Filipi 3
3
MEDAEŊGAZ JUDAGAZOI DAB DENAUWOI, 3
Tinin talek, daz biŋan, tamol kagin me se
1Ya mai, taiggaz, Ujanzenlon jumi isa. Azu ŋusufulep ŋegazenen ilog so slali, me aŋoi mai gauai.#Fil 2:18; 4:4 2Gaun me aŋ dab ipinidin, salanbibian dab ipinidin, sansan muluŋoi diboldime me dab ipinidin.#Bo 22:15 3Id me Uzlon Anut bian tepalutamelak id muluŋgaz niŋon, id Kristus Jesuslon jaud isaime, tinid me so tenau tepanitame.#Mat 3:9; Rom 2:29 4Ŋa mai tinin ŋenau ŋepaninen iduseg ŋaloŋ. Tamol ta ilon ibol i tinin inau paninen iloŋ me ŋa i ŋenenazi.#Kor II 11:18, 22 5Ŋa nal eit ŋemadeg muluŋ ŋenasi, ŋa Israel tamolpain nadin ai, Benjamin inan bagen, ŋa Hebreawain, Hebrea nadin dazlon noaglak, kibiaŋ uzi paneklon ŋa farisea,#Apos 26:5; Rom 11:1 6wagai nauklon ŋa eklesia ŋeŋale ŋuzi, Israel nadin kibiaiŋoi ŋa dagom mok ŋatoz.
Paulus Kristus maip dikoloi imat
7Ge wadan ait melon ŋeŋalelak me daŋan Kristusoi abaŋ se mon ŋabol.#Mat 13:44, 46 8Malik, ŋa Kristus Jesus, ŋainag Ujanzen, ŋaloŋlak me abaŋ daŋan nenaza pasi, abaŋ salan e ŋabol. Iwoilakoi ŋa abaŋ aenta daŋan me niŋon tea e ŋabol, me kizika egin mon dab ŋepaniŋame, ŋa Kristus ŋabip ŋeŋalewoilakoi. 9I‐lon ŋemadowoi sibeg inag taoz kibiaiŋ sinanlon tea, tea, ŋan me Kristuslon ilonlon maliknenlon ienime, Anut inan taoz me ilonlon maliknen daŋeime me.#Rom 3:21, 22 10Me ŋa i, inan imaisnen inan tiwon mai ŋaloŋoi, inan alannauk ŋepeleŋaniwoi, ŋa i maip inan mateŋlon akoloi,#Rom 6:3–5; Rom 8:17; Gal 6:17 11Meginpe ŋa mai mateŋlonpa ŋamaisnen inan fun me dab kin ŋepaniwoi.
Paulus i didnen suzuzum ŋalewoi gik inauime
12Ŋa abaŋ me get so ŋeŋale, sibeg so ŋaduselak, ge ŋa gik ŋenau, inag egin ŋabip ŋeŋalewoi, Kristus Jesus i ŋa inan ŋan noaglakoi.#Tim I 6:12; Apos 9:6 13Taiggaz, ŋa so ŋabol ŋa sibeg ŋabig inag egin ŋeŋalelak, ge e me ŋenauŋame, abaŋ getnen me dab so ŋepanimeg abaŋ naognen me ŋabiwoi stemanagge ŋadabŋame.#Luk 9:62 14Anut Kristus Jesuslon didlak wigiaglak inan suzuzum ŋeŋalewoi ŋuzig ŋepaluŋame.#Kor I 9:24 15Id leŋadlon tata gazoilak id megin kankanoi; aŋ aenta abaŋ talon kankan ibenlon atoztap Anut me inan fun mai boboloanip peteŋanaŋoi.#Kor I 2:6 16Id teŋaleg taloŋtame melon tatozŋan.#Gal 6:16
Jakebazek inan agez
17Taiggaz, aŋ mai ŋa ateŋanagpe, ŋan me i am egin ditozdime me dab ipinidin.#Kor I 11:1; Tes I 1:7 18Kuzum iwoi get ŋepaiaŋlak gazo melaug idumeg ŋabolŋame, i Kristus inan jakebazek inan agez demadodime.#Kor I 1:23; Gal 6:12 19Wadanlonpa i depadaloi, nadin tibud me loadin, nadin kagin salanlon judin isaime, tannen abaŋoi mon kankan.#Rom 16:18 20Ge idinad funpanu me didlak ienime, melakpa Patudpaseknen, Ujanzen Jesus Kristus malan tenautame.#Ef 2:6; Kol 3:1; Heb 12:22 21Me inad tinid alan me ibulsap inan tinin kubel egin ikibinewoi, abaŋ daŋan siben paenlon inauime tiwon melon i inaunen iloŋ.#Kor I 15:43, 49, 53
Currently Selected:
Filipi 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
