Matiu 11

Jisas ma Jon te Paptis

(Luk 7.18-35)

1Jisas ni hakaoti te hakailoa naa disaipol aana ku tiake roo te kuana naa ka hano ki naraa taon i Galili no hua haare ka hakailoa naa tama i naa hua te Tama Hamataku.

2Tevaa Jon ni rono ai i loto te karapuhi heaa Krais e mee, ku hakauna roo naa disaipol aana 3ki oo no hiri ake i te ia poroo, “Akoe ko te tama Jon ni hua raa ka au, ma maatou ki ttari he laa tama?”

4Ku hua ake roo Jisas, “Ahe muri loo hua ake ki Jon heaa kourua ni kkite ka rrono: 5Naa kanomata ppuni ku kkite, naa vae ppiri ku haare, naa huaitino ppara ku taurreka, naa kautarina ppuni ku rrono, naa tama mmate ku mahhike muri, ma naa hua te Rono Taurekareka ku oti te huatia ki naa tama tee hai mani. 6Naa tama teeai ki nnapa te tautari i te nau raa ka hiahhia.”

7I muri te toka rua naa ku ahe, Jisas ku kaamata ka hua ake ki te purima tama i Jon: “Tevaa koutou ni oo ki te kuana tino kerekere ka tee hai vai, heaa koutou ni rruu ki kkite? He mouku e ueuetia te matani? 8Kime teeai, heaa koutou ni oo loo mmata? Te tama e uhiuhi i naa kahukahu taurreka? Teeai, naa tama koai e uhiuhi i naa kahukahu e taurreka ka pii te hekau, laatou e nnoho i naa hare hamattaku pai naa hare naa kini. 9Koia heaa koutou ni oo no kkite? He profet? Iinoo. Anau e hua atu ki koutou, tama nei e hamataku i aruna naraa profet. 10Anei ko te tama ni taataa ina ai i loto te Peepaa e tapu poroo:

‘Anau raa ka hakauna te tama e hekau i te nau

ki hanatu i mua ki loo hakatonu tau haarena.’

11“Anau e hua atu ki koutou poro i naa tama katoo ni rruku i te kerekere nei, tee hai tama e hamataku i aruna Jon, koia te tama e taakoto i laro naa tama katoo i te Mataapaa te Tama Hamataku, laatou e hamataku i aruna Jon. 12#Luk 16.16.Kaamata roo i tevaa Jon te Paptis ni hua haare naa hua nei ka au loo nani anei, naa tama hakarria ni hekau haka haiao ki herruhi ki loto te Mataapaa te Vaelani. 13E mee i naa Profet ma naa Loo katoo Moses e hua i te Mataapaa no nani roo i tevaa Jon. 14#Mat 17.10-13; Mak 9.11-13.Ai kime koutou e rruu ki too naa hua laatou, Jon ko Elijah koai e mee ki au. 15Koai e hai kautarina, aia ki hakarono!

16“Anau ka hua pehee i naa tama e nnoho ora i tevaa nei? Laatou ni tama pehee? Laatou e mee pai ni tamarriki e nnoho ka takaro i te marae ka vaha roo ki laatou poroo,

17‘Maatou ni iriiri naa parunu,

koia koutou teeai ki anu;

maatou e hai pehe naa pehe hakaaroha,

koia koutou ni teeai ki ttani!’

18“Tevaa Jon te Paptis ni au, aia ni hakatapu tee kai ka teeai ki inu ni wain, ku hua roo koutou poroo, ‘Aia e uruhia naa anana.’ 19Tevaa te Tama te Tama ni au raa aia e kai ka inu, ku hua roo koutou poroo, ‘Anei he tama e ruu koi ki kai ka inu ki vvare, te hoa naa tama tootoo takis ma naa tama e tautari i naa tiputipu hakarria.’ Koia te iloa te Tama Hamataku e hakkite mai pai he iloa hamaauri i naa tama e hhae naa mee taurreka.”

Naa tama teeai ki huri tua i naa tiputipu hakarria laatou

(Luk 10.13-15)

20Naa tama i loto naa taon i naa kuana Jisas ni ppena naa mirakol aana ni teeai ki huri tua i naa tiputipu hakarria laatou, ku hat'roto roo Jisas ka heatua laatou poroo, 21“Aroha i koutou naa tama i Korasin ma Betsaida! Kime naa mirakol ni ppena anau i naa taon koutou ni hakahae hoki i naa taon Taire ma Saidon, peenei laa naa tama i naa kuana naa kunaa hhuri laatou manava loo uhiuhi i naa kahukahu parima ka parai laatou huaitino i naa marara te ahi. 22Koia anau e hua atu, i te Laa te Hakatonu, naa takahara koutou naa raa ka hamataku i aruna naa takahara naa tama i Taire ma Saidon. 23Koutou naa tama Kapenaum, koutou ni rruu poro koutou raa ka haua ki naa kaniva i aruna? Teeai, koutou raa ka riakina iho ki laro ki loto te kuana naa tama mmate e takkoto ai. Kime naa mirakol ni ppena anau i te taon koutou nei ni hhae hoki i Sodom, te taon naa koi taakoto anei! 24#Mat 10.15; Luk 10.12.Koia anau e hua atu ki koutou, i te Laa te Hakatonu te Tama Hamataku, naa taenaha e mee i koutou raa ka hamataku i aruna naa taenaha nii mee i Sodom!”

Oomai loo hakamaahia i te nau

(Luk 10.21,22)

25I te vaa naa Jisas ku hakaruma, “Tamana, te Ariki i te vaelani ma te kerekere! Anau e hiahia i te koe, e mee i te koe ni hakkite ake ki naa tama e mee pai ni tamarriki koi heaa koe ni huu i naa tama e illoa i naa mee katoo. 26Iinoo Tamana, akoe ni ruu ki hhae iho peenei.

27 # Jon 3.35; Jon 1.18; 10.15. “Taku Tamana ku oti te kamai naa mee katoo. Tee hai tama e illoa hamaauri poro te Tama te Tama Hamataku koai, tino te Tamana hokoia e iloa. Tee hai tama e iloa poro te Tamana koai, tino te Tama te Tama Hamataku, ma naa tama te Tama te Tama Hamataku e ruu ki huri ake naa tiputipu tana Tamana.

28“Koutou katoo koai ku naenae te hhau naa taenaha, oomai ki te nau loo hakamaahia. 29Too naa hekau aaku ku hhau roo no uta i autou ruamona, no hakarrono i aku hua ki nani ai koutou te illoa i te nau, e mee i te nau e manava aroha ka tuku roo anau ki laro, ki nani koutou te too te hakamaahia maauri. 30E mee i naa hekau aaku e kavatu kii mee koutou e mamahua ka teeai ki taenaha.”

Currently Selected:

Matiu 11: NUR

Highlight

Compare

Copy