Matius 16
16
Kyat Farisi re kyat Saduki né réroré bo Yesusé nfaftulo ni kawasa
(Mrk. 8:11-13; Luk. 12:54-56)
1Reni kyat Yahudi ta rdéréré dodoto Farisi re ta rdéréré dodoto Saduki né si dórén séfis néli, bo réyówé Yesusé nó sélsólé. Se rwómo I néli bóngo rané I npe mujizat faesó bo runé ta I yama Jou Lahatala ni.
2Mayta Yesusé nécegé si faje, “Adeade fémnaw ngénngané njé bo ncep nópé ga langété njé nmakóté, nase féceg faje, ‘Malówé néya nte bo méklóngéné.’ 3Iga tamémóné ga langété njé nmakót re nfaméklikté i, nase féceg faje, ‘Ngénngan pésénte nase bo félé.’ Mewé fémnaw be langété njé ni dai né le, re funé óro sói ta bo ndadi i po ngénngan ta néi. Mayta sói néli ta Jou Lahatala npe po nimi fapéluné né ga funé pa né. 4Mewé kyaté-kyat ta isémé nte tadélé flé, fécegé cogo fdéréré Jou, momongo fdéréré be ménimi ta sólé né! Mewé féroré kpe mujizat faisó bo cogo funé ta Ya nte Ya I yama Jou Lahatala ni. Mayta, Ya nase kfaftulo mew mujizat gélesó pa, maduga bo kéfétno mew be mujizat ta tatubé lima Jou Lahatala re npe po nabi Yunus ni né.” Yesusé néceg faje rewóré, tabóngo I re ni motemote nesté rfatoléné keé si se rfan si po géwgów nésé nóté.#16:4 Yesusé néfétén ta né nóté po buk Matius 12:39.
Yesusé nécego ni motemote né bo ma sogado rdéréré keé kyat Farisi re Saduki nesté riri dodoto né na
(Mrk. 8:14-21)
5Yesusé I re ni motemote nesté rpe néli po talaga Galilea ni féspalé. Po waktu ta néi, rfatélolmo si ta ruté róri roti pa. 6Bóngo Yesusé nécegé si faje, “Fpe mew fafié, sababta kyat Yahudi ta rdéréré dodoto Farisi re Saduki róri ragi né lé.”
7Pocé Yesusé ni motemote nesté rlongé ta néceg fajé né, tabóngo rfalécego, “Alli, rir Guru njé néceg fajé né, sababta ité tut roti pa né ga.”
8Mayta Yesusé re nuné keé sói ta rfalécego né, se nécegé si faje, “Fpe sói se ffatésónglé be roti né? Peé, mewé nte fdélé Ya né maduga cuci le né! 9Mewé mare fsae ta Ya re kpe né! Sababta nase fatélolmo mewé lesu, po waktu ta kfalkelsé roti pélimé se kfamnómé kyat calén lim re glé né! Po waktu ta néi, ni gléo ta ffajólo né téglas péfisé? 10Fajé nóté re maduga roti péfité le, bisa kfamnómé kyat calén fót re glé, se ni gléo ta ffajólo né téglas péfisé? Ffatélolmo mew pa? 11Iga re fémnaw Ya nik kawasa ta néi, pe sói se nte fsae pa? Ta Ya kéceg péséwé né ni ngale roti pa. Mayta Ya bo kécego mewé nóté, mewé mare fpe mew fafié po kyat Farisi re Saduki róri ragi né!” 12Pocé ga tagare ni motemote nesté rcae. Ta Yesusé nané si rpe né, necé roti ta rpeo ragi né pa, mayta kyat Farisi re Saduki riri dodoto ta lé né ma sogado rdéréré na.
Petrusé nécegé Yesusé njé Kolano ta Jou Lahatala néjaji tatubé lima ta bo nfasalamaté kyaté njé
(Mrk. 8:27-30; Luk. 9:18-20)
13Yesusé I re ni motemote nesté rwóm po bótén ta nérakén kota Kaisarea Filipi né. Pocé, bóngo nutné ni motemote nesté faje, “Ta mewé flongé kyaté né récegé né Ya nte pai?”
14Bóngo si rcónglo I, “Reni ta récegé cogo Awé Yohanes ta nénbaptisé kyaté njé. Iglé né récegé Awé nabi Elia. Iglé nóté ta récegé Awé nabi Yeremia, re cogo nabi iglé nóté ta re rmóté se rpangéné nmulé.”
15Tabóngo Yesusé nutné si nmulé, “Se ta mewé funé né, Ya nte pai?”
16Bóngo Simon Petrusé ncónglo, “Guru, Awé Mesias óro, Kolano ta Jou Lahatala néjaji nwómé bo nfasalamaté kyaté njé. Awé Jou Lahatala ta nhidupé njé ni ntu Awé!”
