Israel Kan 78
78
Asaf inan Maskil ta.
1O ŋainag tamolpain, tiliŋamilon inag peteŋanek azu adaŋe;
tiliŋami ŋainag auag inan azuoi dab pani!
2Ŋa azu faŋanlon auag ŋesepaniwoi;
ŋa azu toanek getnen ŋabol iduwoi,
3abaŋ tiliŋad isaeg taloŋlak,
inad mamgaz depaiadlak me.
4Id nunudin zidinnen so timiŋianiwoi,
tea, daz uzek faungaz sai tipinidinoi,
Ujanzen inan nauknauk kubel tiwon mai,
kubelmaŋau i inaulak mewoi taboloi.
5I Jakoblon sigianek ta inaulak,
Israellon kibiaiŋ ta inaulak
me i mamgaz pinidinlak,
i nunudingaz peteŋanawoi.
6Meginpe daz uzek ta me iloŋoi,
ai tinadin so duduzilak me.
I me dimaispa nadin nunudin dipidinoi,
7meginpe i Anutlon dusuzuazoup demadowoi,
Anut inan nauknauk ladin so padaloi,
tea, inan kibiaiŋ duzi depaniwoi.
8I nadin temadin egin so ditozoi,
i aen digeug liwojabeklon ditoz,
inadin wozou me bubudin so zatam,
nadin uz Anutoi malik tea.
9Efraimgaz fidaŋan
ju nallon dutuzubulekge dimul.
10I Anut inan temaneknen dab so depani,
i inan kibiaiŋlon ditoznen dimoi.
11I inaulak me ladin padal,
kubelmaŋau i peteŋanalak me.
12Temadin meladinlon i maŋau inaulak,
Egipta fatulon, Soan nadin umlon,
13I mas bufateg Israel didug dile,
i inaug mas mad egin ti ibol.
14Adlon i timtaenlon,
tidom daŋan ja naneklon idauzi.
15Fatu udaulon i pat tezepaleg
naz idusanen tan tiglonge pinidinge dimili.
16I inaug naz patlonge itase,
naz inaug aben aenaen isaeg lololo ibolge idu.
17I bo au ta mai dipasge ile,
Sutan Moklak me fatu udaulon liwon diabi.
18Bubudinlon Anut kibianig
anaŋ jaeŋ sufutanalak mewoi dibol gegaun.
19I Anut dedaŋeg dibol,
Anut fatu udaulon anaŋ dizinen iloŋ?
20I pat isaeg naz idu,
naz aenaen dezemani.
I sepalaŋ mudan mai
inan tamolpain pinidinnen iloŋ?
21Mewoi Ujanzen iloŋge i buzun kekazun ibol;
i Jakob daŋeg ja ituni,
Israeloi inan buzun isa.
22I Anut ladinlon so maliklakoi,
inan patunpaseknen tiwon so denau depani.
23I bo did latnen kibiai pani,
did inan dalauan ifueg
24mana dianinen ui egin inaug idu,
didnen anaŋ ipinidinlak.
25Tamol eŋel nadin sepalaŋ diani;
i anaŋ idusanen inaug pinidin.
26I ibolge kazag didlonge tan fonlak ipalu,
inan tiwonlon jauan mai iduzi.
27Kulukal egin mudan inaug idu,
ma mas inan abuz egin dizouge dise.
28I inaug inadin panu bisonlon dibal didu,
nadin tazas beŋadinlon.
29I dianig loadin didi gauai,
jaeŋ ifulak me i pinidinlak.
30Ge i loadin so didi gauaige,
anaŋ me auadinlon ienmeg,
31Anut inan buzun iwoi imaisge
tamol zugudin gauaidaŋan ifu,
Israel inan tamol gauaigauai inaug dimat.
32Me daŋan idumeg i audipasge ile;
kubelmaŋau denasilag i ladinlon so malik.
33Meginge i inaug nadin saen jaeŋ ŋalek egin iauge ile,
nadin umaz bezeteŋaneklon iau.
34I ifumeg i Ujanzen debezani;
i didaŋseg ladin malikdaŋan Anut debezani.
