Israel Kan 77
77
Kanamkamaŋ inan: Jedutun sinan. Asaf inan kanam ta.
1Ŋa beŋten Anut salo ŋawogŋame,
beŋten ŋawog, i auag iloŋoi mewoi.
2Inag alansaenlon ŋa Ujanzen ŋebezaniŋame;
tidom nimag ŋowoteg so miliauime;
nitug bini idup madonen imoi.
3Ŋa Anutoi ilog isouge ŋagos;
ŋa kankange inag uz bodo ibolime. Sela
4O unaug malag siliŋon so matut;
gauz alan noagge ŋa azu ŋabolnen tea.
5Ŋa saen getnenoi kankan,
ŋa umaz wagamnen ilog isou.
6Ŋa tidom bubeg mai ikibiaiame;
ŋa ilog kankan, inag uz ŋesekeleaniŋame:
7Ujanzen i sansanpe zezeŋanamawoi,
faun lo so iduwoi?
8Inan ilopanek segatekdaŋan bini moklak?
inan blani panek saen daŋanlon mug niŋon so inauwoi?
9Anut kanim ŋalekoi ilon padal?
Buzunlon teŋaealannen bitilak? Sela
10Me ŋa ŋabol, Me ŋainag alan
mewoi Sutan Mok inan niman waŋ bulig
kagin iben inauime.
11Ŋa Ujanzen inan nauknauk ilog isouwoi;
au, ŋa oina maŋau wagamnen ilog isouwoi.
12Ŋa oina uzat daŋanoi kankanoi,
oina nauknauk ujan ilog kibiaioi.
13O Anut, oina dal me gun,
tibud it Ujanzen inad Anut mai dikol?
14O Anut me kubelmaŋau inauime,
fatufatu leŋadinlon oina tiwo beŋten unaulak.
15O oina nimalon oina tamolpain upas uŋallak,
Jakob Josef mai nadin ai. Sela
16O Anut, naz denasog,
naz o denasomeg i dizut,
au, betabet terere ibol.
17Uitaen naz dewali;
did inaug wail idu;
baŋen daŋanlon oina tu jabalen egin ilaime.
18Oina wail inan liŋan me tim tilianeklon ien;
oina lelei tan fatu lelaman inauime;
tan telelaug nini mai.
19Oina dal mas bisonlon ile,
oina dal mas ujanujan bufate;
oina nie ban bo nasinen tea.
20Oina tamolpain o belelek pifoldaŋan egin udauzi,
Moses Aron mai nimadinlon.
Currently Selected:
Israel Kan 77: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
