Rom 2
2
Panupanuwain aupasekdaŋan
1Mewoilakoi, tamol, o it tat, o tata betenaemap o Ŋa teab e ubolnen tea. O oina muduba betenaemap o melon sibe mai tini usaeume, azu o betenaeume me sibe auupasume.#Mat 7:2; Joh 8:7 2Ge am malik aloŋ, Anut inan talek me tiduk mok tamol i abaŋ megin denaudime me fodinlak iduwoi. 3Tamol, o tamolai i megin denaudime me bitiniaume, ge o mai megin unauume, o ubol tat Anut inan betenaek ituzugusowoi? 4Tea, o Anut inan lo zen, inan nasinasinen kanim mai zezeŋaniume, o so uloŋ Anut inan lo me tulufuno udaŋsanen peteŋanoime?#Pet II 3:15 5Tea, oina bube gegaun tulufuninen so iloŋlak melon o wagaznal, me Anut inan betenaek taoz boboloaninenoi iduwoi, inan buzun begeunen unauume.#Bo 6:17 6I tamol dadodado inan nauknauk naon paniwoilakoi.#Kan 62:12; Met 24:12 7I me naseknaseklon nauknauk gauailon kubel, biŋan gauai, dedeŋanip bas madonenoi delaŋaitap i sansanpe bas madonen pinidinoi.#Mat 16:27; Kor II 5:10; Joh 5:29 8Ge me i pusaiklon demadodime, azu malik dagom so depanidime, tea, kagin taoz tealak me dagom depanidime i buben wonanan, buzun kekazun mai deŋalewoi.#Tes II 1:8; Joh 3:36 9Tamol daŋan i megin inauime i fonlak alan nauk kokoŋ panek mai iduwoi, malanmalan Judawain, ge Grik i mai.#Rom 1:16; 3:9 10Ge tamol daŋan me abaŋ gauai inauime i kubel, biŋan mazoz mai ŋalewoi, malanmalan Judawain, ge Grik i mai. 11Anut tamolaioi gauai e salan e so ibolime.#Apos 10:34; Pet I 1:17
Anut inan talek me taoz mok
12Me i kibiaiŋ tealon audipaslak me daŋan kibiaiŋ tealon depadaloi; aenta me kibiaiŋdaŋange audipaslak i kibiaiŋlon bitiniawoi. 13Kibiaiŋ tiliŋadinlon mon diloŋlak me Anut naonnen taoz tea, tea, me i kibiaiŋ duzi depanilak i taoz e iboloi.#Mat 7:21; Joh I 3:7 14Gob i kibiaiŋ teabmeg tinidin mon kibiaiŋ duzi depanimap i, me kibiaiŋ tealak, sebadin ladin kibiaiŋdaŋan.#Apos 10:35 15I kibiaiŋ ibolime me bubudinlon gazelak me beŋten denaudime, nadin ladin betenaek mai sigiani, kankan mai nug paipai, Au, teabnen azu tat ibolime.#Rom 1:32 16Anut Jesus Kristuslon tamol azu bubudinlon toanig ienime me betenaemap, ŋainag totol gamun ibolime egin, nal melon megin inauwoi.#Apos 10:42; Tim II 2:8
Judawain aenta kagin denau debedani
17Ge o Judatamol e depaodime, kibiaiŋ unau paniume, o Anut maig atozame aua fezafuzime, 18o inan auan uloŋ, kagin gauaioi gauai e ubol, kibiaiŋ peteŋanolakoi, 19o bube malik o tamol meladin itaulak nadin duzek, mafuzlon demadodime nadin sul,#Mat 15:14; Luk 18:9 20o ladin tealak nadin bebanek, ai kamo nadin peteŋanek, kibiaiŋlon uloŋnen, malik niŋondaŋan mailakoi,#Tim II 3:5 21mewoi o me aenta kagin peteŋanaume, o sibe so peteŋanoume? Me o ubol tamol i ponau so itozoi, o ponau wabiume?#Kan 50:16–21; Mat 23:3, 4 22Me o ubol tamol i jait so jabiwoi, o jait wabiume? Me o gob nadin mazozoi sizi isaime, o gob nadin tibudab inan dazuk wozaiume?#Joh 8:7; Deut 7:25, 26 23Me o kibiaiŋoi aua fezafuzime, o kibiaiŋ auupasmeg Anut inan biŋan benenaiume?#Mat 5:16 24Nasi, i megin gazelak, Anut nean aŋoi gob ilonnen dizan dewaidime.#Jes 52:5; Hesek 36:20
It Israelwain niŋon?
25Israel inan muluŋ nasek me gauai, o Anut inan kibiaiŋ uzi panimap, ge o kibiaiŋ pezebedanitap oina muluŋ me se, niŋon tea.#Jer 4:4; 9:24, 25 26Mewoi ta i muluŋ so nasilak ge kibiaiŋ inan niŋon uzi paniime, i muluŋ tealak mug muluŋdaŋan egin tea tat?#Gal 5:6; Kor I 7:19 27Meginge muluŋ tealak ge kibiaiŋ duzi depanidime i o dibitiniowoi, me o azudaŋange muluŋdaŋan mailakge kibiaiŋ auupasume. 28Me i tinin mon Judatamol inaug itozime i Judawain tea, megin mon muluŋ mai tininlon mon inaumap me muluŋ tea.#Joh 8:15, 39 29Tea, me i ilondaŋan Judawain inauime i niŋon, megin muluŋ niŋon bubenlon ienime, ilon malikdaŋan, azulon mon tea. Tamol me inan biŋan so dibisadime, tea, Anut ibisaime.#Gen 49:8; Deut 30:6; Kol 2:11
Currently Selected:
Rom 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
