou hiahhia, e mee i koutou e nani te kkite i autou kanomata ka rrono i autou kautarina. 17Anau e hua atu i te hamaauri, purima profet ma naa tama e ttonu ni rruu ki kkite heaa koutou e kkite, koia laatou ni tee nani te kkite. Laatou ni rruu ki rrono heaa koutou e rrono, koia ni tee nani ki rrono.
18“Hakarrono kaa poro te hua parapol nei e hua mai ki aa: 19Naa tama e rrono i naa hua te Mataapaa koia tee illoa hakaraaoi, e mee pai ko naa hatu wit e rruku i te haarena. Te tama hakariaria e hanatu no hakataha ina heaa e toki i loto laatou manava. 20Naa hatu wit e rruku i te kerekere hai hatu naa ko naa tama e rrono i naa hua ka tautari ma te hiahia. 21Koia naa hua naa ni teeai ki tauhi laatou i loto laatou manava ka taakoto roroa. Tevaa naa mee hakarria e pakkuu ake i laatou e mee i naa hua naa, laatou ku hakavave no tiake. 22Naa hatu wit e rruku i te kuana hai tara naa ko naa tama e rrono, koia naa tiputipu, naa mani, ma naa takaro te kerekere e haiao i loto naa ora laatou. Anaa laatou tee nani te kkite naa tiputipu taurreka i naa ora laatou. 23Naa hatu e rruku i te kerekere taurekareka naa ko naa tama e rrono i naa hua ka too hakaraaoi ki loto laatou manava: Ku hhua roo laatou purima naa hua pai ni lau, tipu ono, ma tipu toru.”
Te parapol i naa mouku e hhomo
24Ku hua ake roo Jisas ki laatou telaa parapol: “Te Mataapaa te Vaelani e taakoto pai he tama e riaki naa hatu wit i te uaka aana. 25Koia tevaa naa tama katoo ni mmoe, te tama e haeko i te ia ni hanake no toki haare roo naa hatu mouku hakarria i naa vaa naa wit ku hano roo. 26Tevaa naa wit ni hhomo ake roo kaamata ki hhua, naa mouku hakarria ku hhomo ake hoki.
27“Naa tama hatapatapa te tama e mee tana uaka naa ku oo ake ki te ia no hua ake, ‘Akoe ni riaki naa hatu wit taurreka i tau uaka; araa kaa ni mouku hakarria e hhomo ake pehee?’
28“Hua ake roo te ia, ‘Te tama e haeko i te nau nii mee te mee naa.’
“Naa tama hatapatapa hiri ake ki te ia, ‘Akoe e ruu i maatou ki oo roo unuhia naa mouku hakarria?’
29“Hua ake roo te ia, ‘Teeai, kime koutou raa ka unuunu naa mouku hakarria koutou ka unu natahi roo ma naa wit. 30Tiake naa wit ma naa mouku ki hhomo natahi ki nani i tevaa ki haki. Anau raa ka hua ake ki naa tama ki unuunu naa mouku i mua, ki oti ku haihai ku ttuni roo. Naa wit raa ku hanaopo laatou no tuku i loto te hare e mmoe naa wit.’ ”
Naa hua parapol i te hua mastat ma te ʻyisʼ
(Mak 4.30-34; Luk 13.18-21)
31Jisas hua ake naraa hua parapol ki laatou: “Te Mataapaa te Vaelani e taakoto peenei: Te tama e too te hatu mastat no toki i tana uaka. 32Teenaa ko te hatu e punarikiriki roo i naa hatu katoo, koia i tevaa e homo ake, mee raa ka hamataku roo i naa laakau e hhomo. Ku herrei ake roo naa manu no ppena naa ohana laatou i ana mataaraa.”
33Jisas hua ake hoki naraa hua parapol: “Te Mataapaa te Vaelani e taakoto peenei: Te hahine e too te ʻyisʼ no huri ma purima naa haraoa, ku hhura loo te haraoa no hamataku.”
34Jisas ni hua ake naa hua katoo nei ki te apiana naa tama i naa hua parapol. Aia ni teeai ki hua pela hoki. 35Aia nii mee peenei ki hamaauri ai naa hua te profet ni hua i mua:
“Anau raa ka hua i naa hua parapol i tevaa anau e hua ki laatou;
Anau raa ka hua ake i naa mee ni huu kaamata i tevaa te kerekere ni penapena ina.”
Naa hua parapol i naa mouku e hhomo e hua i te aa
36Ku tiake roo Jisas te apiana naa ka hano no uru ki loto te hare, ku oo ake roo ana disaipol no hua ake ki te ia, “Hakailoa mai, te hua parapol i naa mouku e hua i te aa?”
