Israel Kan 7
7
Dawid inan zigaion ta me Kuz, Benjaminwainoi; Ujanzenoi jabilak.
1Ujazen, ŋainag Anut, olonpa ŋa ŋeseafug ŋemadoŋame;
inag ŋalekuzekgaz daŋanoi patug pasip tetazag ŋiliagpe,
2teap laion egin detetazagpa,
diziagmap tata gateg pasinen tea.
3O Ujazen, ŋainag Anut, ŋa megin ŋenautap,
inag nimag zegaitap,
4ŋa inag badim abaŋ gauai naon ŋenau alantap,
inag agez inan abaŋ se mon tat ŋowozaitap,
5agez segauz uzagpa biagoi,
segauz puzotoanagpa,
tinig kulukallon dipiziŋiniwoi.
6Ujazen, buzu isap umaispa,
tini wotep ŋainag agez nadin wagai nauk daŋep mado;
tini seflalep, O inag Anut, o betenaeknen unaulak.
7Tamolpain nadin temanek o izinen detemaniwoi;
inadin gaten unaup latnen matalpe.
8Ujanzen tamolpain bitiniaime;
Ujazen, inag taozlon bitiniagpa,
inag kagin iloglon ienime melon.
9Unaupa salanbibiangaz nadin nauknauk salan biniwoi,
ge taozgaz stemanape,
ŋan o me ladin inan kankan bubudin mai kibianiumelak,
O Anut taoz.
10Anut mon maipa ŋa gubizdaŋan,
i me bubudin malikdaŋan me putudin pasiime me.
11Anut i betenaekkamaŋ taoz,
i Anut me nal daŋan teŋaen alanime.
12Tamol so tulufunip idaŋsemap,
Anut inan badiz malan jabiwoi.
13I inan judazuk ifunen mug kibinelak,
inan tu inaulak me bizdaŋan.
14Nasi, tamol salan i abaŋ salanoi kankanime,
alan naukoi buben fuam,
azu sekauk inauime.
15I lof inau, saze gauailak,
ge nasi, lof isazelak melon siben ibal idulak.
16Inan nauk salan imulp siben fonlak iduime,
inan wagai nauk siben inan lasenlak iduime.
17Ujanzen inan taozoi iduselak menen pez ŋepaniwoi,
Ujanzen, Sutan moklak i inan nean kalel ŋepaniwoi.
Currently Selected:
Israel Kan 7: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