35I ladin isou Anut i nadin pat,
Anut Sutan Mok i nadin Patunpaseknen.
36Ge i auadinlon azu numuzan depai;
beladinlon i azu sekauk depai.
37Bubudin iwoi segatekdaŋan tea;
inan temaneknen me so duzi depani.
38Ge i iwoi teŋaen alange
nadin aupasek ilon padal,
i so pitiŋinalak.
Nal kuzum i inan buzun biti,
inan kekazun daŋan so sikilig itase.
39I ilon isou, i tinidin mon,
tim me igegge ileg faun so isoime menen.
40Nal pitep i fatu udaulon liwon diabilak,
fatu udaulon denaug buben alanlak!
41I dikibianig debateg ile,
Israel inan Gun buzunoi disikili.
42Inan tiwon ladinlon dab so depani,
nal i daŋekgaz nimadinlon idad iŋallak mai ladin padal;
43inan bagoz Egiptanen,
inan maŋaumaŋau Soan fatu atenlak inaumeg.
44I nadin naz bulig daz inau,
meginge i nadin naz me dimilinen tea.
45I gab malan ujan inaug idug jiniadin,
gazok mai inaug debedanalak.
46Nadin anaŋ umlon memanik ipani,
nadin uzat wadan me sis pinidin.
47I nadin greip ais patunlon,
nadin ja ta tim jizunlon pitiŋini.
48Nadin bulmakau ais patunlon,
belelek pifoldaŋan waillon ifu.
49I fodinlak inan buzun ipasig idu,
kekazun, buben wonanan, modoanek mai,
pitiŋineknen eŋel malandaŋan mai didu.
50Buzun inan dal ikibinelak;
mateŋ iwoi mai so ibitilak,
tea, tinidin me siasi ipani.
51Egiptanen matugaz daŋan ifu,
zugudin inan tiwon matu Ham inan tazaslon.
52Meginge inan tamolpain belelek egin idauzig dile,
fatu udaulon belelek pifoldaŋan egin dal peteŋana.
53I tizina gauaige i kin so dizez;
mas bo nadin agez puzotoana.
54I inan tan gunlon idauzig dise,
did niman waŋ wozaig ŋalelak melak.
55I noadinnenge panupanugaz kuduag dile;
i tan iwae pinidinge
Israel wozouwozou tazaslon inaug demade.
56Ge i Anut Sutan Mok me dikibianig liwon diabi mai,
inan sigianek so duzi depani.
57I miz depanig temadin egin muzipasek kaginlon ditoz;
i fi salan bulelak egin.
58I tibud aben did gomunlak melon denaug Anut buzun isa;
nadin mazozlon i denaug i jenain isui.
59Anut iloŋge i buzun kekazundaŋan,
i Israel meselana mok.
60I Silonen inan ab ibini,
tazas i tamol leŋadinlon madelak ŋan me.
61Inan tiwon ipasge sebaneklon inau,
inan kubel daŋekgaz nimanlon idu.
62Inan tamolpain badiz ipani,
inan fuzan buzun kekazun ipinidin.
63Nadin tamol faun ja niniadin,
nadin bazasoi betezemaneknen kanam so diabi.
64Nadin waliŋtamol badizlon dimat,
nadin painbob so dita.
65Meginge Ujanzen wonoŋ eginlonge tiziau,
tamol zagundaŋan aiu milig ibobime egin.
66I inan daŋekgaz kuduag diau;
i inaug i sansanpe mamai deŋaleg ditoz.
67I Josef inan tazas meselani,
Efraim inan bagen so piliani;
68tea, i Juda inan bagen piliani,
did Sion i ilon panilak me.
69Inan ab gun did latnen egin isase,
tan me sansanpe gauai ienoi kibinelak egin.
70I inan begabeg Dawid pilianilak,
belelek nadin seplonge iŋale.
71Belelek paiat nunudin denaulak dab pinidinmeg
i Jakob inan tamolpain tiziniwoi iduzi,
Israel, inan fuzangaz.
72Buben tidukdaŋan i dab pinidin,
niman jumusanlon idauzilak.
Currently Selected:
Israel Kan 78: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
