Mateus 7
7
Jesus betenaekoi bebanek azu ibol
1Aŋ so abetenae mon, meginpe aŋ so bitiniaŋoi.#Rom 2:1; Kor I 4:5 2Betenaek melon aŋ abetenaeame, melon aŋ mai bitiniaŋoi. Tenaek melon aŋ atenaeme melon tenaep panaŋoi.#Mar 4:24 3Aitoige paŋ nenamun oina tai inan malanlon dab paniume, ge bag oina malalon ienime dab so paniume? 4Oina tai paiume, Mademap, paŋ nenamun malalon ienime ŋukudewoi, ge sibe oina malalon bag ienime? 5Malabiab o, bag oina malalon ienime me get kudepged, meginpe deleŋanek gauailon oina tai malanlon paŋ nenamun kudenen uloŋoi.
6Abaŋ gun gaun so ipinidin mon, nami betabut boz noadinnen so sezane mon, i me niedin paenlon dipiziŋinip didaŋsap aŋ mai diziŋinaŋoi.#Mat 10:11
Godoanekoi
7Agodpa, meginpe aŋ panaŋoi; abezanipa, meginpe aŋ anasiwoi; ititipa, meginpe pasi panaŋoi.#Mar 11:24; Luk 11:9–13 8Daŋan i dadon igodime me iŋaleime, i bezaniime me inasiime, ititiime me pasi paniime.#Jer 29:13, 14 9Tamol it tat aŋ leŋamilon madoime, inan ai sepalaŋoi godoanimap me i pat paniwoi? 10Tea, i ijoi igodmap i mot paniwoi tat? 11Mewoi aŋ slamilak nami nunumigaz lo abaŋ gauai pinidinnen aloŋ, nami Temami didlon madoime i me ibeleŋanip abaŋ gauaioi digoddime me pinidinoi.#Jak 1:17 12Mewoi abaŋ daŋan abaŋte tat me tamolpain aŋ donoaŋoi lami ibolime, megin mon aŋ iwoi mai anau. Me kibiaiŋ profet nadin gazek mai inan niŋon.#Mat 22:39, 40; Luk 6:31; Rom 13:8–10
Dalauan kokoŋlon adula
13Dalauan kokoŋlon adula. Dalauan ujan dal bebaŋan me pedaleŋlon ilaime, kuzum melon diduladime.#Luk 13:24 14Dalauan kokoŋ dal sigisog me bas madonenlon ilaime, taitai mon dal me denasidime.#Mat 19:24; Apos 14:22
Profet sekaukoi demazazpa demadowoi
15Profet sekaukoi amazazpa amado, i me belelek tinin inan kagin moklon aŋ ziminen disodime, ge ladinlon i wolf egin liwodin gisigasime.#Mat 24:4, 5, 24; Apos 20:29 16Nadin niŋonlon aŋ i aloŋoi. Faiaglak wain damu tat diŋaldime, tea, biab duzdaŋanlon guzab tat diŋaldime?#Gal 5:19–22; Jak 3:12 17Megin mon ja gauai dadon niŋon gauai inauime, ge ja salan me niŋon salan inauime.#Mat 12:33 18Ja gauai niŋon salan inaunen tea, ja salan mai niŋon gauai inaunen tea. 19Ja dadon me niŋon gauai so inauime me detazep ja malanlon desezanewoi.#Mat 3:10; Joh 15:2, 6 20Mewoi nadin noŋodinlon aŋ i aloŋoi.
21Daŋan me i paiagime, Ujazen, Ujazen, me didnen kiŋdomlon so idulawoi, tea, i me ŋainag Mam didlon madoime inan auan uzi paniime me mon.#Rom 2:13; Jak 1:22, 25; 2:14 22Tamolai kuzum nal melon depaiagoi, Ujazen, Ujazen, am oina nealon profet azu so abol tat, oina nealon buga sladin so akudua tat, oina nealon uzat ujanujan kuzum so anau tat?#Luk 13:25–27; Kor I 13:1, 2 23Meginpe ŋa beŋten ŋipidinoi, Ŋa aŋ kin so ŋaloŋ, binagpa ala, salanbibian aŋ.#Mat 25:41; Tim II 2:19
Ab sasekoi azu ibol
24Mewoi daŋan i ŋainag azu e diloŋ denau maidime i tamol kagindaŋan kilian, me i inan ab pat fonlak isaselak.#Mat 7:21 25Ui idug lom palu, tim ifazeg ab me jabi, ge i so belemanig idu, me i pat fonlak saselakoi. 26Daŋan i ŋainag azu e diloŋdime, ge so denaudime, i tamol gedagad kilian, me i inan ab abuz fonlak isaselak. 27Ui idug lom palu, tim faze maig ab me jabig i belemanig idu, ibal idunen me liŋan zen mok.#Hesek 13:10, 11 28Meginge Jesus azu e ibol binig tamolpain malandaŋan inan azuoi dizut mok.#Mar 1:22; Luk 4:32 29I tiwondaŋan azu peteŋanalakoi, gazekmaŋau aenta egin tea.#Joh 7:46
Currently Selected:
Mateus 7: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