17Pocé bóngo Yesusé nécegé i faje, “Simoné, Yunusé ni ntu ta awé! Goné awé, sababta ta mécegé né isó ta nfébingo aw pa, mayta Ya nik Moke ta I po soroga njé ta nfébingo awé. 18Awé ngósnomé né Petrusé, ta ni ngale né lóy ta matué né. Ya bo kfajólo kyat félé ta rdéréré Ya ta dolo awé nte, bo fdadi nik jemaaté mewé. Kfatailo jemaaté njé dolo um ta tfawoslé po lóy ta matué ta tpeo fandasi né. Bo masike setané riri kawasa né rfarwaé nik jemaaté né ma, nase réfen pa se si pocé sogado fajé néli le. 19Ya bo kpo aw kawasa bo mfaménawé nik jemaaté né, Jou ni kyat ta I nkawasa si né. Kfatailo dolo kpo aw kunci, se sói ta awé mpo fié po dunia nte, Jou Lahatala ma nase npo fié po soroga nóté. Sói ta mpo fié pa po dunia njé ni, Jou Lahatala ma nase npo fié pa po soroga né.”
20Yesusé nécegé rewóré, tabóngo nané ni motemote nesté bo ma réfétén néli re lima na ta I Mesias óro, Kolano ta Jou Lahatala néjaji nwómé bo nfasalamaté kyaté njé.
Po faiwóbno né Yesusé nfébingo ni motemote nesté ta kyaté né bo rfamót I mayta nase npangéné nmulé
(Mrk. 8:31–9:1; Luk. 9:22-27)
21Pocé ga tagare Yesusé nfébingo keé ni motemote nesté ta I mare nfan po kota Yerusalemé. Néli, nase nduk kangelang félé lima Agama Yahudi né riri kyat tut-kyat tut, re imam ta rpélóy re guru-guru agama ta runé fié Musa ni kitab abén limé nesté, si ta bo rpuné keé Ya sogado rfamót Ya. Mayta télapés ngané telé, nase kpangéné nmulé.
22Petrusé nlongé ta Yesusé néceg fajé né, tabóngo natél Yesus lima lapo lo né, se nécegé I faje, “Guru, ma méceg fajé na. Kéroré bo Jou Lahatala nélówé keé Aw po férimé ta néi, bo ma sogado ndadi i po Aw ni na.”
23Mayta Yesusé nélolét I néminé se nécegé i faje, “Ceh, mfaténténgén aw nópé! Nim méiténé né tadolo setané né riri kolano njé ni méiténé. Ya bo kpe ta Jou Lahatala mgo wlo né, mayta awé mfakangelangé keé Ya. Sababta awé maduga manuta be sói ta kyat dunia wlori mgo né le, mayta ta Jou Lahatala wlo mgo né ga mfaketé keé.”
24Rewóré ta néi, Yesusé nécegé ni motemote nesté faje, “Pai ta bo ndéréré Ya né, mare ma ndéréré ni wlo njé na. Masike nduk kangelang sói néli sogado bo nmóté, ndéréré be Ya le. Sababta kangelang sói ta i nduké né, necé tadolo npó ni salibé njé, se ndéréré Ya né. 25Sababta kyat pai ta nfatubé be i ni diri né le, nejé nase nmóté né nduk ta fié pa sogado fajé néli le. Mayta kyat pai ta npo ni hidupé bo ndéréré Ya, i ta njéi nmóté né nase nduk ta fié sogado fajé néli le. 26Kyat pai le, masike haréta ta po dunia wlólo nte i nó ndimé, mayta reni ngale gélesó pa, sababta nmóté né nase nduk ta fié pa sogado fajé néli le. Bóngo nase reni pana ta bo rpo néli po Jou ni bo rduk ta fié sogado fajé néli le. 27Ya kéceg fajé né, sababta Kyaté Ntu ta Ya I yama soroga nase bo kwómé nmulé. Ktebé né, Ya re nik nénan ta si yama soroga lo né, kfauto Jou Lahatala ni ménano re kawasa né. Po ngénngan ta néi, kyat ta re rpe be ta fié po Jou Lahatala ni né, nase nfamulé si riri féyfié né, re kyat ta rpe be ta lé né ga, nase nfasólé keé si. 28Se flongé fafié ta Ya bo kécego mewé nte: Kyat iglé ta si pote po mew ni nte, nase rdótélé lesu bo rémnawé Kyaté Ntu ta Ya I yama soroga lo né bo kawasa dolo Kolano po niké kyaté-kyaté né.”
Currently Selected:
Matius 16: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
