Matiu 12
12
Jisas te Ariki te Sapat
(Mak 2.23-28; Luk 6.1-5)
1Ki oti naa Jisas ku hano haare i te uaka naa wit i te laa Sapat. Naa disaipol aana ni hii kkai ku hakihaki roo naa poupou naa wit ka kkai naa hua. 2Tevaa naa Faarisi ni kkite peenaa, ku hua ake roo ki Jisas, “Mmata, naa disaipol aau e mee naa tiputipu e hhara. Laatou e mee heaa naa Loo e hua ki teeai kii mee i te Sapat.”
3Ku hua ake roo Jisas, “Ea raa, koutou ni teeai ki varo heaa David nii mee i tevaa aia ma naa tama aana ni hii kkai? 4Aia ni uru ki loto te hare te Tama Hamataku no too roo naa haraoa e ttapu no kai. Ku kavake roo nanei haraoa i te raena aana ka kkai. Koia naa Loo e hua poro naa tino pris hoko laatou e nani te kkai naa haraoa naa. 5Koutou ni teeai ki varo naa hua naa Loo Moses e hua poro i naa Sapat katoo naa pris i loto naa Hare tapu e oti ku teeai roo ki tautari naa loo te Sapat kaa mee naa hekau, koia laatou teeai kii mee ni takahara? 6Anau e hua atu ki koutou, e mee te mee i kinei e hamataku i aruna te Hare tapu. 7#Mat 9.13.Naa hua te Tama Hamataku e hua poroo,
‘Anau e ruu ki hhae te manava laoi,
teeai ko naa ofa e taa ka ttuni i te olta.’
“Kime koutou e illoa hakaraaoi i te tahito naa hua nei e hua ki aa, koutou tee nani te haia naa tama e teeai kii mee ni takahara. 8E mee i te Tama te Tama ko te Ariki te Sapat.”
Te tama e mmate tana rima
(Mak 3.1-6; Luk 6.6-11)
9Jisas ku tiake te kuana naa ku hano roo ki te hare lootu naa Jiu. 10Te tama e mmate tana rima e noho i kinaa. Naa ruai tama i kinaa ni mannatu ki hakaari ina Jisas. Ku hhiri ake roo ki te ia, “Ea raa, e teeai ki tapu te hakataha naa maki naa tama i te laa Sapat?”
11 #
Luk 14.5. Hua ake roo Jisas, “Kime he tama i koutou e mee tana sipsip e heke ki loto he rua i te laa Sapat, akoe raa ka teeai ki tauhi ka hhuti ki haho?! 12Te ora te tama e hamataku roo i aruna te sipsip! Naa Loo taatou e hattana ina taatou ki huia te tama i te Sapat.”
13Ku hua ake roo aia ki te tama e mee tana rima e mmate, “Hora too rima.”
Ku hhora roo tana rima no taurekareka muri pai ko telaa rima. 14Naa Faarisi ni ahe muri no heaki he haarena ki taia Jisas ki mate.
Te tama hekau te Tama Hamataku e hamaatino
15E mee i Jisas ni iloa heaa naa Faarisi ni mee kii mee i te ia ku hakataha roo i te kuana naa ka hano. Te apiana naa tama ni tautari ake ki te ia, ku hakataha ina roo aia naa maki katoo laatou. 16Ku hua ake roo aia ki laatou ki teeai ki hua ake ki naraa tama i te ia. 17Aia nii mee peenei ki hamaauri ai naa hua te Tama Hamataku ni hua i te profet Asaia:
18“Anei ko taku tama hatapatapa anau roo ni hamaatino,
te tama hokotahi aaku e ruu hamataku ai ka hiahia ai.
Anau raa ka hakauna taku Aitu Tapu ki te ia,
anaa aia raa ka huatia naa hua hakatonu aaku ki naa tama katoo te kerekere nei.
19Aia raa ka tee nani te hatunaaroto ka vaha,
ma e hua hamataku i loto naa haarena.
20Aia raa ka tee hati te laakau e hino kaa mee ki hati,
ma aia tee nani te tinai te lamu e teeai ki ura hakaraaoi.
Aia raa ka hekau ki nani roo naa tiputipu e ttonu e taurreka katoo.
21Naa tama katoo raa ka tuku naa mannatu laatou i te ia.”
Jisas ma Belsebul
(Mak 3.20-30; Luk 11.14-23)
22Ku too ake roo naa tama ki Jisas te tama e uruhia te anana koai e ppuni ana kanomata ka tee nani te hua no hakataha ina roo Jisas te anana aana loo nani muri te ia te hua ka kite. 23Te apiana katoo ni oho naa mouri ka hua, “Anei ailaa ko te tamarikiriki David?”
24 #
Mat 9.34; 10.25. Koia i tevaa naa Faarisi ni rrono ai, ku hua roo laatou poroo, “Te tama naa e hakataha ina naa anana i te haiao Belsebul te hamaatua naa anana.”
25Koia Jisas ni iloa i naa mannatu laatou, ku hua ake roo ki laatou, “Kime te henua e vvae lua ka huhu ki laatou, te henua naa raa ka tee nani te taakoto roroa; te haanau e hakataukeke i laatou, te nnoho laatou raa ka takahara. 26Kime te mataapaa Satan e vvae lua, te mataapaa naa raa ka taakoto roroa pehee? 27Kime anau e hhana naa anana i loto te haiao Belsebul, naa tama tautari koutou naa e hhana naa anana i loto te haiao ai? Naa tama roo autou raa ka hakkite atu poro naa hua autou naa e kairrehi. 28Koia kime anau e hhana naa anana i te haiao te Tama Hamataku, e hakkite atu poro te Mataapaa te Tama Hamataku ku oti te au ki koutou.
