Rom 4
4
Anut Abraham ilonlon maliknenlon taoz panilak, Dawid mai megin ibol
1Id mewoi dodin taboloi, Abraham idinad tamad, tininlon abaŋte ŋalelak? 2Me Abraham i nauknauklon taoz inaupe i melon fuzozpe, ge Anut naonnen tea. 3Azu gazek dodin ibollak? Abraham Anut ilonlon malikge i taoz madie ibol.#Gen 15:6; Gal 3:6; Rom 11:6; Mat 20:7, 14 4Ge me i uzat inauime i kanimlon naon so ŋaleime, tea, uzatlon. 5Ge i me uzat so inauime, tea, Anut me tealakgaz taoz inauime me inau paniime, i inan ilon maliknenlon taoz iŋaleime. 6Dawid mai tamol me Anut nauknauk tealon taoz paniime me baz azu ipaiime:#Kan 32:1, 2 7Patun isap mado me inan zegaik Anut ilon padallak, me inan aupasek i toani idulak. 8Patun isap mado me inan aupasekoi Anut i so ipaiime.
Muluŋlon tea, kibiaiŋlon mai tea, ilonlon maliknenlon mon Abraham taoz inaulak
9Baz inan azu me muluŋ denasilak i mon pinidin, tea, muluŋ tealak me mai tat? Id tabol Abraham ilonlon maliknenlon taoz panilak.#Gen 15:6 10Mewoi dodin taoz ipanilak? Muluŋ so nasimeglon tat, tea, alouge? Tea, alounen tea, muluŋ so nasimeg imugseg ŋale. 11I muluŋ taoz inan bagoz egin ŋale, me i muluŋ so nasimeg ilonlon maliknenlon iŋalelak me. Fun i me muluŋ teag ladinlon malikmeg taoz deŋalelak i me daŋan nadin temadin inaup demadowoi.#Gen 17:10, 11 12Muluŋ denasilak inadin temadin mai, me i se mon muluŋ so denasilak, tea, Abraham inan ilonlon maliknen muluŋ tealon itozlak me duzi depanilak ŋan i.#Mat 3:9; Pet I 2:21
13I panupanu e fuzan deŋalewoi me Abraham inan daz mai kibiaiŋlon blani so pinidinlak, tea, ilonlon maliknen inan taozlon mon.#Gen 18:18; 22:17, 18 14Nasi, kibiaiŋ uzekgaz i fuzan deŋalewoitap ilonlon maliknen me niŋon tea, blani panek me mai tefalok. 15Ge kibiaiŋ me buzun kibineime; kibiaiŋ bo so ienime melak aupasek mai tea.#Rom 1:18; 3:20; 5:13; 7:8, 10 16Mewoi ilonlon maliknen me fun, meginpe blani panek kanimlon ienmap inan daz daŋan malik deŋalewoi, kibiaiŋ duzi depanidime i mon tea, Abraham inan ilonlon maliknenlon ditozdime me mai, i id daŋan inad tamad. 17Megin mai gazelak, Ŋa panu kuzum nadin temadin ŋunuolak, Anut i ilonlon maliklak me naonnen, me i dimatlak fuŋunaime, abaŋ so dienlak me ibolge ditasadime.#Gen 17:5; Jes 48:13
Abraham ilonlon malikge sedageg ile
18I suzuazouge sedageg suzuazoumeg mon made, i panupanu nadin temadin inauwoilakoi, get ipailak egin, Oina daz meginoi.#Gen 15:5 19I inan tinin imat egin, mug umaz 100 itozlak, Sara inigge mai tinin imat egin me ilon isouge i ilonlon maliknenlon so bodok.#Gen 17:17 20Anut inan blani panekoi so ilonse ilonle, tea, Anut biŋan bisemeg ilonlon maliknenlon subuloani.#Heb 11:7, 11 21I ilon du ibol, Anut i blani panilak me inaunen mai iloŋ. 22Mewoi inan ilonlon maliknenlon taoz ipanilak.#Rom 4:3 23Ge azu, Taoz ipanilak, me sibenoi mon so gazelak.#Rom 15:4 24Tea, idoi mai. Id mai me Jesus Kristus mateŋlonge fuŋunig imaislak me ilodlon malikmap i taoz panadoi.#Pet I 1:21 25I idinad aupasekoi funig imatlak, inad taoz ŋalekoi faun biseg imaislak me.#Jes 53:4, 5; Kor I 15:17
Currently Selected:
Rom 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
