Rom 3
3
Paulus azu ta kumeg tiduk
1Meginge Judatamol i wou aitdaŋan muluŋ me aitnenge? 2Tea, inan wou kuzum, malanmalan Anut i inan azu Judagaz ditiziniwoi pinidinlak.#Rom 9:4; Deut 4:7, 8 3Tata ladin segatek tealak me dodin? Ladin so segatilak me Anut inan segatek depasi?#Rom 9:6; 11:29; Tim II 2:13 4Megin tea mok! Anut i malikged, tamol i daŋan sekauk, gazelak egin, O oina azulon taozoi, o bitiniomap o seŋanop madowoi.#Kan 116:11 5Ge id kagin me taoz tealak melon Anut inan taoz beŋten itasemap id dodin taboloi? Anut inan buzun fodlak inauime mewoi i taoz tea? Ŋa tamol egin ŋabol.#Kan 51:6 6Megin tea mok! Anut taoz teape i dodin panupanu bitiniawoi? 7Ge ŋainag sekauklon Anut buben maliklak me inan biŋan imais ilanenoi itaselak, dodinlakoi ŋa aupasekwain egin jawadan ŋeŋalewoi? 8Aitoi so taboloi, Abaŋ salan tenaulap niŋon gauai itasawoi? Get am‐oi megin uf denau, am megin abolame dibol.#Rom 6:1, 2
Tamolpain daŋan tinidinnen azu gazek ibol
9Ge dodin id Judawain biadseg temadotame? Megin tea mok! Ŋa get ŋabollak, Judagaz gob mai i aupasek paenlon demadodime,#Rom 1:18–21, 24 10gazelak egin, Tata toaz tea, taimon mok ta mai tea.#Kan 14:1–3; 53:2–4 11Tata so iloŋime, tata Anutoi so dalelime. 12I daŋan dal depezagailak, daŋan niŋodin tea, tata so itoz gauai, malik taimon ta tea. 13Klugudin me fedafod gageg ienime egin, beladin sewozaik azu diboldime. Fiziŋodin paenlon mot inan tibilan salan ienime.#Kan 5:10; 140:4 14Auadin meselanek azu gigien mai ifuam.#Kan 10:7 15Niedin pasak daz fuzekoi palunen iloŋ,#Jes 59:7, 8; Met 1:16 16pedaleŋ alan nauk mai nadin dallon itasaime, 17mazoz inan dal me so diloŋ.#Luk 1:79 18Anutoi dizutnen me leŋadinlon so ien.#Kan 36:2 19Id bo taloŋ, azu kibiaiŋ ibolime me tamolai kibiaiŋ paenlon demadodime me ipidinime; meginpe auadin daŋan butunip tamolai panupanulon Anut naonnen jadaŋan demadodime.#Rom 2:12; Gal 3:22 20Mewoilakoi kibiaiŋ inan nauknauklon tamolai ta i naonnen taoz tea, kibiaiŋlon id aupasek taloŋtamelak.#Kan 143:2; Gal 2:16; Rom 7:7
Panupanuwain Jesus ladinlon malikmap mon taoz pinidinime
21Ge me Anut inan taoz kibiaiŋ tealon boboloanilak, me kibiaiŋ profet mai disigianidime.#Apos 10:43; Rom 1:17 22Ŋan Anut inan taoz me Jesus Kristus ilonlon maliknenlon ienime daŋan me ladinlon malikdime me deŋalewoi. Anut kagin azuazu so inauimelak. 23I daŋan audipaslak, Anut inan kagin kubeloi so diduselak,#Rom 3:9, 19; 5:2 24Anut inan kanimlon mon se lo taoz inaulak, patunpaseknen me Jesus Kristuslon ienime melon mon.#Rom 5:1; Ef 2:8 25Me Anut beŋten inaug inan dazlon siai paseknen ilonlon maliknenlon deŋalewoi. Me Anut inan taoz boboloaniwoi, i siben inan lo kaginlon aupasek getnen daig so isazlak.#Lew 16:12–15; Heb 4:16 26Tea, saen elon Anut siben taozlak, Jesus Kristus ilonlon malikime me mai taozoi me beŋten iduwoi inaulak.
Anut taimon daŋan putudin pasiime
27Mewoi fuzoznen ŋan? Tea, mug geg panilak. Kibiaiŋ aitlon? Nauknauk inanlon? Tea, ilonlon maliknen kibiaiŋlon.#Kor I 1:29, 31 28Id tabol tamol tata kibiaiŋ inan nauknauk tealon ilonlon maliknenlon taoz inauime.#Gal 2:16 29Anut i Juda nadin Anut mon tat? I gobgaz nadin Anut tea tat? Au, i gob nadin Anut mai.#Rom 10:12 30Anut i taimonlakoi i Judagaz muluŋ naseklon ladinlon maliknenlon taoz inauime, me gobgaz muluŋ nasek tealon ladinlon maliknenlon taoz inauime.#Rom 4:11, 12 31Meginge id ilodlon maliknenlon kibiaiŋ tibititame? Megin tea mok! Id kibiaiŋ testemanitame.#Rom 3:21; 4:3; 8:4; Mat 5:17
Currently Selected:
Rom 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