37Ku hua ake roo Jisas, “Te tama e riaki naa hatu wit taurreka naa ko te Tama te Tama. 38Te uaka naa ko te kerekere nei, anaa naa hatu taurreka naa ko naa tama te Mataapaa. Naa mouku naa ko naa tama te tama hakariaria. 39Te tama haeko i te Tama te Tama e riaki naa mouku naa ko te tama hakariaria. Te vaa ki haki te uaka naa ko tevaa te aarere naa mee katoo, ma naa tama ki haki naa wit naa ko naa ensol. 40E mee pai ko naa mouku e unuunu ka riakina i te ahi, mee raa ka taakoto peenaa hoki i te aarere naa mee katoo: 41Te Tama te Tama raa ka hakauna naa ensol aana no hakataha ina i tana Mataapaa naa tama koai e mee ina naraa tama ki ppena naa takahara hakapaa ma naa tama e ppena naa takahara. 42Laatou raa ka riakina ki loto te ahi e vvela hamataku, te kuana laatou raa ka ttani ka kkii laatou niho. 43Naa tama te Tama Hamataku raa ka maahina pai ko te laa i loto te Mataapaa te Tamana laatou. Koai e hai kautarina, aia ki hakarono.”
Te parapol i te pontau mani e tanu i loto te uaka
44Jisas hua ake hoki, “Te Mataapaa te Vaelani e mee pai he pontau mani e huu i loto te uaka. Tevaa te tama ni kite, aia ni too no tanu muri. Aia ni hiahia hamataku ku hano roo no too naa hekau katoo aana no kavake i naa tama ki tauvia, ku too muri roo naa mani no tavi te uaka naa.
Te parapol i te paa e makilakila
45“Te Mataapaa te Vaelani hoki e mee pai te tama e heaki i naa paa e makilakila. 46I te vaa aia ni rave ma te mee hokotahi e taurekareka roo, aia ku too naa hekau katoo aana no kavake i naa tama ki tauvia, ku too roo naa mani no tavi te paa naa.
Te parapol i te ave
47“Te Mataapaa te Vaelani hoki e mee pai ni tama haanota e riaki laatou ave i te tai no rrave roo naa ika haporroto. 48Tevaa te ave ku pii, ku hhuti roo laatou ki te tahuahua. Ku nnoho roo laatou ka vvae naa ika: Naa ika taurreka e haohao i naa kete, naa ika hakarria e riakina. 49Mee raa ka taakoto peenei i te aarere naa mee katoo. Naa ensol raa ka oomai no hakkee naa tama takahara i naa tama taurreka, 50ku riakina roo naa tama takahara ki loto te ahi e vvela hamataku, te kuana laatou raa ka ttani ka kkii laatou niho.”
51Jisas hiri ake i laatou, “Koutou ni illoa i naa mee nei katoo?”
Ku hua ake roo laatou, “Iinoo.”
52Ku hua ake roo Jisas ki laatou, “Naa tisa katoo naa Loo koai ni hikuru ina i naa mee te Mataapaa te Vaelani e mee pai ko te tama e hhana naa mee tuai natahi ma naa mee hoou ki haho i tana hare e tuku ai ana mee.”
Te profet e teeai ki mannatu haiao ina naa tama tana henua
(Mak 6.1-6; Luk 4.16-30)
53Tevaa Jisas ni oti te hua ake i naa hua parapol nei, ku tiake roo te kuana naa 54ka hano muri ki te taon aana ni matua ai. Aia ni hikuru naa tama i loto te hare lootu laatou, anaa laatou koai ni rrono i te ia ni oho laatou mouri. Laatou ku hhiri, “Te tama nei e too tana iloa i hee? Koai e kavake te haiao ki nani ia te mee naa mirakol? 55Eaa nei, anei teeai ko te tama te kapenta, ma tana tinana ko Meri? Anei teeai ko te kave tanata Jems, Josep, Saimon ma Judas? 56Naa kave haahine aana e nnoho ma taatou. Aia ni too naa mee katoo nei i hee?” 57#Jon 4.44.Ku kereia roo laatou te ia.
Koia Jisas hua ake ki laatou, “Te profet e hakanau ria i naa kuana katoo, koia i tana taon ma tana haanau roo, aia e teeai ki ilotia.” 58Jisas ni teeai kii mee ni purima mirakol i te kuana naa, e mee i laatou ni teeai ki mannatu haiao i te ia.
Currently Selected:
Matiu 13: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
