Mateus 26
26
JESUS ALAN INAUG MADEG IMAT PASI, FAUN IMAISLAK, 26:1–28, 20
Gatengaz Jesusoi tauaŋ denauwoi dibol
1Jesus azu e daŋan ibol binig i inan meglaum ipidin,#Mat 20:18 2Aŋ aloŋame, nal azup binip Pasanal iduwoi, Tamolai me dibiti dipinidinpa jakebazeklak dezaiwoi. 3Me uzig waliŋgatengaz, tamolpain nadin matugaz mai waliŋ nadin getadin, nean Kaifas, inan ablon detemani. 4I maŋau dodin denaup Jesus diabip dufunip imatoi dikibiai. 5Ge i dibol, Ubou ujanlon tea, tamolai ilonnen ta so dimaispa dizoip bulebulewoi.
Pain ta Jesus gaten buzugusi
6Jesus Betanianen Simon pizapizdaŋan inan ablon mademeg 7pain ta ganalnabud gazeŋmozdaŋan, naon ujan, me ŋaleg iseg Jesus anaŋ janimeg gaten fonlak iwali. 8Meglaum me denasig i baibai denaug dibol, Me aitnen se bedani? 9E naon ujanoi idad ilape me waizgaz pinidinpe. 10Ge Jesus iloŋge ipidin, Aitoi pain ilon muzuan paniame? I ŋawoi uzat gauai inaulak. 11Waizgaz aŋ ziminen gaidgaid demadodime, ge ŋa aŋ maip gaid so temadowoi. 12I gazeŋmoz e tiniglak iwalimeg i fedafodlon noagnenoi kibiniaglak. 13Malik ŋa aŋ ŋepaiaŋ, domten tat fatufatulon totol gamun e fun deflalemap melak pain e inaulak me i ladin isounenoi mai diboloi.
Judas Jesus idad ile
14Me uzig twelf, menen taimon nean Judas Iskariot, i waliŋgatengaz zidinnen ileg 15ibol, Abaŋte apanagoi, ŋa sibeg i beŋten ŋenaup ŋepanaŋmap? I silwer inan gaŋmalan tirti depani.#Joh 11:57; Sak 11:12 16Me alouge i saen gauai i nimadinlon inaunen ibezani.#Tim I 6:9, 10
Jesus pasa janiime
17Sepalaŋ didek zagun tea inan ubounal matulon meglaumgaz Jesus izinnen diseg dibol, O dodin ubolume, o pasa waniwoi me domten ikibinewoi?#Ekso 12:18–20 18I ibol, Aŋ panulon ta izinnen alap apai, Peteŋanek ibol, Ŋainag saen mug pisiniime. O izinen ŋainag meglaum mai pasa aniwoi.#Mat 21:3 19Jesus ipidinlak egin denau, i pasa dikibine.
20Tidomge i meglaum twelf mai dematal. 21I dianimeg i ibol, Malik ŋa aŋ ŋepaiaŋ, aŋ ilonnen ta ŋa iblanagoi. 22I teŋeadin gauz alange fun denaug anenanen i depai, Ujazen, ŋa tat? 23I auadin jabig ibol, Me i ŋa mai tabiz taimonlon nimama iduimelak me ŋa iblanagoi. 24Tamolai ilaime, iwoi gazelak egin, ge waio tamol me i Tamolai blaniime. Ai me tinan so inaupe me gauaipe.#Mat 18:7 25Judas me i blanilak i ibol, Rabi, ŋa tat? I ipai, O ubollak.
Ujanzen inan tuz gun
26I anaŋ dianimeg Jesus sepalaŋ iŋaleg baz panig bufate idug meglaumgaz ipinidinge ibol, Aŋalep ani, e me ŋainag tinig.#Mat 14:19 27I gab ta iŋaleg baz panig ipinidinge ibol, Aŋ daŋan melon imili. 28E me ŋainag daz temaneknen, me tamolai kuzum nadin aupasek pasinenoi iwali iduwoi.#Ekso 24:8; Jer 31:31; Sak 9:11 29Ge ŋa aŋ ŋepaiaŋ, Ŋa faun te wain e inan niŋon so ŋimiliwoi, nal melon ŋa aŋ maip Mam inan kiŋdomlon timilimap eginmap.
