Filipi 4
4
1Mewoi taiggaz, me ŋa ilog ŋipinidin, bubeg iwoi jate mai, ŋainag zigiek lilitkubel mai, bubeggaz, aŋ megin Ujanzenlon segatip atiuz.#Kor II 1:14; Tes I 2:19
LADIN TAIMONOI. KRIS NADIN TAZEŊOI AZU TATA, 4
Azu Euodia Sintikeoi mai
2Euodia ŋepai, Sintike mai ŋepaiŋame, i Ujanzenlon ladin taimonoi. 3Ŋa o mai ŋepao, ŋainag uzatbi malik, pain me dinape, i ŋa mai wozou taimon totol gamunlon uzat anaulak, Klement, ŋainag uzatbi aenta mai me neadin get basnen buklon gazelak.#Luk 10:20; Kan 69:29
Jau isa, lo udu, jaen teap ugod, Anut tizinowoi
4Aŋ Ujanzenlon gaidgaid jumi isawoi, faun te ŋabol, Jumi isa!#Fil 3:1; Kor II 13:11 5Tamolai daŋan nami lo inan mazoz kagin diloŋoi. Ujanzen sizizlon iseg madoime. 6Abaŋ tatawoi jaeŋ so sufutanaŋ mon, tea, abaŋ daŋanlon godoanek gadiŋlon mai pez panimap nami azu Anut apai.#Mat 6:25–34; Pet I 5:7; Kan 145:18 7Me Anut inan mazoz me kankan daŋan nenazaime, i nami bubumi nami kankan mai Kristus Jesuslon tiziniwoi.#Joh 14:27; Kol 3:15
8Me mai, taiggaz, abaŋte malik, abaŋte, kagin kabe, abaŋte taoz, abaŋte ikok, abaŋte gamun, abaŋtewoi tiliŋad gamun, kagin gauai ta, abaŋ ta biŋan bisanen iduseg ientap aŋ mewoi lami gaze.#Rom 12:17 9Aŋ peteŋanaŋlak, panaŋlak, aloŋlak, ŋalon anasi mailak me anau, meginpe mazoz inan Anut aŋ maip amadowoi.#Tes I 5:23
Paulus Filipi medaeŋ looi pez paniime
10Aŋ mug faun ŋawoi lami isouime, mewoi ŋa Ujanzenlon jaug kin gauz isaime. Aŋ bo ŋawoi lami so padal, ge dinagnen dal tea. 11Ŋa abaŋ teablak mewoi so ŋukumukom, tea, ŋa waiz tat, ŋainag anaŋ iduse tatge gaid ilog gauaige ŋemadoŋame.#Tim I 6:6 12Ŋa binag ŋadunen ŋaloŋ, ŋasou ŋatasanen mai ŋaloŋ. Saen salan, au, abaŋ daŋanlon ŋa me dab ŋepanig mug ŋaloŋ gauai, loag didimeg pitol funagmeg mai, abaŋ idusanen teabnenlon mai.#Kor II 6:10 13I me tiwon panagime i‐lon ŋa anaŋ daŋan ŋenaunen ŋaloŋ.#Kor II 12:10
Filipi medaeŋ totol Paulus dinilak
14Ge ŋa alan ŋenaumeg aŋ lami panaglak me gauai. 15Filipigaz aŋ sebami aloŋ, totol gamunoi uzat fun ŋenaug Makedonia ŋibinig medaeŋ ta ŋa mai temanig nug dinidinimeg uzat so inau, aŋ mon.#Kor II 11:9 16Tesalonikanen mai aŋ saen taimon azug inag anaŋ abaŋ anaug panaglak. 17Ŋa lo abaŋoi so ŋedalel, tea, aŋ kris kagin inan niŋon aŋalewoi, biŋami gauaioi.#Kor I 9:11 18Ŋa naon idusanen ŋeŋale, subuŋan mai, mug iduseg ŋemadoŋame, nami lo abaŋ Epafrodituslon ŋeŋalelak, janauk fidifud gauai, Anut gamun funig dab ipani.#Fil 2:25 19Ŋainag Anut inan kubel inan naŋenlon Kristus Jesuslon aŋ mai abaŋ idusanen panaŋoi. 20Idinad Anut Mam mai dedeŋanipdedeŋanip kubeldaŋanoi. Malik!
Tabei panek
21Gungaz daŋan Kristus Jesuslon tabei ipinidin. Taidgaz ŋa maig amadoame i tabei dapanaŋ. 22Gungaz daŋan tabei depanaŋ. Kaisar inan ablon uzat denaudime i dimugseg denau. 23Ujanzen Jesus Kristus inan kanim aŋnami uz maip amado.
Currently Selected:
Filipi 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
