Lukas 18
18
Betenaekkamaŋ, painbob igodlak mai. Godoaneklon stemanip temadowoi.
1I azu faŋanfaŋan ta pidin, i sededeŋanip dogodoaniwoi, bubudin so izou iau mon.#Rom 12:12; Kol 4:2; Tes I 5:17 2I ibol, Panu talon betenaekkamaŋ ta made, i Anutoi so izut, tamolpain zezeŋana. 3Painbob panulon maig made, me i izinnen ileg ipai, Aneg udu, inag liwojabek naonnen ŋainag abaŋ tali panag. 4Saen melaen imoige made. Aloumeg ilonlon ibol, Ŋa Anutoi bo so ŋazutŋame, tamolpain daŋan ŋezezeŋanaŋame. 5Ge ŋa painbob e i dedeŋanig bubuzag, inan abaŋ ŋetali ŋepaniwoi, teatap i gazop isop isop tiwog itazewoi.#Luk 11:7, 8
6Ujanzen ibol, Betenaekkamaŋ i so taozlak i ibollak me aloŋoi. 7Abolpa, Anut i inan pilianek me adzen tidomzen i naonnen dibobdime, so tat nadin abaŋ tali kibinewoi? 8Ŋa ŋepaiaŋ, I inadin abaŋ pasak tali pinidinoi. Ge abolpa, Tamolai isemap i tanlak tamolpain ladinlon maliknendaŋan nasiwoi tat?
Farisea selna mai
9Tamol aenta, i sebadin denau dipinidin, i taoz e dibol, aenta bo zezeŋana, azu faŋanfaŋan e pidin. 10Tamol azugen tempellon dogodoaniwoi dile, ta farisea, ta me selna. 11Farisea itiuzge siben naon egin godoani, O Anut, ŋa o pez ŋepanoŋame, ŋa tamol aenta egin tealak. Ŋa ponaubibian tea, ŋa sekaukbibian tea, ŋa jaitbibian tea, ŋa selna egin so ŋakol.#Jes 58:2, 3 12Wik taimonlon nal azugen ŋudig ŋemadoŋame, inag abaŋ daŋan ŋetezepale tenpa, menen taimon Anut ŋepaniŋame.#Mat 23:23 13Selna bo kin ibennen itiuzge made, i didlak naon itadnen mamai funi, au, gudun idug mademeg, inan petazen titig ibol, O Anut ŋa aupasekaiged, kanim ŋale toanag ŋadu.#Kan 51:3 14Ŋa aŋ ŋepaiaŋ, E i gaten pasig inannen imulge ile, a i tea. Ta i siben isou itasaime, i idu paniwoi. Ta i siben izae imullak, i isou itasanen paniwoi.#Luk 14:11; Mat 23:12
Jesus aikamo izinnen disowoi wigidin
15Ai kamo ta mai didauzig dise, i niman fodinlak inauwoi dibol. Inan meglaum i dilmeg i me gauz dususua. 16Ge Jesus ai kamo izinnen wigidinge ibol, Ai kamo gauai abinpa, ŋa izignen disowoi, aŋ so abit mon! Anut kiŋdom me inadinlakoi. 17Malik ŋa aŋ ŋepaiaŋ, Ta i Anut kiŋdom ai kamo egin so iŋaleime, i men so idulawoi.#Mat 18:3
Judagaten filian Jesus sedazewoi ise
18Judagaten ta isedazeg ibol, Peteŋanek gauai, ŋa abaŋte ta mon ŋenaup ŋa patug isap ŋemadowoi? 19Jesus auanlon pasi ŋale ipai, O aitoige ŋa gauai e blanagume? Tata so gauai, taimon siben mon, me Anut. 20Ge kibiaiŋ uloŋume, Jait so wabi mon, ta so funip imat mon, abaŋ ponau so ŋale mon, tinan taman mai zidinnen dagom naup madowoi.#Ekso 20:12–16 21Ge i ibol, Me daŋan ai faunlonge mug ŋuzi ŋipinidinlak. 22Jesus me iloŋmeg auanlon pasi ŋale, ipai, Taimon ta mon get so unaulak. Oina abaŋ dadon isap udad ilap, waiz me wae pinidinoi, meginpe o jes ta didlon ienoi, usop uzagpe utoz.#Mat 6:20 23I me iloŋge ilon alanmeg made, i filianlakoi. 24Jesus ai ilon alanmeg nasig, i ibol, Tamolpain filiandaŋan Anut kiŋdomlon didulanen muzuan mok. 25Kamel i jamel waik titui inan matuklon idulanen me kin pasak, ge tamol filiandaŋan Anut inan kaginlon idulanen me muzuan. 26Tamolpain me diloŋge dibol, Megintap it tat mon patun isawoi? 27Ge i ibol, Abaŋ tamolpain noadinnen nauknen teab, me Anut inaunen iloŋ pasi.
28Mug Petrus ibol, Uloŋ, am abaŋ daŋan abinlak, o sunuzoame. 29I pidin, Malik ŋepaiaŋ, Tata i inan panu, iwon, taingaz, tinantaman nanungaz mai Anut kiŋdomoi ibinime, 30i me abenlon abaŋ kuzum en mug iŋaloi, loantapnen bas dedeŋanek madoknen megin mon mai.
JESUS JERUSALEMNEN ILE, 18:31—21:38
Inan alan naukoi ibol tol
31Meginlag i inan ai twelf iŋalge pidin, Aloŋ, id Jerusalemnen tadusatame. Abaŋ get profetgaz Tamolaiwoi digezlak, mug daŋan iduwoi inauime.#Luk 9:22, 44 32I gob nimadin denauwoi, i dizan dewaiwoi demeselaniwoi, dujusuniwoi, 33dupututiwoi, dufunip imatoi; taen azup geglonpa imaisoi. 34I bo abaŋ me so diloŋ, tea, azu me toanig egin mon, i ibollak me i ladinlon kankannen teabe, dodin tat! dibol.#Mar 9:32
Jeriko izinnen ta malan itaulak ikibine
35I Jeriko sizizlon isemeg, tamol ta malan itaulak dal gezaŋenlon abaŋoi igodmeg made. 36Tamolpain malanzen denenazimeg liŋadin iloŋtag sodoz inau, abaŋte? 37I depai, Nasaretwain Jesus ilawoi isoime. 38Mug iwog ibol, Jesus, Dawid aiged, so binag mon, ilo panagŋan! 39Dimuglak i debebani, to iboloi, dibol. Ge i iwog zen saseg ien, Dawid aiged, ŋa so binag mon, ilo panagŋan! 40Mug Jesus itiuzmeg ibol, Izignen uduzip aso! Duduzig izinnen diseg, ipai, 41Dodin ta ŋunuowoi ubolume? I ibol, Ujazen, ŋa abaŋ ŋenasiwoi mon ŋabol. 42Jesus ipai, Nasi! Oina ilolon maliknen o kibiniolak.#Luk 17:19 43I gazo abaŋ nasiime, i Jesus uzig maig ditoz, Anut kalel pani. Tamolpain daŋan abaŋ megin denasig, i mai Anut inan biŋan dibise.
Currently Selected:
Lukas 18: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