Meglaum Jesusoi duŋuzuz, Petrus kakez
30I kanam ta diabi binig i Gazeŋdidlak dile.#Kan 113—118; Joh 18:1 31Saen melon Jesus ipidin, Aŋ daŋan tidom elon miz apanagoi. Azu gazelakoi, Ŋa tizinek ŋufuniwoi, meginpe belelek malandaŋan pizitiliawoi.#Joh 16:32 32Ge ŋa fuŋunagpa ŋamasimap ŋa ŋamugsap Galileanen ŋalawoi.#Mat 28:7 33Ge Petrus auan jabig ipai, Daŋan o miz depanomap, ŋa so mok miz ŋepanowoi. 34I ipai, Malik ŋa o ŋepao, tidom elon kekazek get so ibobmap o ŋawoi kakez tolp unauwoi.#Joh 13:38 35Petrus ipai, Ŋa o maip tamatoitap ŋa owoi so ŋekakezoi. Meglaum daŋan megin mon dibol.#Mat 26:56
Jesus Getsemanenen jaeŋ gauz funi
36Meginge Jesus i maig aben talon nean Getsemane men dileg i meglaum ipidin, Elak amatalpe, ŋa melak ŋalapged ŋogodoaniwoi. 37I Petrus, Sebedeus inan ai azugen mai iŋalge ilon alange jaeŋ funek fun inau.#Heb 5:7 38Me uzig ipidin, Ŋainag nitug gauz alan, ŋamatoi ŋenauŋame. Aŋ elak amadop ŋa maip temazazoi.#Kan 43:5; Joh 12:27 39I kin ileg naonlon ibal idug igodoanimeg ibol, Mam, dal ientap gab e nenazagpa ilawoi, ge ŋa ŋabolŋame egin tea, tea, o ubolume megin.#Joh 18:11; Heb 5:8 40I inan meglaumgaz zidinnen iseg dien padalmeg ilge i Petrus ipai, Aŋ megin aur taimon ŋa mai temazaznen tea? 41Amazazmap ogodoanimap amado, meginpe aŋ kibianeklon so adulawoi; ilon me pasak ibolime, ge tinin uzi paninen me muzuan.#Heb 2:14; 4:15 42I faun te ileg godoanig ibol, Mam e me ŋimilimap mon nenazagoitap oina aua ŋuzi ŋepaniwoi.#Mat 6:10 43I faun te iseg dienmeg ilge meladin muzuan. 44I ibinge faun te ileg igodoani tol, azu get ibollak e faun ibol mug.#Kor II 12:8 45Me uzig i meglaumgaz zidinen ileg ipidin, Aŋ aenge jaeŋ aŋalemeg amadoame? Nasi, saen mug idu, Tamolai aupasekbibian nimadinlon denaulak. 46Amaispa talawoi, anasi, me ŋa i nimadinlon noagnen isoime.#Joh 14:31
Judas Jesus musuklon iblani
47I azu ibolmeg, nasi, Judas i twelf menen ta tamol malan ujan sebuzidaŋan, suaŋtitukdaŋan mai waliŋgatengaz tamolpain nadin matugaz zidinnenge maig dise. 48Me i nimadinlon inauime i bagoz ta ipinidinlak, ibol, Ŋa musuk ŋepanimap ŋan meged, abi. 49I buntaimon Jesus izinnen ileg ibol, Pez e, Rabi, musuk mai ipani. 50Ge Jesus ipai, Tizag, o dodinge use? Me uzig i diseg nimadin Jesus tininlak denaug diabi. 51Nasi, ta i Jesus maig demademeg niman isouge badiz kurus ibolge waliŋgaz getadin inan begabeg funiwoi inaug tiliŋan waŋ sebazi. 52Meginge Jesus i ipai, Oina badiz inan abenlon nula. Daŋan me badiz diabidime i badizlon depadaloi.