29“Tee hai tama e nani te hhaa te hare te tama haiao ka too naa hekau aana ki nani roo aia e haihai mua te tama haiao naa i he uka haiao; anaa ku nani roo te ia te uru no too naa hekau te tama naa.
30 #
Mak 9.40. “Te tama e ten'taa te tuu ma anau e haekotia anau. Te tama koai e ten'taa te huia anau ki hanaopo naa sipsip, aia e iihea naa sipsip ka oo haporroto. 31Anei e hua atu ai anau ki koutou: Te Tama Hamataku e nani te rano teroto i naa takahara ma ni mee hakarria pehee naa tama e mee, koia koai e hua ni hua hakarria i te Aitu Tapu, te Tama Hamataku raa ka tee nani te rano teroto i naa takahara aana. 32#Luk 12.10.Kime he tama e hua ni hua hakarria i te Tama te Tama, te Tama Hamataku e nani te rano teroto i tana takahara, koia koai e hua ni hua hakarria i te Aitu Tapu, te Tama Hamataku raa ka tee nani te rano teroto i naa takahara aana, anei ma i muri laa.
Te laakau ma naa hua aana
(Luk 6.43-45)
33 #
Mat 7.20; Luk 6.44. “Kime te laakau e taurekareka, akoe raa ka too naa hua laakau taurreka, ai kime te laakau e hakariaria, akoe raa ka too naa hua laakau hakarria. Te laakau e iloatia i naa hua aana e hua. 34#Mat 3.7; 23.33; Luk 3.7; Mat 15.18; Luk 6.45.Koutou naa kata! Koutou e nani pehee te hua naa mee taurreka i tevaa naa manava koutou e pii te takahara? E mee i te pukua e hua heaa e pii i te manava. 35Te tama taurekareka e mee naa mannatu taurreka e takkoto i tana manava; te tama hakariaria e mee naa mannatu hakarria e takkoto i tana manava. 36Koia anau e hua atu ki koutou: I te Laa te Hakatonu te Tama Hamataku, naa tama katoo raa ka kooti ina i naa hua hakarria laatou e hua.
37“Kime koutou ni hua naa hua taurreka, koutou raa ka hakahao ina, koia kime koutou ni hua naa hua hakarria, koutou raa ka kooti ina.”
Te mirakol Jona
(Mak 8.11-12; Luk 11.29-32)
38 #
Mat 16.1; Mak 8.11; Luk 11.16. Naa tisa naa Loo ma naa Faarisi ku hua ake ki Jisas, “Tisa, maatou e rruu ki kite i te koe e ppena he mirakol.”
39 #
Mat 16.4; Mak 8.12. Ku hua ake roo Jisas, “Koutou naa tama i tevaa nei ku hakarria roo! Koutou e hua ki kkite he mirakol? Teeai! Te mirakol hokotahi koi koutou raa ka kkite ko te mirakol i te profet Jona. 40E mee pai ko Jona ni taakoto naa laa e toru ma naa poo e toru i te manava te huai te ika, peenaa hoki te Tama te Tama raa ka taakoto naa laa e toru ma naa poo e toru i loto te kerekere. 41Naa tama i Ninive raa ka ttuu i te Laa te Hakatonu no kooti ina koutou naa tama anei, e mee i laatou ni huri tua i naa tiputipu hakarria laatou i tevaa laatou ni rrono i Jona e hua ake naa hua te Tama Hamataku; anaa anau e hua atu ki koutou poro e mee te tama i kinei e hamataku i aruna Jona! 42I te Laa te Hakatonu te Kwin i Shiba raa ka mahike no kooti ina koutou naa tama anei, e mee i te ia ni au roo i tana henua ki loo hakarono i naa hua taurreka te Kini Solomon; koia anau e hua atu ki koutou poro e mee te tama i kinei e hamataku i aruna Solomon!
Te anana hakariaria e ahe muri
(Luk 11.24-26)
43“Tevaa te anana hakariaria e hhae ki aho te tama, te anana naa raa ka hano ki naa kuana pakupaku no heaki he kuana ki hakamaahia ai, koia e teeai ki kite he kuana, 44ku hua roo, ‘Anau ka ahe muri ki taku hare ni tiake.’ Aia raa ka ahe muri ki te hare no kite roo i te hare ku oti te ttahi ka aatea ma naa hekau e tukutuku hakaraaoi. 45Ku hano roo loo toomai naraa anana e hitu takahara roo i te ia, ku ooatu roo laatou ki loto te tama naa loo nnoho ai. Te ora te tama naa ku hano loo takahara katoo ma te ora aana i mua. Naa mee nei raa ka hhae ki naa tama hakarria e nnoho ora i tevaa nei.”
Te tinana ma naa kave Jisas
(Mak 3.31-35; Luk 8.19-21)
46Tevaa Jisas koi hua ai ki te apiana naa tama, tana tinana ma ana kave ku ttuu ake i haho ka ttari ki hua ma ia. 47Te tama ku hua ake ki Jisas, “Too tinana ma oo kave e ttuu mai i haho, laatou e rruu ki hua ma koe.”
48Ku hua ake roo Jisas ki te ia, “Koai ko taku tinana ma koai ko aku kave?” 49Ku hhii roo tana mataarima ki ana disaipol ka hua, “Anei ko taku tinana ma aku kave. 50Koai e tautari te ruu taku Tamana i te vaelani, aia ko taku kave tanata ma taku kave hahine ma taku tinana.”
Currently Selected:
Matiu 12: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