#Gen 9:6; Bo 13:10 53O ubol ŋa inag Mam ŋepaip i eŋel 12,000 so nenazap ipanagoi? 54Ge megintap azu gazek dodin niŋon inaup itasawoi? 55Saen melon Jesus tamol malan ujan me pidin, Aŋ zoikbibian egin sebuzi suaŋtitukdaŋan mai ibiagoi aselak? Nal daŋan ŋa tempellon kagin ŋepeteŋanameg ŋematal, ge aŋ so ibiaglak.#Joh 18:20 56Ge e daŋan profet azu gazek niŋon inauwoi idulak. Meginge meglaum daŋan i dibinig diau.#Mat 26:31
Jesus duduzig Kaifas izinnen dile
57Uzig i me Jesus diabilak i Kaifas waliŋgaz getadin izinnen duduzig ile, melak gazekmaŋau matu mai detemanilak. 58Ge Petrus uzig kin ibennen waliŋgaz getadin inan panuatenlon idulemeg kort wadan nasiwoi opas mai dematal. 59Waliŋgatengaz kaunsilgaz daŋan mai azu sekaukoi delaŋai, dufunip imat menen. 60Ge tamol kuzum uf denaumeg i azu niŋon ta so denasi. Wadanlon tamol azugen dimaisge 61dibol, I me ibol, Ŋa Anut inan tempel ŋipitiŋinip nal tolpa faun ŋesase mugoi.#Joh 2:19–21 62Waliŋgaz nadin getadin imaisge ibol, O auajabek azu ta ubolnen tea? Tamol me owoi abaŋte diboldime. 63Ge Jesus i to ibol. Waliŋgaz getadin i ipai, Ŋa Anut baslon malik ŋepao, o paiamap aloŋoi, o Kristus Anut bas inan Ai?#Mat 16:16; 27:12 64Jesus ibol, O ubollak. Ge ŋa o ŋepao, e uzip aŋ Tamolai Tiwon niman waŋlon imatalmap did inan timtaenlon isop anasiwoi.#Kan 104:3; 110:1; 68:35; Apos 7:56; Mat 9:3; Joh 10:33 65Meginge waliŋgaz nadin getadin inan jamel melaen jabig tetazig ibol, I dizawaek azu ibollak. Aitoi azu tawoi taboloi? Aŋ inan dizawaek aloŋlak. 66Aŋ dodin abol? I dibol, I imatoi.#Lew 24:16; Joh 19:7 67Meginge i naon dujusuni, dupututi dufuni mai. Aenta dipilitig,#Jes 50:6 68dibol, Kiailon uloŋpa, Kristus o! It o funolak?#Luk 23:39
69Petrus muzinnen panuatenlon matal. Uzatpain ta izinnen iseg ibol, O mai Jesus Galileawain maig amadelak. 70I bo daŋan noadinnen ikakez, Aŋ abolame me fun so ŋaloŋ. 71I muzinnen ab damonlon ilemeg uzatpain ta inasig i tamol men ditiuzdime me ipidin, Tamol e Jesus Nasaretwain maig demadelak. 72Faun te i stemanek azulon ikakezge ibol, Ŋa tamol me so ŋalon. 73Kitek ta maig tamol ditiuzlak me diseg Petrus depai, Malik o mai tamol menen ta, oina aualon beŋten. 74Meginge i sibenoi meselaneknen azu ibol, azu gegaun mai ibolge ibol, Ŋa tamol me so ŋaloŋ. Buntaimon kekazek ibob. 75Petrus Jesus inan azu ilon isou, Kekazek so ibobmap eginmap o ŋawoi kakez toloi. I beŋten idug zen mok ita.#Joh I 3:20
Currently Selected:
Mateus 26: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
